«سىزدەر جاقسى ناتيجەلەردى ۋادە ەتكەن ەدىڭىز, بىراق ويىن سايىن كوماندانىڭ جاعدايى تومەندەپ بارادى. «اقتوبەنىڭ» ماۋسىمدى بۇلاي ناشار اياقتاۋى بۇرىن سوڭدى بولماعان. جۇلدەلى ورىنعا ۇمىتكەر كوماندالارمەن ءۇش كەزدەسۋ عانا قالدى. قازىرگى تاڭدا فۋتبول كلۋبى پرەمەر-ليگادا قالا الا ما دەگەن ماسەلە تۇر. جانكۇيەرلەردىڭ سىزدەردى قالاي قولدايتىنى وزدەرىڭىزگە ايان. ويىن ناتيجەسى الدىمەن سولارعا اسەر ەتەدى. قارجىلاندىرۋدان قيىندىق كورىپ وتىرعان جوقسىزدار, ەندەشە نەگە قورىتىندى بۇلاي؟ ءبىزدىڭ تاراپىمىزدان بارلىق قولداۋ كورسەتىلدى, بىراق تولىق بەرىلىپ جاسالعان جۇمىستى كورمەي وتىرمىز,» دەپ ءوڭىر باسشىسى رەنىشىن جاسىرمادى.
كوماندانىڭ باس جاتتىقتىرۋشىسى ۆلاديمير مۋحانوۆ تۋرنير كەستەسىندەگى ورنىندارىنا اسەر ەتكەن بىرنەشە سەبەپتەر تۋرالى ءوز ويىن ايتتى. ولاردىڭ ىشىندە كوماندا قۇرامىنىڭ اسىعىس قۇرىلۋى, ويىنشىلاردىڭ جاراقات الۋى, كلۋب مۇشەلەرىنىڭ كۇيزەلىس جاعدايىندا ويناۋعا ءماجبۇر بولۋى, جەكە دارا ويىنشىلاردىڭ دەربەس قاتەلىكتەرى بولدى.
«ارينە, ءتورت ايدىڭ ىشىندە جاعدايدى دۇرىستاۋعا بولار ەدى, الايدا ءبىز ويىنشىلاردى انىقتاۋ بارىسىندا اسىعىستىق تانىتتىق. بازالىق دايىندىق بولماعان سەبەپتى ولاردىڭ كوپشىلىگى جاراقات الىپ, قاتاردان شىعىپ قالدى. وسى ماۋسىمدا ناشار جۇمىس ىستەگەن ويىنشىلاردى اتاماي-اق قويايىن. ەڭ باستىسى, ەندى بىزگە ايقىن ماقسات جانە جان-تانىمىزبەن بەرىلىپ جۇمىس جاساۋ قاجەت», دەدى ۆ.مۋحانوۆ.
كەزدەسۋ سوڭىندا بەردىبەك ساپارباەۆ كومانداعا الداعى ويىنداردا بار كۇش-جىگەرىن جۇمساۋعا شاقىردى. كلۋبتىڭ كوماندادا بىرىگىپ, ۇيلەسىمدى جۇمىس ىستەي ءبىلۋى, تەمىردەي ءتارتىپتىڭ بولۋى كەرەكتىگىن ەسكە سالدى.
ء«بارى سىزدەرگە بايلانىستى. ەڭ باستىسى ۇتىلماۋ كەرەك! جەڭىسكە ۇمتىلىڭىز! سىزگە ساتتىلىك تىلەيمىن,» دەدى وبلىس اكىمى.
ويىنشىلار ءوز كەزەگىندە ارتىلعان ءۇمىتتى اقتاۋعا ۋادە بەردى.
تەمىر قۇسايىن,
«ەگەمەن قازاقستان»
اقتوبە
