ءورت اقش-تىڭ ءجۇزىم القابىن جايلاعان. قازىرگى ۋاقىتتا ءورت سوندىرۋشىلەر شتاتتا تابيعي اپاتتىڭ 22 ءىرى وشاعىن انىقتادى. مالىمەتتەرگە سايكەس شامامەن 700 شارشى شاقىرىم جەر قىزىل جالىنعا ورانعان. جەرگىلىكتى بيلىك قۇتقارۋشىلار توبى ءالى بىرقاتار اۋدانعا جەتە الماي وتىرعانىن حابارلادى.
ورمان ورتىنەن ناپا, سونوما جانە يۋبا وكرۋگتەرىنە توتەنشە جاعداي رەجىمى ەنگىزىلدى. جەرگىلىكتى بيلىك مۇنى كاليفورنيا تاريحىنداعى ەڭ ۇلكەن ءورت دەپ ساناپ وتىر. وسىنىڭ سالدارىنان 20 مىڭ تۇرعىن باسپانالارىن تاستاپ كەتۋگە ءماجبۇر بولدى. سونىمەن قاتار شامامەن 1500 قۇرىلىسقا زيانى ءتيدى.
«الاپات ءورت كوپتەگەن قۇرىلىسقا زيانىن تيگىزدى. ءالى مىڭعا جۋىق ءۇي قىزىل جالىنعا ورانۋى مۇمكىن. وسىعان بايلانىستى مىڭداعان تۇرعىن قاۋىپسىز ايماققا كوشىرىلۋى قاجەت», دەدى كاليفورنيا شتاتىنىڭ گۋبەرناتورى دجەرري براۋن.
بىرەر كۇن بۇرىن ونداعان جۇمىسشى تىكۇشاقپەن ەۆاكۋاتسيالانعان. ناپا جەرىندەگى ءجۇزىم القابى ايگىلى ادامدارعا تيەسىلى. ولاردىڭ قاتارىندا اكتەر ءارى مۋزىكانت دەيۆ مەتتيۋس, كينورەجيسسەر فرەنسيس فورد كوپپول بار. تابيعي اپاتتىڭ سالدارىنان كوپتەگەن شاراپ دايىندايتىن ورىندار جۇمىستارىن توقتاتۋعا ءماجبۇر بولدى.
ءورتتىڭ ورشۋىنە قاتتى جەل, قۇرعاق اۋا جانە اپتاپ ىستىق سەبەپ بولىپ وتىر. مالىمەتتەرگە سايكەس كەي تۇستاردا جەلدىڭ جىلدامدىعى ساعاتىنا 80 شاقىرىمدى قۇراعان.
