كوپ بالالى انالاردىڭ سانى جىلدان-جىلعا ارتىپ كەلەتىن وڭتۇستىك وڭىرىندە بۇگىنگى تاڭدا دەموگرافياعا ۇلەس قوسىپ جۇرگەن انالاردىڭ سانى 159729-عا جەتىپ وتىر. ونىڭ ىشىندە 5618 باتىر انا بولسا, 23920 انا «التىن القا», 34806 ايەل «كۇمىس القا» يەگەرى. ال, 7928 انا ءى-ءىى دارەجەلى انا داڭقى وردەن يەگەرى, 87457 ازاماتشا 18 جاسقا دەيىنگى ءتورت جانە ودان كوپ بالاسى بار انالاردىڭ قاتارىن تولىقتىرعان.
كوپ بالالى انالار قاتارى بويىنشا كوشتى باستاپ تۇرعان شىمكەنت قالاسىنىڭ تۇرعىندارى. وبلىس ورتالىعىنداعى انالاردىڭ سانى – 19278. شىمكەنتتەن كەيىنگى ورىندا سارىاعاش پەن ماقتاارال اۋداندارى. سارىعاشتاعى 13306 التىن قۇرساقتى انا بولسا, ماقتاارالدا 11282 ازاماتشا كوپ بالالى رەتىندە تىركەلگەن. وسىلايشا, كوپ بالالى نازىك جاندىلار كوشىن تۇركىستان, سايرام, ورداباسى, قازىعۇرت, تولەبي, شاردارا, تۇلكىباس, ارىس, بايدىبەك, كەنتاۋ قالاسى مەن وتىرار, سوزاق اۋداندارىنىڭ اق جەلەكتى, التىن قۇرساقتى انالارى جالعايدى.
وڭتۇستىك قازاقستان وبلىسىندا وسى جىلدىڭ سەگىز ايىندا 50627 ءسابي تۋىلعان. دۇنيە ەسىگىن اشقان نارەستەلەردىڭ ىشىندە 514-ءى ەگىز بولسا, 3-ءۋى ۇشەم.
ەلىمىز تاۋەلسىزدىگىن العاننان كەيىن دەنساۋلىق ساقتاۋ سالاسىن قارجىلاندىرۋدى ارتتىرۋ ەسەبىنەن جاڭا مەديتسينالىق مەكەمەلەر سالىندى.ماتەريالدىق-تەحنيكالىق جابدىقتاۋ جاقساردى. زاماناۋي قۇرال-جابدىقتار مەن قوندىرعىلار وبلىس ورتالىعىندا عانا ەمەس, اۋداندار مەن قالالاردا ورناتىلدى. وسىنىڭ ناتيجەسىندە, وڭىردە انا مەن بالا ءولىمى ازايىپ, تۋ كورسەتكىشى ارتىپ كەلەدى.
