ءۇيد باعدارلاماسى بويىنشا ەلىمىزدە وزىق تەحنولوگيالارعا نەگىزدەلگەن بىرقاتار جاڭا ءوندىرىس ورىندارى اشىلدى. مىنە, وسىعان بايلانىستى سول زاماناۋي ءوندىرىس ورىندارىندا جۇمىس ىستەيتىن ءوزىمىزدىڭ بىلىكتى جۇمىسشى كادرلارىنىڭ جوقتىعى انىق كورىندى.
جەرگىلىكتى جاستاردىڭ وسى زاۋىت-فابريكالارعا كەلىپ جۇمىسقا ورنالاسۋى ءۇشىن قاجەتتى مۇمكىندىكتەر جاسالماعان. ولار بىلىكتىلىگى جوعارى كاسىبي جۇمىسشى ماماندىعىن يگەرگەننەن گورى قارا بازارلارداعى جۇك تاسيتىن اۋىر جۇمىسقا جەگىلگەندى وڭاي كورەدى. ەلىمىزدەگى كاسىپتىك-تەحنيكالىق ءبىلىم سالاسىنىڭ ەكونوميكالىق ومىردەن سىرت قالۋى, ەڭبەك رىنوگى مەن كاسىپتىك وقۋ جۇيەسى اراسىنداعى بايلانىستىڭ ءۇزىلۋى, جۇمىسشى ماماندارىن دايارلاۋشىلار مەن جۇمىس بەرۋشىلەر اراسىندا ءبىر ماقسات جولىنداعى ورتاق كەلىسىمنىڭ بولماۋى وسىنداي كەلەڭسىزدىكتەرگە جول بەرىپ, ۋاقىت تالابىنا ساي تەحنيكالىق بەيىمى جوعارى كاسىبي جۇمىسشىلار دايارلاۋدى تىعىرىققا تىرەدى.
وسىعان بايلانىستى ەلباسى نۇرسۇلتان نازارباەۆ 2015 جىلعى جەلتوقسان ايىندا قازاقستان حالقىنا جولداۋىندا «الەۋمەتتىك ساياساتتاعى مەملەكەتتىڭ باسىمدىعى ادام كاپيتالىن دامىتۋعا كەڭ اۋقىمدى ينۆەستيتسيالار بولۋى ءتيىس. مەن 2017 جىلدان باستاپ جاڭا جوبا – «بارشاعا ارنالعان تەگىن كاسىپتىك-تەحنيكالىق ءبىلىم» باعدارلاماسى باستالاتىنىن جاريالايمىن», دەپ اتاپ كورسەتتى. ءسويتىپ ەلىمىزدە تەگىن كاسىپتىك-تەحنيكالىق ءبىلىم بەرۋ جۇيەسىن ەنگىزۋ اياسىندا ەڭبەك رىنوگىنا قاجەتتى جۇمىسشى كادرلاردى دايارلاۋدىڭ ۇلەسىن ارتتىرۋدا بەتبۇرىس باستالدى. تەحنيكالىق جانە كاسىپتىك ءبىلىم بەرۋ ۇيىمدارىنىڭ باستى ماقساتى ەڭبەك نارىعىنا قاجەتتى مامانداردى دايارلاۋ, ولاردىڭ بىلىكتىلىگىن شىڭداۋعا باعىتتالعان شارالاردى ءىس-جۇزىنە اسىرۋ بولىپ تابىلادى.
مەملەكەت باسشىسىنىڭ باستاماسىمەن بيىلعى جىلى ءىس جۇزىنە اسىرىلا باستاعان جوبا ەكى باعىت بويىنشا قولعا الىندى. ءبىرىنشى – جۇمىسشى ماماندىعىن يگەرۋگە نيەت بىلدىرگەندەردىڭ بارلىعىنىڭ ءوتىنىشىن قاناعاتتاندىرۋ ءۇشىن جەرگىلىكتى بيۋدجەتتەر ەسەبىنەن وقىتۋ. بۇعان قىزمەت كورسەتۋ سالاسىنىڭ, اۋىل شارۋاشىلىعىنا تەحنيكالىق جانە تەحنولوگيالىق قىزمەت كورسەتۋ سالالارىنىڭ ماماندارىن دايارلاۋ كىرەدى. بيىلعى جىلى وسى باعىتتا مەملەكەتتىك تاپسىرىس بويىنشا 79,5 مىڭ ادام كاسىپتىك ءبىلىم بەرۋ ورىندارىنا قابىلداندى. ەكىنشى باعىت بويىنشا رەسپۋبليكالىق بيۋدجەت ەسەبىنەن 2017-2021 جىلدار ارالىعىندا جۇمىسپەن قامتۋدى جانە بۇقارالىق كاسىپكەرلىكتى دامىتۋ باعدارلاماسى شەڭبەرىندە كاسىپتىك وقىتۋ جۇيەسى جۇمىس ىستەي باستادى. بۇل ورايدا, تەحنيكالىق جانە بىلىكتى كاسىبي جۇمىسشىلار دايارلاۋعا باسىمدىق بەرىلەدى.
وسى ۋاقىتقا دەيىن ءبىزدىڭ كاسىپتىك-تەحنيكالىق ءبىلىم بەرۋ كوللەدجدەرى 80 پايىز ورتا دارەجەدەگى مامان كادرلار جانە 20 پايىز كاسىبي جۇمىسشى ماماندارىن دايارلاۋمەن اينالىسىپ كەلگەن. بيىلعى جىلى باعدارلاما اياسىندا بۇل ماسەلەنى تۇبەگەيلى وزگەرتۋگە مۇمكىندىك تۋدى. ەگەر بۇرىن ستۋدەنتتەر كوللەدجدەردە 2 جىل 10 اي وقىپ, ءبىر عانا ماماندىق الىپ شىعاتىن بولسا, ەندى وسى مەرزىمدە ءۇش ماماندىق بويىنشا كاسىبي جۇمىسشى دارەجەسىن مەڭگەرىپ شىعادى. ەندى ەلىمىزدىڭ ەڭبەك رىنوگى بىرنەشە ماماندىقتى يگەرە الاتىن كاسىبي جۇمىسشىلارمەن تولىعاتىن بولادى. بۇل كاسىبي تەحنيكالىق ءبىلىم بەرۋ سالاسىندا مودۋلدىك وقىتۋ باعدارلاماسىن ەنگىزۋدىڭ ارقاسىندا مۇمكىن بولدى. ءبىلىم جانە عىلىم ۆيتسە-ءمينيسترى اسحات ايماعامبەتوۆتىڭ ايتۋىنشا, ەندى ەلىمىزدەگى كاسىپتىك-تەحنيكالىق ءبىلىم بەرەتىن وقۋ ورىندارىنىڭ باعدارلامالارى جۇمىس بەرۋشىلەردىڭ كەلىسىمىمەن جانە ولاردىڭ تالاپتارىن ەسكەرە وتىرىپ جاسالاتىن بولادى. باعدارلامانىڭ تاعى ءبىر ارتىقشىلىعى, ول ەلىمىزدىڭ بارلىق وڭىرلەرىنىڭ شالعاي ەلدى مەكەندەرىندەگى جاستاردى مولىنان قامتۋعا باعىتتالعان. وسىعان بايلانىستى رەسپۋبليكا بويىنشا 1855 موبيلدىك توپ قۇرىلدى.
ونىڭ قۇرامىنا كوللەدجدەردىڭ وقىتۋشىلارى, اۋىلدىق اكىمدىكتەردىڭ وكىلدەرى, ۋچاسكەلىك ينسپەكتورلار جانە جاستار ۇيىمىنىڭ وكىلدەرى كىرەدى. ولار شالعاي ەلدى مەكەندەردى ارالاپ, ماماندىعى جوق جۇمىسسىز جاستاردى وقۋعا تارتادى. وسى شارانىڭ ارقاسىندا ۇستىمىزدەگى جىلى 24,8 مىڭ ادام كاسىپتىك-تەحنيكالىق ءبىلىم بەرۋ جۇيەسىنە تارتىلدى.
باعدارلاما بويىنشا سۇرانىسى جوعارى بولاشاقتىڭ ماماندىقتارىنا دا باسىمدىق بەرىلۋدە. ماسەلەن, شىعىس قازاقستان وبلىسىنىڭ كاسىپتىك-تەحنيكالىق ءبىلىم بەرەتىن وقۋ ورىندارىندا 7 جاڭا ماماندىقتى وقىتۋ باستالدى. الداعى ۋاقىتتا قاراعاندى وبلىسىندا بۇرىن ەڭبەك رىنوگىندا بەلگىسىز بولىپ كەلگەن 15 جاڭا ماماندىق بويىنشا كادرلار دايارلاۋ قولعا الىنباق. قازىرگى تاڭدا جوعارى سۇرانىسقا يە بولىپ وتىرعان ماماندىقتىڭ ءبىرى مەحاترونيكا بولىپ تابىلادى. وزىق تەحنولوگيالار كوپتەپ قولدانىسقا ەنگىزىلە باستاعان ەكونوميكامىز ينتەللەكتۋالدى مامانداردى كوپتەپ قاجەت ەتە باستادى. ەرتەڭگى ينتەللەكتۋالدى بولاشاق ماماندىعىنىڭ نەگىزى تۇعىرى – جان-جاقتى ساپالى ءبىلىم. ەلىمىزدە بيىلعى جىلدان باستاپ كەڭىنەن قولعا الىنعان بارشاعا ارنالعان تەگىن كاسىپتىك-تەحنيكالىق ءبىلىم باعدارلاماسىنىڭ دا باستى ۇستانىمى ءبىلىمدى دە بىلىكتى جۇمىسشى ماماندارىن دايارلاۋ بولىپ تابىلادى.
