جيىندى ۇيىمداستىرۋشىلار قاتارىندا جاۋاپتى مەملەكەتتىك ورگانداردىڭ وكىلدەرى, قالانىڭ قۇرمەتتى ادامدارى, سالا ماماندارى بولعانىمەن, جان-جاقتى تالقىلاۋدى ۋنيۆەرسيتەتتە قىزمەت ەتەتىن عالىمدارىمىز, ءتىل ماماندارى, كوزى قاراقتى, كوكىرەگى وياۋ جاستارىمىز ءىلىپ اكەتىپ, تۇشىمدى وي-پىكىرلەرىن ءبىلدىردى. كەلەلى جيىننىڭ قورىتىندىسىن تۇزەر بولساق, ەلىمىزدىڭ تۇڭعىش پرەزيدەنتى – ەلباسى ءبىلىم العان, بۇگىنگى تاڭدا وسى قۇرمەتتى مارتەبەگە ساي ءبىلىم بەرىپ كەلە جاتقان ۋنيۆەرسيتەت ۇجىمى مەن ستۋدەنت جاستاردىڭ لاتىن گرافيكاسىن ەنگىزۋ ماسەلەسىن ىقىلاسپەن قابىلداعانىن اتاپ وتكەن ورىندى.
ۋاقىت سىنىنان وتكەن ومىرشەڭ لاتىن گرافيكاسىن قازىرگى تاڭدا الەم حالقىنىڭ 80 پايىزى مەڭگەرگەن ەكەن. الەمدىك اقپاراتتىڭ 70 پايىزى وسى تاڭبامەن تاراتىلاتىنىن, عىلىمنىڭ ءتىلى, حالىقارالىق تەرميندەر, فورمۋلالار دا نەگىزىنەن لاتىن ارىپتەرىمەن جازىلاتىنىن ەسكەرەر بولساق, جاڭا ءالىپبي بىزدەرگە زور مۇمكىندىكتەر تۋعىزادى. مۇنىمەن قوسا الەمدىك مەديتسينا پرەپاراتتارىنىڭ اتاۋى تۇگەلىمەن لاتىن گرافيكاسىندا بەرىلسە, تەحنيكا, تەحنولوگيالار, بيولوگيا, فارماتسيا سالالارى دا تۇگەلگە جۋىق وسى قارىپتەرمەن جازىلادى. حالىقارالىق سپورت ويىندارى, وليمپيادالىق دودالار, سپورتشىلاردىڭ اتى-ءجونى, ويىندار ناتيجەلەرى دە تەك لاتىن گرافيكاسىندا ەكەندىگىن دە كورىپ-ءبىلىپ وتىرمىز.
ءتىلىمىزدىڭ جالپى لاتىن قارپىنە كوشۋى تۋرالى ۇسىنىلعان سوڭعى نۇسقانى ء(بىر دىبىس – ءبىر ءارىپ) جيىنعا قاتىسۋشىلار ءبىراۋىزدان قولدادى. سونىمەن قاتار ۇسىنىس رەتىندە بۇل اۋقىمدى دا ماڭىزدى شارا جالپى حالىقتىق سيپاتتا بولسا ەكەن دەگەن دە ويلار ايتىلدى. ءبىر حالىق, ءبىر ماقسات, ءبىر مۇددە باعدارلاماسىندا ايتىلعانداي ەلىمىزدىڭ تۇتاستاي بۇل شاراعا قاتىسقانى, ونى يگەرۋگە اتسالىسقانى ورىندى بولار ەدى.
الەمدىك تاجىريبەلەر ەسكەرىلە وتىرىپ جاسالعان جاڭا ءالىپبي نەگىزىندە قازىرگى قولدانىستاعى ءالىپبيدى لاتىن قارپىنە كوشىرۋگە قاتىستى اقپاراتتىق-ءتۇسىندىرۋ جۇمىستارىن جۇرگىزۋ – ەڭ وزەكتى ماسەلە. ءتىلىمىزدى دامىتىپ, ونى الەمدىك اقپاراتتىق كەڭىستىككە شىعارۋدىڭ نەگىزگى كوزى بولىپ تابىلاتىن تاريحي وقيعادان ەشكىم دە شەت قالماۋى ءتيىس, اسىرەسە, پروفەسسورلار-وقىتۋشىلار قۇرامى مەن ستۋدەنت جاستار قاۋىمى.
لاتىن گرافيكاسىنداعى جاڭا ءالىپبيدى قابىلداۋ – رۋحاني تاۋەلسىزدىك ەكەنىن جاقسى ءتۇسىنىپ كەلە جاتقان ەلدىڭ سەنىمى كوڭىل قۋانتادى.
ىزتىلەۋ امانجول,
مەديتسينا عىلىمدارىنىڭ دوكتورى, پروفەسسور, كافەدرا مەڭگەرۋشىسى
قاراعاندى وبلىسى
