«تاۋەلسىزدىك العان كۇننەن باستاپ پرەزيدەنت نۇرسۇلتان نازارباەۆ قازاقستانننىڭ بولاشاعى ءۇشىن ءبىلىم سالاسىنا باسا نازار اۋدارىپ كەلەدى. تاۋەلسىزدىك جىلدارى ىشىندە مىڭنان اسا مەكتەپ سالىندى. مۇنىڭ ءبارى دە وسكەلەڭ ۇرپاقتىڭ حالىقارالىق ستاندارتتارعا ساي ءبىلىم الىپ, قازاقستاننىڭ الەمنىڭ 30 دامىعان ەلدەر قاتارىنا تەزىرەك ەنۋىنە ءوز ۇلەستەرىن قوسۋى ءۇشىن جاسالۋدا. مەملەكەت باسشىسىنىڭ تاپسىرماسىنا سايكەس, وسى جىلى اقتوبە وبلىسىندا 25 مەكتەپتىڭ قۇرىلىسى ءجۇرىپ جاتىر, ونىڭ 11-ءى ەندىگى پايدالانۋعا بەرىلىپ تە قويعان. جىل سوڭىنا دەيىن تاعى ءتورت مەكتەپ اشىلادى,» دەپ اتاپ ءوتتى وبلىس اكىمى ءوزىنىڭ قۇتتىقتاۋ سوزىندە.
جاڭا مەكتەپ زاماناۋي كومپيۋتەرلەرلىك جانە كەڭسە تەحنيكاسىمەن جابدىقتالعان, وقۋشىلاردىڭ ءبىلىم الىپ, فيزيكالىق دامۋى ءۇشىن بارلىق ءتيىستى قولايلى جاعداي بار. ءۇش قاباتتى عيماراتتا سپورتتىق جانە اكت زالدارى, كىتاپحانا, جاڭا موديفيكاتسيالى وقۋ كابينەتتەرى, مەدياتەكا, قىسقى باق, دەمالىس ورىندارى مەن تاعى باسقالار بار. قۇرىلىستىڭ جالپى قۇنى - 760 ملن. تەڭگەدەن اسادى.
«بۇگىن قوبدالىقتاردىڭ جۇرەكتەرى قۋانىشقا تولى. ويتكەنى, ءبىزدىڭ بالالارىمىز ەندى وسىنداي ادەمى, زاماناۋي مەكتەپتە وقيتىن بولادى. مەن مۇندا ولاردىڭ لايىقتى ءبىلىم مەن رۋحاني تاربيە الاتىنىنا سەنىمدىمىن. بۇل وقيعا وقۋشىلار مەن ولاردىڭ اتا-انالارىنىڭ جۇرەكتەرىندە ماڭگىگە قالادى. بۇل قۋانىش, ەڭ الدىمەن, ءبىزدىڭ ەلىمىزدىڭ تاۋەلسىزدىگىنىڭ, ەلباسى نۇرسۇلتان نازارباەۆتىڭ دانا ساياساتىنىڭ ارقاسىندا مۇمكىن بولدى. مەن دە قوبدالىقتاردىڭ اتىنان بەردىبەك ماشبەك ۇلىنا پرەزيدەنت تاپسىرماسىن وڭىرىمىزدە ءمىنسىز ورىنداعانى ءۇشىن العىسىمدى بىلدىرگىم كەلەدى,» دەدى اتا-انالار مەن وقۋشىلاردىڭ جانە جۇرتشىلىق اتىنان ءسوز سويلەگەن زارداحان ابىگەي.
جاڭا وقۋ ورنىنىڭ اشىلۋىمەن ءۇش اۋىسىممەن وقۋ ماسەلەسى شەشىلدى.
«وسى كۇنگە دەيىن قوبدا اۋىلىنىڭ بارلىق 314 وقۋشىسى ءۇش اۋىسىمدا وقىپ كەلدى. ەندى ونداي ماسەلە بولمايدى. عيمارات – زاماناۋي, ادەمى. مۇندا بالالارعا جاعىمدى ءارى قىزىقتى بولىپ, ءبىلىم بەرۋ ساپاسى جاقسارادى دەپ سەنەمىن,» دەدى مەكتەپ ديرەكتورىنىڭ ورىنباسارى ءاسيا نۇرباەۆا.
قوبدا اۋدانىنا جۇمىس ساپارى بارىسىندا ءوڭىر باسشىسى جاڭا «وتان انا» جانە «ماڭگىلىك ەل» باقتارىندا بولدى. «وتان انا» باعىنىڭ بىرنەشە تاقىرىپتىق ايماقتارى بار, ولاردىڭ ءبىرى كەڭەس وداعىنىڭ باتىرى, قوبدا اۋدانىنىڭ تۋماسى ءاليا مولداعۇلوۆاعا ارنالعان. وسى جىلعى كۇزدە اتاقتى مەرگەن قىزعا بيىكتىگى ءتورت مەتر بولاتىن ەسكەرتكىش ورناتىلماق.
«ماڭگىلىك ەل» باعى دا تاقىرىپتىق ايماقتارعا بولىنگەن. مۇنداعى تاستا ۇلى وتان سوعىسىنان ورالماعان 3,5 مىڭ قوبدالىقتىڭ جانە وسى ولكەنىڭ ساياسي قۋعىن-سۇرگىننىڭ قۇربانى بولعان 300 تۋماسىنىڭ ەسىمى جازىلعان. باقتىڭ اۋماعى 13,8 مىڭ شارشى مەتر, ال ونىڭ ماڭىزدى ەرەكشەلىگى – الاڭدا ورناتىلعان 21 مەترلىك تۋ تۇعىرى بولىپ تابىلادى.
تەمىر قۇسايىن,
«ەگەمەن قازاقستان»
اقتوبە
