تاياۋدا ن.گوگول اتىنداعى قاراعاندى وبلىستىق امبەباپ عىلىمي كىتاپحاناسىندا وتكەن «كىتاپحاناعا لاتىن الىپبيىندەگى كىتاپ سىيلا!» اكتسياسى وسى جۇمىستاردىڭ جەمىستى جالعاسى بولدى.
اكتسيا اياسىندا كىتاپحانا قورىنا لاتىن قارپىندەگى العاشقى كىتاپ سىيلىققا تابىس ەتىلدى. قۇندى جادىگەر – 1939 جىلى الماتى قالاسىنىڭ «كازاحستانسكوە يزداتەلستۆو حۋدوجەستۆەننوي ليتەراتۋرى» باسپاسىندا جارىق كورگەن «باتىرلار» دەگەن كىتاپ.
اتالمىش شاراعا رۋحاني بايلىقتى كەلەسى ۇرپاققا مۇرا ەتىپ قالدىرۋ ءۇشىن الماتى قالاسىنان اتامەكەنىنە دەگەن ساعىنىشىن ارقالاپ كەلگەن كىتاپ يەلەرى, بەلگىلى ونەرتانۋشى بايان بارمانقۇلوۆا مەن «الەۋمەتتىك مەكەمەلەردىڭ تۇلەكتەرىن بەيىمدەۋ جانە قولداۋ ورتالىعى» «جاستار ءۇيى» كمم ديرەكتورى ءلاززات شايكەنوۆا جانە قارقارالى اۋدانى قاسىم اۋىلىنىڭ مەكتەپ ديرەكتورى ماقسات وسپانقۇلوۆ.
بايان كارىبايقىزى ءراسىم بارىسىندا قاتتى تولقىپ, «اكەدەن قالعان قازىنا ەل يگىلىگىنە جاراپ جاتسا, ودان اسقان باقىت بار ما؟» دەپ جاستاردى جالپى كىتاپ وقۋعا شاقىردى.
ال وسى كىتاپتىڭ ەل يگىلىگىنە اينالۋىنا ۇلكەن سەبەپشى بولعان ماقسات زەينەل ۇلى اتالمىش باسىلىمدى نەمەرە اپاسىنىڭ 1990 جىلى وتباسىلىق سىي رەتىندە وزىنە ۇسىنعانىن ايتىپ, كىتاپتىڭ قۇندىلىعىنا ساي بۇگىنگى كۇنگە دەيىن ونىڭ مەكتەپتىڭ مۇراجايىندا بولعانىن جەتكىزدى. اكتسيا جايلى ەستي سالىسىمەن كىتاپتى ايماعىمىزدىڭ باس كىتاپحاناسىنا بەرۋگە شەشىم قابىلداپ, الماتىداعى تۋعان-تۋىستارىمەن اقىلداسقان. ماقسات زەينەل ۇلىنىڭ ءسوزىن ءلاززات شايمۇراتقىزى دا قۋاتتاپ, «قاراعاندى حالقى ەندى وسى كىتاپقا قول جەتكىزەتىنى ءبىزدى ۇلكەن قۋانىشقا بولەيدى», دەدى.
اتادان قالعان اسىل قازىنا وبلىستىق كىتاپحانانىڭ «سيرەك جانە قۇندى كىتاپتار» قورىن تولىقتىرىپ, لاتىن الىپبيىندەگى كىتاپ قورىنىڭ العاشقى كىرپىشىن قالادى دەسەك, ارتىق ەمەس.
وسى كەشكە كارىباي بارمانقۇلوۆتىڭ تالىمگەرى, بۇگىنگى كۇنى زەينەتكەر نۇربانۋ بىحينا ارنايى كەلىپ, قىزدار مەملەكەتتىك ۋنيۆەرسيتەتىندە ءوزىنىڭ ۇستازى بولعان كارىباي بارمانقۇلوۆ جايلى ءبىراز ەستەلىكتەر ايتتى.
ال «بولاشاق» اكادەمياسىنىڭ قازاق ءتىلى جانە ادەبيەتى كافەدراسىنىڭ مەڭگەرۋشىسى قۇرمانعازى سەمبيەۆ بولسا «باتىرلار» كىتابىنىڭ ءوز ستۋدەنتتەرىنە ءبىلىم بەرۋدە ۇلكەن كومەكشى قۇرال ەكەنىن قۋانىشپەن حابارلادى.
كىتاپحانا قورى قۇندى كىتاپپەن تولىقتى. كىتاپحاناشىلار قاۋىمى «بۇل يگى ءىس – باستامانىڭ تەك باسپالداعى عانا» دەپ سەنىممەن ايتىپ وتىر.
ميراس اسان,
«ەگەمەن قازاقستان»
قاراعاندى وبلىسى
