مەركى اۋدانى, ساۆۆا اتىنداعى №9 ورتا مەكتەپتىڭ 11-سىنىپ وقۋشىسى ايدانا ەسماعامبەتوۆا ءوزىنىڭ وزگەشە دارىن-قابىلەتىمەن ەرەكشەلەنگەن جاس. وبلىستا وتكەن «ولەڭ – ءسوزدىڭ پاتشاسى» اتتى بايقاۋدا اباي قۇنانباي ۇلىنىڭ ەكى جۇزگە جۋىق ولەڭىن, ءۇش پوەماسى مەن بەس قارا ءسوزىن جاتقا وقىپ, باس جۇلدەنى يەلەنگەن ەدى. سول ۋاقىتتا قارشاداي قىزدىڭ تاۋداي تالابىنا تاڭدانباعان, تامسانباعان ادام بولماعان. ەندى رەسپۋبليكا بويىنشا دارىندى 90 ۇمىتكەر قاتىسقان الاماندا ايدانا اباي قۇنانباي ۇلىنىڭ 200 جانە شاكارىم قۇدايبەردى ۇلىنىڭ 118 ولەڭىن, ودان كەيىن ءۇش پوەما, وننان اسا قارا ءسوزدى جاتقا وقىپ, تاعى دا بيىكتەن كورىندى.
ايدانانىڭ ۇستازى گاۋحاراي جۇماتاەۆا شاكىرتىنىڭ ەستە ساقتاۋ قابىلەتىنىڭ وتە جوعارى ەكەنىن ايتا كەلە, ولەڭدەردىڭ تۇپكى ماعىناسىنا دا ۇلكەن ءمان بەرەتىنىن ايتتى. ءسويتىپ ەرەكشە دارىن يەسى ايدانا ەسماعامبەتوۆا ءداستۇرلى ءXVىىى اباي وقۋلارى رەسپۋبليكالىق بايقاۋىنىڭ جەڭىمپازى اتانىپ, جامبىل جەرىنىڭ مەرەيىن اسىردى. ەجەلدەن ءان مەن جىردىڭ مەكەنىنە بالانعان اۋليەاتا ءوڭىرى تاعى ءبىر تالانتتى پەرزەنتىمەن تولىقتى.
راسىندا دا ءۇش جۇزدەن استام ولەڭ مەن بىرنەشە پوەمانى قاتار جاتتاۋ ەكىنىڭ ءبىرىنىڭ قولىنان كەلە قويمايتىن ءىس. سوندىقتان دا ايدانانىڭ ارمانى اسقاق. ەندى تالانتتى جاس اباي مەن شاكارىمنىڭ ولەڭدەرىن عانا جاتتاپ قويماي, وزگە دە قازاق اقىندارىنىڭ شىعارمالارىن جادىنا توقۋدى كوزدەيدى. قازاقتىڭ ادەبيەتىنە, ۇلت اقىندارىنىڭ ۇلاعاتتى تۋىندىلارىنا قۇرمەتپەن قاراپ قانا قويماي, ساناسىنا ءسىڭىرىپ, جادىنا توقىعان ايدانانىڭ ءالى دە الار اسۋى الدا.
حاميت ەسامان,
«ەگەمەن قازاقستان»
جامبىل وبلىسى
