11 اۋدان مەن وبلىس ورتالىعىنداعى 9 الەۋمەتتىك مەكەمە قاتىسقان شارادا سويلەگەن سوزىندە ءوڭىر باسشىسىنىڭ ورىنباسارى اسقار ساقىپكەرەەۆ مۇمكىندىگى شەكتەۋلى ادامدارعا مەملەكەت پەن قوعام تاراپىنان جان-جاقتى قامقورلىق كورسەتىلەتىنىن, ونىڭ ءبىر مىسالىنا بيىل «الەۋمەتتىك جوبالار بايقاۋى ۇيىمداستىرىلعانىن, وعان جەرلەستەرىمىزدىڭ بەلسەنە اتسالىسقانىن جەتكىزدى. ولاردىڭ اراسىندا تاعدىر تالكەگىنە ۇشىراسا دا, جىگەرى جاسىماعان, بەلگىلى ءبىر كاسىپتى ۇرشىقشا ءۇيىرىپ جۇرگەن ازاماتتار كوپتەپ سانالادى.
ماسەلەن, بيىل ەلىمىز بويىنشا وتكىزىلگەن الەۋمەتتىك جوبالار بايقاۋىنا قاتىسقان جەرلەسىمىز ءۋاليحان ىبىراەۆ ىنتالاندىرۋ سىيلىعىنا يە بولدى. 32 جاستاعى پەتروپاۆلدىق ءتۋابىتتى مۇگەدەكتەر ءۇشىن ارنايى جىلجىمالى مونشا جاساپ شىعارعان.
شىعارماشىلىق فەستيۆال شەڭبەرىندە قالا مەن اۋدانداردان كەلگەن قاتىسۋشىلار ءوز ونەرلەرىن ورتاعا سالدى. اۋەلەتە ءان شىرقاپ, مىڭ بۇرالا بيلەپ, كورەرمەندەردىڭ قوشەمەتىنە بولەندى. ۆوكال, حورەوگرافيا, كوركەمسوز, اسپاپتى جانە دەكوراتيۆتى-قولدانبالى شىعارماشىلىق اتالىمدار بويىنشا ۇزدىكتەر انىقتالدى. «قازاق زاعيپتار قوعامىنىڭ» وبلىستىق فيليالى, ەستۋ كەمىستىگى بار بالالارعا ارنالعان ينتەرنات ءۇيى, پەتروپاۆل الەۋمەتتىك قىزمەت كورسەتۋ بالالار ورتالىعى, تىرەك-قيمىل اپپاراتى زاقىمدانعاندارعا ارنالعان ينتەرنات ءۇيى, تايىنشا الەۋمەتتىك قىزمەت كورسەتۋ ورتالىعىنىڭ ونەرلى ۇجىمدارى ديپلومدارمەن, باعالى سىيلىقتارمەن ماراپاتتالدى.
ءسوز اراسىندا ەستۋ قابىلەتى ناشار بالالاردان قۇرالعان «Sensitive» بالدىق بي ءانسامبلى كەش شىرايىن اشا تۇسكەنىن, ولاردىڭ حالىقارالىق بايقاۋلاردا گران-پري ۇتىپ العانىن ايتا كەتكەن ءجون. سونداي-اق مۇمكىندىگى شەكتەۋلى بالالار سالعان سۋرەتتەر مەن قولونەر تۋىندىلارى كورمەگە قويىلدى.
شىعارماشىلىق فەستيۆال جاس كۇيشىلەردى دە توعىستىردى. «ۇكىلى دومبىرا» سايىسى «قازاقستاننىڭ حالىق اعارتۋ ءىسىنىڭ ۇزدىگى», ارداقتى ۇستاز, داۋلەسكەر كۇيشى سەرىكباي قۇسايىنوۆتىڭ 80 جىلدىعىنا ارنالدى. 16 مەن 40 جاس ارالىعىنداعى ۇمىتكەرلەر بايقاۋ شارتى بويىنشا سەرىكباي ءباري ۇلىنىڭ رەپەرتۋارىنان ءبىر كۇي جانە اتاقتى كۇيشىلەردىڭ شىعارماسىن ورىندادى. باس جۇلدە جامبىل اۋدانىنىڭ نامىسىن قورعاعان ەربولات سەرىكبايعا بۇيىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
امانگەلدى بەكمۇراتوۆ
