ونىڭ ايتۋىنشا, وبلىستا بيىل تۋريزم سالاسىنىڭ قارقىندى دامۋى بايقالادى. وتكەن جىلمەن سالىستىرعاندا تۋريستىك نىساندار سانى 31 پايىزعا ءوسىپ, 195-ءتى قۇراعان. ال ولاردا 1,7 ملرد.تەڭگەنىڭ كولەمىندە قىزمەتتەر كورسەتىلىپ, قىزمەتتەر كولەمى 43 پايىزعا جەتكەن.
«ەندى ىشكى ءتۋريزمدى دامىتۋعا بارىنشا كوڭىل اۋدارىپ جاتىرمىز. وڭتۇستىككە كەلۋشى تۋريستەرگە قولايلى جاعداي جاساۋ ماقساتىندا وبلىستا 1, 2 جانە 3 كۇندىك تۋريستىك مارشرۋتتار ازىرلەنگەن. اتالعان مارشرۋتقا 84 تاريحي-مادەني وبەكتىلەر مەن تابيعي ورىندار ەنگىزىلدى. جالپى وڭىرىمىزدە 800-دەن استام تاريحي جانە مادەني ەسكەرتكىشتەر ورنالاسقان. وسى رەتتە, وبلىس ءتۋريزمىن دامىتۋ ماقساتىندا بىرقاتار ماڭىزدى جوبالار جۇزەگە اسىرىلۋدا»,- دەدى ب.قۇرمانسەيىت.
باسقارما باسشىسىنىڭ مالىمدەۋىنشە, شىمكەنتتىڭ ەسكى قالاشىعى اۋماعىندا اشىق اسپان استىنداعى مۇراجاي اشۋ, ءابۋ ناسىر ءال-فارابي دۇنيەگە كەلگەن وقسىز قونىسىن جانە ابىلاي حاننىڭ ورداسى ورنالاسقان حانقورعاندى قالپىنا كەلتىرۋ, قازىعۇرت جانە ورداباسى اۋداندارىندا الەمدىك ستاندارتقا سايكەس سەرۆيسى مەن تۋريستىك ينفراقۇرىلىمى بار برەندكە اينالدىرۋ, قوجا احمەت ياسساۋي كەسەنەسىنە كەلەتىن وتاندىق جانە شەتەلدىك تۋريستەردىڭ اعىمىن ەسكەرە وتىرىپ, ونىڭ تاريحىن جانە ايماعىن الەمدىك مۇراجايلار ۇلگىسىندە اۋديو-ۆيدەو ۆيزۋاليزاتسيالاۋ, ورتا عاسىردا وتىرار كونە قالاشىعى مەن ارىستانباپ كەسەنەسىن بايلانىستىرعان جولدى قالپىنا كەلتىرە وتىرىپ, سول جول بويىندا ۇلتتىق قولونەر شەبەرحانالارىن ورنالاستىرۋ جوسپارلانۋدا.
