فوتو: ەرلان ومار, «ەگەمەن قازاقستان»
كورمەنىڭ اشىلۋ سالتاناتىنا بەلگىلى مەملەكەت جانە قوعام قايراتكەرلەرى, كورنەكتى تۇركىتانۋشى عالىمدار, قازاقستاندا تىركەلگەن ديپلوماتيالىق كورپۋس وكىلدەرى مەن جۋرناليستەر قاتىستى.
القالى شارانى اكادەميا باسشىسى دارحان قىدىرالى قۇتتىقتاۋ سوزىمەن اشتى. ول كورمەگە ارقاۋ بولعان تانىمال ماجار عالىمى ميحاي حوپپالدىڭ شىعارماشىلىعى, اسىرەسە كوشپەندى حالىقتار مەن شاماندىق ءىلىمدى زەردەلەگەن زەرتتەۋ جۇمىستارى جونىندە اڭگىمەلەدى. سونىمەن بىرگە ۆەنگريا مەن تۇركى اكادەمياسى اراسىندا ورناعان بەرىك ىنتىماقتاستىق پەن عىلىمي جوبالار تۋرالى تارقاتتى.
بۇدان كەيىن ءسوز العان تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ ماجار-تۇركى رۋحاني بايلانىستارى جونىندە پايىمدى پىكرىن ءبىلدىردى.
- تۇركى اكادەمياسىنا باقىلاۋشى رەتىندە ۆەنگريا ەلىنىڭ ەنۋى ۇلكەن وقيعا. ءبىزدىڭ ۇلى دالا دەپ جۇرگەنىمىز التايدان باستالسا, ءبىر جاعى دۋنايدان اياقتالادى. قازاقستانمەنەن ۆەنگريانىڭ اراسىنداعى ديپلوماتيالىق, ساياسي-ەكونوميكالىق سالالارداعى قارىم-قاتىناس جاقسى دامىپ كەلە جاتىر. تۇركى كەڭەسىنىڭ التىن ارقاۋى – تۇركى اكادەمياسى. ويتكەنى عىلىمنىڭ بارلىق سالاسى بار. وسى تۇرعىدان كەلگەندە بۇگىنگى كورمەنىڭ ماڭىزى زور. شامانيزم قازاق اراسىندا ءالى دە ساقتالىپ كەلەدى. شامانيزم تاقىرىبىنىڭ فوتوكورمەنىڭ ارقاۋىنا اينالۋى ايتۋلى وقيعا, - دەيدى التاي ءوڭىرىن تەرەڭ زەرتتەپ جۇرگەن عالىم ءادىل احمەتوۆ.
بۇعان دەيىن حابارلاعانىمىزداي, 2017 جىلدىڭ قىركۇيەك ايىندا بۇۇ باس اسسامبلەياسىنىڭ 72-ءشى سەسسياسى شەڭبەرىندە وتكەن تۇركى كەڭەسىنە مۇشە مەملەكەتتەردىڭ سىرتقى ىستەر مينيسترلەرىنىڭ بەيرەسمي كەزدەسۋىندە ۆەنگريانىڭ تۇركى اكادەمياسىنا باقىلاۋشى مارتەبەسىن الۋ تۋرالى ءوتىنىمى ءبىراۋىزدان ماقۇلدانعان بولاتىن. د.قىدىرالى وسىعان وراي ماجارستاننىڭ قازاقستان رەسپۋبليكاسىنداعى ەلشىسى اندراش باراني مىرزاعا ءىلتيپاتىن ءبىلدىردى.
- ۆەنگريا مەن قازاقستان اراسىنداعى ديپلوماتيالىق قاتىناستاردىڭ ورناعانىنا 25 جىل تولۋى ءبىز ءۇشىن ۇلكەن مارتەبە. وسى كەزەڭ ىشىندە, جالپى كوشپەلى وركەنيەتتىڭ ەۋروپاداعى ەڭ قيىرداعى وكىلى ۆەنگريامەن تەرەڭ قارىم-قاتىناستار ورنادى سونىڭ ءبىر ايعاعى - تۇركى اكادەمياسىنا ۆەنگريانىڭ باقىلاۋشى مۇشە بولىپ ەنۋى. مەرەيلى ىزەتپەن ديپلوماتيالىق قاتىناستاردىڭ 25 جىلدىعىمەن جانە ۆەنگريا رەسپۋبليكاسىنىڭ حالىقارالىق تۇركى اكادەمياسىنا العاشقى باقىلاۋشى مۇشە بولىپ ەنۋىمەن شىن جۇرەكتەن قۇتتىقتاعىم كەلەدى. وسى كەزەڭدە ەڭبەگى ەرەكشە تۇلاعالار بولدى. سولاردىڭ ءبىرى قازاقستانداعى ۆەنگريا ەلشىسى اندراش باراني مىرزا, - دەگەن اكادەميا باسشىسى سالتاناتتى شارا اياسىندا ا.بارانيگە «تامىرلاس xالىقتار اراسىنداعى ىنتىماقتاستىقتى دامىتۋعا قوسقان زور ۇلەسى جانە عىلىم-ءبىلىم سالاسىنداعى بايلانىستاردى تەرەڭدەتۋدەگى جەمىستى قىزمەتى ءۇشىن» قۇرمەت گراموتاسىن تاپسىردى.
ءوز كەزەگىندە ەلشى تۇركى اكادەمياسى ۇجىمىنا كوشپەندى حالىقتار مادەنيەتىن زەرتتەپ, ناسيحاتتاۋداعى قىزمەتى ءۇشىن ريزاشىلىق ءبىلدىردى.
ايا ءومىرتاي,
«ەگەمەن قازاقستان»
