باقىتجان ساعىنتاەۆ عيماراتتى ارالاۋ بارىسىندا تىركەۋ ءبولىمىنىڭ, كولل-ورتالىقتىڭ, جۇمىس كابينەتتەرىنىڭ جانە ەكۇ-زەرتحانالارىنىڭ جۇمىسىمەن تانىستى. ءوز كەزەگىندە ينستيتۋت ديرەكتورى تامارا جۇسىباليەۆا پرەمەر-ءمينيستردى ورتالىقتىڭ قىزمەتى, الەۋمەتتىك جاۋاپكەرشىلىك اياسىندا مىندەتتەردىڭ ورىندالۋى, سونداي-اق, رەپرودۋكتيۆتى مەديتسيناداعى جەتىستىكتەر مەن عىلىمي قىزمەت تۋرالى اقپاراتتاندىردى.
ايتا كەتۋ كەرەك, 2017 جىلى ەكۇ ورتالىعىندا جەرگىلىكتى اكىمدىك قاراجاتى ەسەبىنەن 300 الماتىلىق وتباسى ءتيىستى مەديتسينالىق كومەك الدى جانە تاعى شامامەن 700 ادام كەزەكتە تۇر.
جاڭا كلينيكا حالىقارالىق تالاپتاردى ەسەپكە الا وتىرىپ تۇرعىزىلعان جانە زاماناۋي جابدىقتارمەن جاراقتاندىرىلعان. ونىڭ ەرەكشەلىگى تولىقتاي وقشاۋلاندىرىلعان وپەراتسيالىق بلوگى مەن ەمبريولوگيالىق زەرتحاناسىنىڭ بولۋىندا. بۇل ميكروكليماتتى ساقتاۋعا جانە تۇراقتى تەمپەراتۋرا مەن ىلعالدىلىقتىڭ زارارسىزداندىرىلعان اۋامەن قامتاماسىز ەتىلۋىنە مۇمكىندىك بەرەدى. وسىنداي «تازا عيمارات» جۇيەسى جوعارعى كلينيكالىق ناتيجەلەر بەرىپ, ەمدەۋ تيىمدىلىگىن ايتارلىقتاي ارتتىرادى.
بۇدان وزگە, كلينيكا الماتىدا مەديتسينالىق تۋريزم دامۋىنىڭ جارقىن مىسالى بولىپ تابىلادى. رمي ديرەكتورىنىڭ ايتۋىنشا, كورسەتىلەتىن مەديتسينالىق قىزمەتتەر باعاسىنىڭ ارزان بولۋىنا قاراماستان, شەتەلدىك انالوگتارىنان كەم تۇسپەيدى. دارىگەرلەردىڭ جوعارى بىلىكتىلىگى, زاماناۋي جابدىقتار مەن قازاقستان زاڭدارىنىڭ بەيىلدىلىگى شەتەلدىكتەردىڭ كوپتەپ كەلۋىنە جول اشۋدا. ەكى جىلدىڭ ىشىندە الماتىعا تۇركيادان, قحر-دان, گەرمانيا, رەسەي جانە اقش-تان كەلگەن ەمدەلۋشىلەردىڭ سانى مەديتسينالىق تۋريزم جەلىسى بويىنشا بىرنەشە ەسەگە ارتتى. جىل سايىن رمي كلينيكاسى 3 000-عا دەيىن وتباسىن قابىلداي الادى.
ايتا كەتەيىك, 2017 جىلى الماتى وبلىسىنىڭ دەنساۋلىق ساقتاۋ جۇيەسىن قارجىلاندىرۋعا 48,4 ملرد تەڭگە قاراستىرىلعان. 1 قازانداعى جاعداي بويىنشا 31,6 ملرد تەڭگەسى نەمەسە جىلدىق جوسپاردىڭ 65,3% يگەرىلگەن.
«تاۋ سامالى» اۋىلىندا ەمحانانىڭ, پاتولوگيالىق-اناتوميالىق بيۋرو مەن سەگىز قۇرىلىستىڭ جالپى سوماسى 6,3 ملرد تەڭگەگە قۇرىلىسى جالعاستىرىلىپ جاتىر. سەگىز نىساندا جالپى سوماسى 2,9 ملرد تەڭگەگە قالىپقا كەلتىرۋ جۇمىستارىمەن سەيسميكالىق كۇشەيتۋ جانە كۇردەلى جوندەۋ جۇمىستارى جۇرگىزىلۋدە. 2017 جىلى قالانىڭ ناۋرىزباي اۋدانىندا «تۋعان جەر» باعدارلاماسى اياسىندا سالىنعان جاڭا ەمحانا پايدالانۋعا بەرىلدى. وندا العاشقى مەديتسينالىق كومەك كورسەتۋدەن وزگە, اسقازان قىلتاماعىن ەرتەرەك انىقتايتىن سكرينينگتىك زەرتتەۋلەر جۇرگىزىلەدى.
سونداي-اق, ەمحانادا رەنتگەن دياگنوستيكا بولىمشەلەرى, وفتالمولوگ, وتولارينگولوگ, توراكالدى جانە ابدومينالدى كولوپروكتولوگيا كابينەتتەرى جانە ت.ب. اشىلعان. بۇدان وزگە, ەلەكتروندى تىركەۋ قىزمەتى, كولل-ورتالىق جۇمىس ىستەيدى, ناۋرىزباي اۋدانىنىڭ تۇرعىندارىنا شۇعىل كومەك كورسەتۋ بريگاداسى قىزمەت كورسەتەدى. جاقىن ارادا «قالقامان» شاعىن اۋدانىندا مەديتسينالىق مەكەمە اشىلادى.
