اتالمىش «دوستىق ءۇيى» قاراعاندى مەن جەزقازعان قالالارىنداعى وسى تەكتەس ورتالىقتاردان كەيىن ىسكە كىرىسكەلى وتىرعان ءۇشىنشى شاڭىراق بولىپ وتىر.دوستىق ءۇيىن اشۋ ماسەلەسى بۇرىننان ءپىسىپ جەتىلدى, دەپ اتاپ ءوتتى ساتباەۆ قالاسىنىڭ اكىمى اسقار ىدىرىسوۆ.
– رۋحاني كەلىىسىم كۇن – مەيىرىمدىلىك جانە بىرلىك مەرەكەسى قارساڭىندا ءبىز وسى نىساندى اشىپ وتىرمىز, – دەدى قالا باسشىسى. – مەنىڭشە بارلىق ەتنومادەني ورتالىقتار ءۇشىن بۇل ۇلكەن ماڭىزعا يە. مۇندا جۇمىس ءۇشىن بارلىق جاعداي جاسالعان – اكت زالى, ادىستەمەلىك كابينەت, كىتاپحانا, انا ءتىلىن وقىپ-ۇيرەتۋگە, جاس ۇرپاقتى ۇلتتىق مادەنيەتكە باۋلۋعا ارنالعان وقۋ سىنىبى بار.
دوستىق ءۇيى ەتنوسارالىق قارىم-قاتىناسقا, قوعامدىق ۇيىمدار اراسىنداعى ىنتىماقتاستىق پەن ءوزارا سەرىكتەستىكتى نىعايتۋ ءۇشىن اشىق الاڭ بولاتىنىنا ول سەنىمىن ءبىلدىردى.
دوستىق ءۇيى «قازاقستان حالىقتارىنىڭ رۋحاني, قوعامدىق جانە ۇلتارالىق ىنتىماقتاستىعى ورتالىعى» كمم قۇزىرىندا بولماق. قالانىڭ ەتنومادەني بىرلەستىكتەرىنەن بولەك, مۇندا «شىندىق» شىعارماشىلىق زيالىلار قوعامدىق ۇيىمى جانە ومىرلىك قيىندىققا تاپ بولعان ايەلدەر مەن بالالارعا ارنالعان داعدارىس ورتالىعى جۇمىس ىستەيتىن بولادى.
دوستىق ءۇيىنىڭ اشىلۋىمەن ساتباەۆ قالاسىنىڭ تۇرعىندارىن قازاقستان حالقى اسسامبلەياسىنىڭ وبلىستىق حاتشىلىعىنىڭ جەتەكشىسى ەرلان قۇسايىن قۇتتىقتادى. قاراعاندى وبلىسى اكىمىنىڭ اتىنان ول جاڭا مەكەمەگە ءاليحان بوكەيحاننىڭ 15 تومدىق شىعارمالار جيناعىن سىيعا تارتتى.
– قازاقستان حالقى – سان قيىندىقتى باسىنان كەشە ءجۇرىپ, ەرىك-جىگەرى ەشقاشان مۇقالماعان ەل. ۇلت باسىنان وتكەن قاسىرەتتى سىندار ەرتەڭىنە ءۇمىت ارتقان قالىڭ قاۋىمنىڭ قايرات-جىگەرىن جانىپ, تالابى مەن تالپىنىسىن ۇشتاي تۇسكەن. سوعان دانەكەرلىك ەتكەن قۇدىرەتتى كۇش – بىرلىك.
سول بىرلىكتى بەكەم ساقتاۋ قاجەت. مەملەكەت باسشىسىنىڭ ساليقالى ساياساتىنىڭ ءتۇپ-تامىرى وسى ۇستانىمعا نەگىزدەلگەن, – دەدى ءوزىنىڭ قۇتتىقتاۋ لەبىزىندە قاراعاندى وبلىسى اكىمىنىڭ وكىلى.
ادەمى تىلەكتەرمەن قاتار, قالالىق ءماسليحاتتىڭ حاتشىسى تاتيانا حميليارچۋك ىنتىماق وشاعىنا كىلەم جانە ىدىس-اياق جيىنتىعىن سىيعا تارتتى.
بىرلىك ورداسىنىڭ لەنتاسى قيىلىپ, شاشۋ شاشىلعان سوڭ جيىلعان جۇرتشىلىق ونىڭ ىشكى جاعدايىن زەردەلەپ, ەرەكشەلىكتەرىمەن جەتە تانىستى.
سونىمەن قاتار وندا ەتنومادەني ورتالىقتارىمەن بىرگە قالالىق «قازاق ءتىلى» قوعامى دا ورنالاسقان. بۇدان تىسقارى, ءماجىلىس-كونتسەرت زالى, ءدارىسحانا, مۋزەيى جانە كىتاپحاناسى بار. بولاشاقتا مەكەمە اكىمشىلىگى كابيەتتەرىنەن بولەك «مەتسەناتتار بولمەسىن» جاساقتاۋ دا جوسپارعا ەنگىزىلىپتى.
سالتاناتتى شارا بارىسىندا ەتنومادەني ورتالىقتاردىڭ جەتەكشىلەرى ءسوز الىپ, تيىسىنشە, ءار ۇلتتىڭ اندەرى اۋەلەدى. بىرلىك تامىرى بەرىك بولسىن دەگەن ىرىممەن «دوستىق گ ۇلى» وتىرعىزىلدى. تۇساۋى ەندى عانا كەسىلگەن جاڭا مەكەمەنىڭ ديرەكتورى بولىپ گۇلناز گاتياتوۆا تاعايىندالدى.
ايتا كەتەيىك, قازاقستاندا رۋحاني كەلىسىم كۇنى جىل سايىن 18 قازاندا اتاپ وتىلەدى.
بۇل كۇنى 1992 جىلى الماتىدا پرەزيدەنت نۇرسۇلتان نازارباەۆتىڭ باستاماسىمەن بۇكىلالەمدىك رۋحاني كەلىسىم كونگرەسى وتكەن. وعان قاتىسۋشىلار قاقتىعىستار مەن كەلىسپەۋشىلىكتەرگە موراتوري جاريالانعان كۇندى, تاتۋلىق, مەيىرىمدىلىك جانە جاقىنعا كومەك كورسەتۋ كۇنىن رۋحاني كەلىسىم كۇنى ەتىپ بەكىتۋ تۋرالى مانيفەست قابىلدادى.
ميراس اسان,
«ەگەمەن قازاقستان»
قاراعاندى وبلىسى,
ساتباەۆ قالاسى
