قالانىڭ قوناقجايلىعىن كوتەرۋ ماقساتىندا «جاس اتامەكەن» جاس كاسىپكەرلەر كلۋبىنىڭ «كرەاتيۆتەر» باستاماشىل توبى جاساعان QR-كود ورناتۋعا ارنالعان جوبا ۇزدىكتەر قاتارىنان تابىلدى. ونى نۇربانكتىڭ قوستاناي وبلىستىق فيليالى قارجىلاندىرىپ, قالاداعى 30 ەسكەرتكىش پەن تاريحي عيماراتقا «قوستانايدى تانى» QR-كودىن ورناتتى.
– «جاس اتامەكەن» جاس كاسىپكەرلەر كلۋبىنىڭ «كرەاتيۆتەر» توبى جوباسىنىڭ ماقساتى – جەرلەستەرىمىزدىڭ, قالا قوناقتارىنىڭ تۋعان جەر تاريحىن جاقسى ءبىلۋى ءۇشىن ۋاقىت تالابىنان قالماي, جاڭا فورماتتا جەدەل ارەكەت ەتەتىن يننوۆاتسيالىق قۇرىلعىلار مەن تەحنولوگيالاردى پايدالانۋ. QR-كود ولكەمىزدىڭ تاريحىن ناسيحاتتاۋعا, ونى جاس بۋىننىڭ جاقسى بىلۋىنە مۇمكىندىك بەرەدى, – دەدى وبلىستىق ىشكى ساياسات باسقارماسىنىڭ مامانى ابىلاي كاكەنوۆ.
باستاماشىل توپ قالاداعى قاسيەتتى ورىندار تۋرالى ءۇش تىلدە جازىلعان QR-كودتى احمەت بايتۇرسىن ۇلى ەسكەرتكىشىنەن باستاپ, 30 تاريحي ورىنعا جابىستىردى. ونى اركىم تەلەفونىنا سكانەرلەۋ ارقىلى ءتۇسىرىپ الادى دا, تاريحي ەسكەرتكىش نەمەسە عيمارات تۋرالى اقپارات الۋىنا بولادى.
– ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» ماقالاسىندا جاستاردىڭ تۋعان ولكە تاريحىن ءبىلۋى ولاردىڭ بويىندا ەلگە, جەرگە دەگەن پاتريوتتىق سەزىمدى تاربيەلەيتىنى ايتىلدى. «تۋعان جەر» باعدارلاماسى دا وسى ايتىلعان ويدى جۇزەگە اسىرۋعا باعىتتاعان. ءبىز, جاس كاسىپكەرلەر يگى ىسكە اتسالىسۋدى, وعان ءوز ۇلەسىمىزدى قوسۋدى ويلادىق. سوندىقتان ءوز باستامامىزبەن الەۋمەتتىك جوبالار جارمەڭكەسىنە قاتىستىق. ءبىزدىڭ جوبامىز كۇندەلىكتى قاراپايىم كورىنىستەن تۇرادى دەسەك بولادى. قازىر جاستاردىڭ قولىنان تەلەفون تۇسپەيدى, ولار ارۋاقىتتا ونلاين-رەجىمدى پايدالانادى. كەز كەلگەن ادام سمارتفونىمەن QR-كود ارقىلى ءبىز جاساعان knowkostanay.kz پورتالىنا كىرىپ, قالا تاريحىنان حاباردار بولا الادى, – دەدى «جاس اتامەكەن» جاس كاسىپكەرلەر كلۋبىنىڭ جەتەكشىسى زارينا كوكجانوۆا.
«كرەاتيۆتەر» توبى مۇشەلەرىنىڭ ايتۋىنشا, مۇنداي باستاما ولارعا استانادا وتكەن حالىقارالىق ەكسپو-2017 كورمەسىنەن كەيىن كەلىپتى. قازىر ەلىمىزدىڭ قاي قالاسىنا بولسا دا شەتەلدىكتەردىڭ كەلۋى تاڭسىق ەمەس. ولار كوپ ۋاقىتىن جوعالتپاي-اق QR-كود ارقىلى قالامىز تۋرالى اقپاراتتارعا قانىق بولادى. بۇل ولكەمىزدە ءتۋريزمدى دامىتۋعا دا سەپتىگىن تيگىزەدى. «جاس اتامەكەن» جاس كاسىپكەرلەر كلۋبى بۇل جوباعا تەك بانك پەن وبلىستىق مادەنيەت باسقارماسىن عانا ەمەس, قالاداعى «سيتي تاكسي» جولاۋشىلار تاسىمالىمەن اينالىساتىن كاسىپورىندى دا تارتىپتى. قالا تۇرعىنى نەمەسە قالا قوناعى QR-كود ارقىلى تاكسي شاقىرا الادى. مىنە, ۋاقىت اعىمىنا ىلەسۋ دەگەن وسى بولار.
ء نازيرا جارىمبەت,
«ەگەمەن قازاقستان»
قوستاناي
