ءتورت بالاباقشا مەن 8 مەكتەپ, 16 قاباتتى تۇرعىن ءۇي جىلۋسىز قالعان. بۇدان تىسقارى ءۇش شاعىن اۋداندا وسىنداي كەلەڭسىز وقيعالار تىركەلگەن. ورىن العان توتەنشە جاعدايدان كەيىن وبلىس اكىمىنىڭ ورىنباسارى انتون فەدياەۆ, قالا اكىمى مارات تاسماعانبەتوۆ, «پەتروپاۆل جىلۋ جەلىلەرى» جشس-ءنىڭ باس ديرەكتورى يگور رىباس شۇعىل تۇردە ءباسپاسوز ءماسليحاتىن وتكىزىپ, قىسقا ازىرلىكتىڭ ويداعىداي ءوتىپ جاتقانىن حابارلاپ, تۇرعىنداردى سابىرعا شاقىرۋعا, تىنىشتاندىرۋعا تىرىستى.
ولاردىڭ مالىمەتتەرىنە قاراعاندا, جىلۋ بەرۋ 25 قىركۇيەكتەن باستالىپ, 1061 كوپ قاباتتى تۇرعىن ءۇيدىڭ 732-ءسى جىلۋ جۇيەسىنە قوسىلعان. جىلۋ ەلەكتر ورتالىعىنا 226 مىڭ توننا كومىر مەن 572 توننا مازۋت قورى جيناقتالعان. بريفينگتە جەر استىنداعى جىلۋ جۇيەسى ماگيسترالىنىڭ زاقىمدانىپ, جولدىڭ اياقاستى وپىرىلىپ تۇسۋىنە قىسىمنىڭ كوبەيتىلگەنى باستى سەبەپ رەتىندە العا تارتىلدى. قىسىم ءداستۇرلى 40 گرادۋستان 74 گرادۋسقا دەيىن كوتەرىلىپ, سالدارىنان قۇبىرلاردىڭ وسال تۇستارى سىر بەرسە كەرەك. سەرىكتەستىكتىڭ قىزمەتىن 68 مىڭ جەكە سەكتور مەن 2224 وندىرىستىك, بيۋدجەتتىك, كوممەرتسيالىق ابونەنتتەر تۇتىنادى. الايدا ەۋروپا قايتا قۇرۋ جانە دامۋ بانكىنەن 4,5 ميلليارد تەڭگە نەسيە العانىنا, «نۇرلى جول» باعدارلاماسى بويىنشا مەملەكەتتىك دەمەۋقارجى بەرىلگەنىنە قاراماستان جىلۋ تاراتاتىن توراپتىڭ 80 پايىزدايى كۇردەلى جوندەۋدى قاجەت ەتەدى.
دەسەك تە, وبلىس اكىمدىگىندە وتكەن وتىرىستا ايماق باسشىسى قۇمار اقساقالوۆ جىلىتۋ ماۋسىمىنا دايىندىقتىڭ سىن كوتەرمەيتىنىن اتاپ كورسەتتى. «جاس وركەن» شاعىن اۋدانى, جامبىل كوشەسى, جاستار سارايى, «سوكول» ساۋدا ءۇيى ماڭىنداعى كوپ قاباتتى تۇرعىن ۇيلەر, «يۆۋشكا», «سولنىشكو» بالاباقشالارى جىلۋسىز وتىر. ءتيىستى باسشىلارعا ساقاداي-ساي ازىرلىك شارالارىن 1 قازانعا دەيىن اياقتاۋ جۇكتەلگەنىمەن, جىلۋ كەستەدەن كەشىكتىرىلىپ بەرىلگەن. بىرقاتار شاعىن اۋدانداردا قالىپتى تەمپەراتۋرالىق رەجىم جوق. ماگيسترالدى قۇبىرلار گيدراۆليكالىق سىناقتارعا توتەپ بەرە الماعان.
قاراجات شىلدە ايىندا قولدارىڭىزعا ءتيدى. جۇمىستى ەكى اۋىسىمدا ۇيىمداستىرۋ نەگە تالاپ ەتىلمەدى؟ ءار ۇيگە جىلۋ بەرۋ كەستەسىنىڭ تۇرلىشە قۇرىلۋى دا تۇسىنىكسىز. سينوپتيكتەردىڭ قىستىڭ ەرتە تۇسەتىنى جايلى ەسكەرتۋىنە قۇلاق اسپاۋدىڭ, جالعان سويلەۋدىڭ اقىرى وسىنداي كەلەڭسىزدىكتەرگە سوقتىرىپ وتىر, دەي كەلىپ, قۇمار ىرگەباي ۇلى جىلىتۋ ماۋسىمىنا ءتيىستى باقىلاۋ جۇرگىزبەگەنى جانە دايىندىق جۇمىستارىن قاجەتتى دەڭگەيدە ۇيىمداستىرماعانى ءۇشىن ورىنباسارى ا.فەدياەۆكە, قالا اكىمى م. تاسماعانبەتوۆكە سوگىس جاريالادى. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى تاسمۇرات قاتقاداموۆقا قىزمەتىنە تولىق سايكەس ەمەستىگى ەسكەرتىلدى.
وتىرىستا ع.مۇسىرەپوۆ اۋدانىندا كوپ قاباتتى ۇيلەردەن قازاندىقتاردى سىرتقا شىعارۋ سىلبىر اتقارىلىپ جاتقانى, تيميريازەۆ اۋدانىندا بيۋدجەتتىك ۇيىمدار كومىرمەن تولىق قامتىلماعانى, سەرگەەۆكا قالاسىندا مادەنيەت ۇيىنە جىلۋ قازاندىعى ءالى ورناتىلماعانى اتاپ كورسەتىلىپ, ولقىلىقتاردى شۇعىل تۇزەتۋ مىندەتتەلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
