تارقاتا ايتار بولساق, الماتى وبلىسىنىڭ «ىلە» پوليگونىندا ۇجىمدىق قاۋىپسىزدىك تۋرالى شارت ۇيىمىنىڭ بىتىمگەرشىلىك كۇشتەرىمەن (ۇقشۇ ۇبك) «مىزعىماس باۋىرلاستىق-2017» بىرلەسكەن وقۋ-جاتتىعۋىنىڭ سوڭعى كەزەڭى ءوتتى. وقۋ-جاتتىعۋ بارىسىندا ۇقشۇ ۇجىمدىق بىتىمگەرشىلىك كۇشتەرىنىڭ قۇرىلۋى, ۇقشۇ-نىڭ قۇرامىنا كىرمەيتىن مەملەكەتتەر اۋماعىندا بۇۇ قاۋىپسىزدىك كەڭەسىنىڭ بۇرىشتاماسى بويىنشا وتكىزىلەتىن بەيبىتشىلىكتى ساقتاپ تۇرۋ جونىندەگى وپەراتسيا اۋدانىندا ولاردىڭ ورىستەتىلۋى, بەيبىتشىلىكتى ۇستاپ تۇرۋ جونىندە وپەراتسيانى جۇرگىزۋ, سونداي-اق بىتىمگەرشىلىك تاپسىرمالاردى ورىنداۋ كەزىندە حالىقارالىق ۇيىمدارمەن ءوزارا ءىس-قيمىل جاساۋ ماسەلەلەرى پىسىقتالدى.
وقۋ-جاتتىعۋدىڭ بەلسەندى فازاسىندا بىتىمگەرشىلىك بولىمشەلەردىڭ جەكە قۇرامى ءىس جۇزىندە باقىلاۋ-وتكىزۋ جانە باقىلاۋ پۋنكتتەرىندە قىزمەت وتكەرۋ, جەرگىلىكتى جەر مەن ەلدى مەكەندەردى پاترۋلدەۋ, ماڭىزدى نىسانداردى كۇزەتۋ, جەر مەن نىسانداردى مينادان زالالسىزداندىرۋ, رادياتسيالىق, حيميالىق جانە بيولوگيالىق بارلاۋدى جۇرگىزۋ, ءورت سالدارىن جويۋ, جاپپاي تارتىپسىزدىكتەرگە قارسى تۇرۋ, ىزگىلىك جۇكتەردى الىپ ءجۇرۋ, زاڭسىز قارۋلى قۇرالىمداردى وقشاۋلاۋ جانە جويۋ كەزىندەگى ءىس-قيمىلداردى پىسىقتادى.
ۇجىمدىق بىتىمگەرشىلىك كۇشتەرى بولىمشەلەرىنىڭ كومانديرلەرى بىتىمگەرشىلىك تاپسىرمالاردى ورىنداۋدى ۇيىمداستىرۋدا, بەيبىتشىلىكتى ساقتاپ تۇرۋ جونىندە وپەراتسيانى جۇرگىزۋ بارىسىندا بولىمشەلەردى باسقارۋدا, ءوزارا ءىس-قيمىلدى ۇيىمداستىرۋدا پراكتيكالىق ماشىقتارىن جەتىلدىردى.
وقۋ-جاتتىعۋدىڭ ەرەكشەلىگى, اۋقىمدى شاراعا ۇقشۇ ۇجىمدىق بىتىمگەرشىلىك كۇشتەرىنىڭ مۇددەسىندە اۆياتسيالىق كومپونەنت, ونىڭ ىشىندە, ۇشقىشسىز ۇشۋ اپپاراتتارى, سونداي-اق پسيحولوگيالىق كۇرەس جانە اقپاراتتىق قارسى كۇرەس بولىمشەلەرى تارتىلدى.
وقۋ-جاتتىعۋ بارىسىندا ۇقشۇ ۇبك پوليتسەيلەر پەرسونالىنىڭ ءىس-قيمىلدارىن بۇۇ پوليتسيا دەپارتامەنتىنىڭ قوعامدىق ءتارتىپ جونىندەگى كەڭەسشىسى دجوردجيو دجيايمو قاداعالاپ وتىردى. سونداي-اق وقۋ-جاتتىعۋعا باقىلاۋشىلار رەتىندە قازاقستان رەسپۋبليكاسىندا اككرەديتتەلگەن اسكەري-ديپلوماتيالىق كورپۋس وكىلدەرى, حالىقارالىق جانە وڭىرلىك ۇيىمداردىڭ (بۇۇ, قكحك), بۇقارالىق اقپارات قۇرالدارىنىڭ وكىلدەرى قاتىستى.
«جىل سايىن وتكىزىلەتىن وقۋ-جاتتىعۋلار مەن جاتتىقتىرۋلاردا وفيتسەرلەر, سەرجانتتار جانە ساربازدار جاقسى تاجىريبە جيناقتايدى, ءوزارا ءىس-قيمىل ماسەلەلەرىن پىسىقتاۋعا مۇمكىندىكتەرى بار. بۇۇ-نىڭ ادىستەمەلەرى مەن ستاندارتتارى بويىنشا بەيبىتشىلىكتى ۇستاپ تۇرۋ جونىندە زاماناۋي كەشەندى وپەراتسيالاردىڭ وتكىزىلۋىن ەسكەرە وتىرىپ, ارنالىم بويىنشا ءىس-قيمىلدارعا ۇيىمنىڭ بىتىمگەرشىلىك كۇشتەرىن دايىنداۋدى جەتىلدىرۋ جۇرگىزىلۋدە.
بۇگىن ءبىز «مىزعىماس باۋىرلاستىق-2017» وقۋ-جاتتىعۋى – بىتىمگەرشىلىك كونتينگەنتتەرىمىزدىڭ بىرلەسكەن دايىندىعىنىڭ نەگىزگى كەزەڭىن اياقتايمىز. سىزدەرگە وقۋ-جاتتىعۋ بارىسىندا كورسەتكەن جوعارى كاسىبيلىكتەرىڭىز, تانىتقان ىنتا-جىگەرلەرىڭىز بەن كەرەمەت ماشىقتارىڭىز ءۇشىن العىس بىلدىرەمىن», دەدى قورعانىس ءمينيسترىنىڭ ءبىرىنشى ورىنباسارى – قر قك باس شتابىنىڭ باستىعى, گەنەرال-لەيتەنانت مۇرات مايكەەۆ.
«مىزعىماس باۋىرلاستىق-2017» وقۋ-جاتتىعۋى «جاۋىنگەرلىك باۋىرلاستىق-2017» جەدەل-ستراتەگيالىق وقۋ-جاتتىعۋىنىڭ كەزەكتى كەزەڭى بولىپ تابىلاتىنىن ايتا كەتۋ قاجەت. 2017 جىلعى 10-20 قاراشا ارالىعىندا تاجىكستان رەسپۋبليكاسىنىڭ اۋماعىندا ۇقشۇ ۇجىمدىق جەدەل دەن قويۋ كۇشتەرى كونتينگەنتتەرىنىڭ تاپسىرمالاردى ورىنداۋى شەشۋشى كەزەڭ بولماق.
جولدىباي بازار,
«ەگەمەن قازاقستان»
