ساپار يساقوۆ باستاعان ءبىر توپ قىرعىز دەلەگاتسياسى كەشە استاناعا كەشتەتىپ جەتتى. ۇكىمەت باسشىسى, ونىڭ ورىنباسارلارىنان باستاپ بۇكىل مينيسترلەرى بار قىرعىز دەلەگاتسياسى قازاقستان ۇكىمەتى باسشىسىمەن كەزدەسۋ تۋرالى باستامانى وزدەرى ۇسىنعان ەكەن. وعان قازاقستان تاراپى كەلىسىم بەرگەن ساتتە بىردەن استاناعا ۇشىپ كەلگەن.
دەلەگاتسيا قۇرامىندا ءبىرىنشى ۆيتسە-پرەمەر-مينيستر تولقىنبەك ابدىعۇلوۆ, سىرتقى ىستەر ءمينيسترى ەرلان ابدىلداەۆ, قارجى ءمينيسترى ادىلبەك قاسىماليەۆ, ەكونوميكا ءمينيسترى ارتەم نوۆيكوۆ, مەملەكەتتىك كەدەن قىزمەتىنىڭ توراعاسى ازامات سۋلايمانوۆ, مەملەكەتتىك سالىق قىزمەتىنىڭ توراعاسى وكتيابر ابدىكايموۆ, مەملەكەتتىك ەكونوميكالىق قىلمىستارعا قارسى كۇرەس قىزمەتىنىڭ توراعاسى زاميربەك وسمونوۆ, مەملەكەتتىك كوشى-قون قىزمەتىنىڭ توراعاسى مەدەتبەك ايداراليەۆ, مەملەكەتتىك كەدەن قىزمەتى توراعاسىنىڭ ورىنباسارى قۇرمانبەك يساكوۆ جانە باسقالارى بار.
ەكى ەل ۇكىمەت باسشىلارىنىڭ كەزدەسۋى الدىمەن شاعىن قۇرامدا جابىق ەسىك جاعدايىندا ءوتتى. ودان سوڭ ەكى ەلدىڭ مينيسترلىكتەرى مەن ۆەدومستۆولارى باسشىلارىنىڭ قاتىسۋىمەن كەڭەيتىلگەن قۇرامدا كەلىسسوزدەر جۇرگىزىلدى. ونىڭ بارىسىندا شەكارالىق, كولىكتىك, فيتوسانيتاريالىق جانە ۆەتەريناريالىق باقىلاۋ, ەاەو جانە دسۇ ەرجەلەرى مەن نورمالارىن ەسكەرە وتىرىپ, كەدەندىك جانە سالىقتىق اكىمشىلەندىرۋ ماسەلەلەرى قاراستىرىلدى.
«قازاقستان پرەزيدەنتى ن.نازارباەۆتىڭ بىرنەشە رەت اتاپ وتكەنىندەي, باۋىرلاس ەكى ەلدىڭ قارىم-قاتىناسى بارلىق جاعىنان جاقسى ءارى وڭىردەگى ءوزارا ءتيىمدى ىنتىماقتاستىقتىڭ ۇلگىسى بولۋى كەرەك», دەدى ب.ساعىنتاەۆ كەلىسسوزدەر بارىسىندا.
ءوز كەزەگىندە س.يساقوۆ قىرعىزستاننان ۇلكەن دەلەگاتسيا كەلگەنىنە توقتالدى. «مەن قىرعىزستاننىڭ پرەمەر-ءمينيسترى رەتىندە سىندارلى جۇمىسقا بەيىلدىمىن», – دەپ اتاپ ءوتتى ول.
كەلىسسوزدەردىڭ قورىتىندىسى بويىنشا تاراپتار 19 قازانداعى 00.00 ساعاتتان باستاپ قازاق-قىرعىز شەكاراسىنان قول جۇگى بار جەكە تۇلعالاردىڭ, جولاۋشى تاسىمالدايتىن تۇراقتى اۆتوبۋستاردىڭ, جەڭىل اۆتوكولىكتەردىڭ, بوس جۇك كولىك قۇرالدارىنىڭ باسىمدىقتى تارتىپپەن ءوتۋىن قامتاماسىز ەتۋگە ۋاعدالاستى.
سونىمەن قاتار, ەكىجاقتى ەكونوميكالىق قارىم-قاتىناستاردىڭ وزەكتى ماسەلەلەرى بويىنشا بىرلەسكەن «جول كارتاسىن» ازىرلەۋ ءۇشىن قازاقستان مەن قىرعىزستان پرەمەر-مينيسترلەرىنىڭ ءبىرىنشى ورىنباسارلارى توراعالىق ەتەتىن جۇمىس توبىن قۇرۋ تۋرالى شەشىم قابىلداندى.
كەلىسسوزدەر اياقتالعاننان كەيىن ونىڭ قورىتىندىسى جونىندە پرەمەر-مينيستر باقىتجان ساعىنتاەۆ مالىمدەمە جاساپ, قىرعىز ەلىنەن ۇلكەن دەلەگاتسيا كەلگەنىن, بۇل ساپار بىرەر كۇن بۇرىن وسى تاراپتىڭ باستاماسىمەن بولعان تەلەفون ارقىلى سويلەسۋدىڭ ناتيجەسىندە جۇزەگە اسقانىنا توقتالدى.
ۇكىمەت باسشىسىنىڭ اتاپ وتكەنىندەي, تاراپتار كەدەن جانە سالىقتىق اكىمشىلەندىرۋگە قاتىستى تۇيتكىلدى ماسەلەلەردى تالقىلادى. مىسالى, ءبىزدىڭ كەدەن ورگاندارى قىرعىز تاراپىنىڭ قىتايدان يمپورتتايتىن تاۋارلارىن قازاقستان اۋماعى ارقىلى الىپ وتكەندە تولىق جاريالاماۋ دەرەكتەرىن انىقتاعان. سونىڭ سالدارىنان ءبىزدىڭ ەل تىكەلەي زيان شەگىپ وتىر. كەلىسسوزدەردىڭ ناتيجەسىندە قىرعىز جاعى كۇن تارتىبىنە قويىلعان وسىنداي ماسەلەلەرمەن كەلىستى جانە پرەمەر-مينيستر س.يساقوۆ قىرعىزستان جاعىنىڭ ءوز مىندەتتەمەلەرىن ورىنداۋىنا, سونداي-اق ەۋرازيالىق ەكونوميكالىق وداق اياسىنداعى ەكونوميكالىق مۇددەلەردىڭ ساقتالۋىنا قاتىستى ماسەلەلەردىڭ وڭ شەشىلەتىندىگىنە كەپىلدىك بەردى.
دينارا بىتىك,
«ەگەمەن قازاقستان»
