داۆيد اگوپيان سۋرەتتى رەسەيدىڭ سوچي قالاسىندا ءوتىپ جاتقان تمد-عا مۇشە مەملەكەتتەر باسشىلارىنىڭ كەڭەسى باستالار الدىندا تۇسىرگەن. فوتوگراف بۇل سۋرەتتىڭ ەشقانداي وڭدەۋدەن وتپەگەنىن ايتتى.
«بۇل بولمەگە كىرگەن كەزدە, جارىق جوعارىدان ادام باسىنا تۇسەدى. فوتواپپارات دياگفراگماسىن جاپساڭ, سۋرەتتە ورتادا تۇرعان ادام عانا كورىنەدى. سوچي ۋاقىتى بويىنشا 20:30-دا ءتۇسىردىم», دەيدى اگوپيان.
سونىمەن قاتار, فوتوگراف بۇل سۋرەتتى تۇسىرۋگە ءبىر جىل بويى دايىندالعانىن جەتكىزىپ, ورتادا سەرج سارگسياندى بەينەلەگىسى كەلگەنىن ايتتى.
«ارمەنيا پرەزيدەنتىن ءتۇسىرۋ ءۇشىن ارنايى كۇتىپ تۇر ەدىم. ءسويتىپ نۇرسۇلتان نازارباەۆتى ءتۇسىردىم. جالپى سۋرەتكە ءتۇسىرۋ بارىسىندا كۇزەتشىلەر مەن وزگە قىزمەتكەرلەر كەدەرگى كەلتىرمەسە – ۇلكەن ساتتىلىك. بولمەگە ءبىرىنشى بولىپ قازاقستان پرەزيدەنتى, ارتىنان ۆلاديمير پۋتين, كەيىن سەرج سارگسيان كىردى. سول ساتتە 10-15 كادر ءتۇسىردىم.
نۇرسۇلتان نازارباەۆ - تمد اقساقالى. ونىڭ كوزقاراسى وتكىر, ال ءجۇرىسى ساليقالى. سوندىقتان بۇل سۋرەت وتە ادەمى شىقتى. ارمەنيا پرەزيدەنتىنىڭ فوتوگرافى بولىپ ىستەگەن 7 جىلدىق تاجىريبەمدە نۇرسۇلتان نازارباەۆتىڭ ءبىرشاما سۋرەتتەرى جينالدى. بىراق بۇل سۋرەتتىڭ ورنى ەرەكشە ەكەنى ايدان انىق», دەيدى فوتوگراف.
بۇل سۋرەت الەۋمەتتىك جەلىلەردە بەلسەنە تاراپ جاتقانىن ايتا كەتكەن ءجون. فوتوگرافتىڭ مالىمدەۋىنشە, ونىڭ فەيسبۋكتەگى پاراقشاسىنا قازاقستاندىقتار كوپتەپ دوستىق ۇسىنۋدا.
