يادرولىق مەديتسينا ءبولىمىنىڭ مەڭگەرۋشىسى ايگۇل سادۋاقاسوۆا اۋرۋحانادا ەم الۋشىلاردىڭ ءوتىنىشى بويىنشا ماگنيتتى-رەزونانستى توموگرافيا (مرت) مەن كومپيۋتەرلىك توموگرافيادان وتكىزۋدى كۇن سايىن, ياعني سەنبى جانە جەكسەنبى كۇندەرى دە جۇرگىزە باستاعانىن ايتادى. ويتكەنى ادام اعزاسىنداعى كىشكەنە وزگەرىستى, ماسەلەن, ونكولوگيانى دەر كەزىندە انىقتاۋدىڭ ماڭىزى زور. ءبىزدىڭ قۇرال-جابدىقتارىمىز كىشىگىرىم وزگەرىستەردىڭ ءوزىن كورۋگە جانە ەمدى ءوز ۋاقىتىندا باستاۋعا مۇمكىندىك بەرەدى, دەيدى ول.
قۇرىلعانىنا ەكى جىل عانا بولعان مەديتسينالىق كەشەن از ۋاقىتتا شەبەرلىكتەرىن ۇنەمى جەتىلدىرىپ كەلە جاتقان, وزگە مەديتسينالىق مەكەمەلەردەگى ارىپتەستەرىنە دە ۇيرەتىپ جۇرگەن كاسىبي ماماندارىنىڭ ارقاسىندا ادامداردىڭ سەنىمىنە يە بولدى. ەم الۋشىلار پرەزيدەنتتىك ەمحانانىڭ ۋاقىت پەن قارجىنى ۇنەمدەي وتىرىپ, ءبىر ۋاقىتتا بىرنەشە اۋرۋدى قاتار ەمدەيتىنىن جوعارى باعالايدى. وسى ورايدا اۋرۋحانا ديرەكتورىنىڭ ەمدەۋ-دياگنوستيكالاۋ جۇمىستارى بويىنشا ورىنباسارى راۋشان قاراباەۆانىڭ ايتۋىنشا, ءار اي سايىن وتكىزىلەتىن «مەنىڭ سۇيىكتى دارىگەرىم» اكتسياسى اياسىندا جوعارى ساناتتى مامانداردىڭ قابىلداۋى, ينسترۋمەنتالدى جانە زەرتحانالىق زەرتتەۋلەر قۇنى پاتسيەنتتەرگە قولجەتىمدى بولۋ ءۇشىن تومەندەتىلىپ وتىر.
ماسەلەن, پرەزيدەنتتىك اۋرۋحانادا ەڭ ۇزدىك وفتالمولوگيالىق ورتالىقتاردىڭ ءبىرى جۇمىس ىستەيدى. وندا تەكسەرۋدەن باستاپ وپەراتسياعا دەيىنگى الدىن الۋ شارالارىنا دەيىنگى كەشەندى قىزمەت ءتۇرى كورسەتىلەدى. وسى ورتالىقتا دارىگەر ىرزىق جارىلعاسىنوۆا كوزدىڭ تورىن نىعايتۋ ادىستەمەسىن ەنگىزىپ, ونى بەلسەندى تۇردە پايدالانىپ كەلەدى. كوز تورىنىڭ ىشكى قابىعىنىڭ زاقىمدانۋى نەمەسە كورۋ قابىلەتىنىڭ ناشارلاۋى جاس ۇلعايا كەلە پايدا بولاتىن جانە مىنەز-ق ۇلىق سەبەپتەرىنە بايلانىستى الەمنىڭ ءاربىر ەكىنشى تۇرعىنىندا كەزدەسەتىن كەسەل.
«حيرۋرگيالىق نەيرو جانە رەتينوپروتەكتسيا ادىستەمەسى دەگەنىمىز – كوز قابىعىنداعى سۇيىقتىق پەن كوز الماسى اراسىنداعى كەڭىستىكتە دارىلىىك پرەپاراتتاردى (بيورەتتەۋشى پەپتيدتەر) ەنگىزۋ. بيوىنتالاندىرۋ ۇدەرىسى ءبىر عانا مارتە, جانعا باتپايتىنداي جەڭىل جۇرگىزىلەدى. باعاسى دا قولجەتىمدى, بىرنەشە ايعا ۇزارمالى تيىمدىلىگى دە بار. كوزدىڭ كورۋى ءبىر تاۋلىكتەن سوڭ جاقسارا تۇسەدى», دەيدى دارىگەر.
اۋرۋحانا ماماندارى دياگنوستيكالىق زەرتتەۋلەر مەن كونسۋلتاتسيالار وتكىزۋ بارىسىندا كەپىلدەندىرىلگەن تەگىن مەديتسينالىق كومەك كولەمى شەڭبەرىندە ستاتسيونارلىق ەمدى قاجەت ەتۋشى پاتسيەنتتەردى ىرىكتەيتىنىن, ال بۇل ساناتقا ەنبەگەن جانە ەرەكشە كۇتىمدى قاجەت ەتەتىن پاتسيەنتتەر اقىلى بولىمگە جۇگىنە الاتىنىن ايتا كەتكەن ابزال.
دۋمان اناش,
«ەگەمەن قازاقستان»
