ورتالىققا جاقىن سانالاتىن اقسۋدان شالعايداعى الاكولگە دەيىنگى ارالىقتى ءجۇرىپ ءوتىپ, حالىقپەن كەزدەسۋلەر وتكىزىپ, ءار ايماقتىڭ قاسيەت تۇتار, ماقتان ەتەر جەرلەرىنە ات بايلاپ, بىرنەشە شارانى قاتار اتقارىپ وتىرعان «رۋحاني كەرۋەن» جوباسىن جۇزەگە اسىرۋشىلار الدىمەن اقسۋ اۋدانى, جانسۇگىروۆ كەنتىندەگى جىر ءدۇلد ۇلى ءىلياس اقىننىڭ ەسكەرتكىشىنە گۇل شوقتارىن قويدى.
بۇدان سوڭ مولىقباي اتىنداعى اۋداندىق مادەنيەت ۇيىندە وتكەن سالتاناتتى جيىندا الماتى وبلىستىق ءدىن ىستەرى باسقارماسىنىنىڭ باسشىسى, كەرۋەننىڭ جولباسشىسى راحمەت ەسداۋلەتوۆ ەلباسى ۇسىنعان باعدارلامالىق ماقالانى ناسيحاتتاۋ ماقساتىندا وزدەرىنىڭ اتقارىپ جاتقان جۇمىستارىمەن تانىستىردى.
بۇگىنگى كۇننىڭ باس اۋرۋىنا اينالعان ماسەلە – ءدىن اتىن جامىلىپ, ارانداتۋشىلىقپەن اينالىسىپ جۇرگەن اعىمدار جايلى جۇرگىزگەن زەرتتەۋ جۇمىستارىنان دەرەك كەلتىردى. باعدارلامادا ايتىلعان ۇلتتىق قۇندىلىقتاردىڭ قاينار بۇلاعى تاريحىمىز بەن مادەنيەتىمىزدى, سالت-ءداستۇرىمىزدى, تۋعان جەرىنە تۋىن تىگىپ, ءوسىپ-ونۋىنە جاعداي جاساماققا تىرىسىپ, يگى ىستەردىڭ ۇيىتقىسى بولىپ جۇرگەن ازاماتتاردى ناسيحاتتاۋ باستى ماقساتتاردىڭ ءبىرى ەكەنىنە توقتالدى. «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى عالياسقار سارىباەۆ تا وتكەن مەن بۇگىننىڭ اراسالماعىن انىقتاپ الماي, ءىس اتاۋلىنىڭ ورگە جىلجىمايتىنىن, تاريحتى, ءداستۇردى بىلمەي, اتا-بابانىڭ جولىن قۇرمەتتەمەي رۋحاني كەمەلدىككە جەتۋ مۇمكىن ەمەسىن ايتتى. «رۋحاني كەرۋەننىڭ» مۇشەسى اقىن كامنۇر ءتالىم ۇلى مەن وبلىستىق «جەتىسۋ» گازەتى باس رەداكتورىنىڭ ورىنباسارى جۇماتاي امىرەەۆ ءوز اتتارىنان تىلەك ءبىلدىرىپ, بۇل كەرۋەننىڭ, جالپى, «رۋحاني جاڭعىرۋدىڭ» باسى ءوز اۋىلىڭدى, تۋعان جەرىڭدى, اۋىلىڭنان شىققان جاقسى-جايساڭدار ءبىلۋ مەن قۇرمەتتەۋدەن باستالاتىنىن تىلگە تيەك ەتتى. وبلىستىق ءسۇيىنباي اتىنداعى فيلارمونيانىڭ انشىلەرى ابىلاي قارمىسوۆ, قۇرالاي شاياحمەتوۆا مەن الماتىدان ارنايى كەلگەن جىرشى-تەرمەشى ءابىش ادىلبەكوۆ ونەر كورسەتكەن ساحناعا جەرگىلىكتى ونەرپازدارى دا شىعىپ, بايىپتى باسقوسۋدى مەرەكەلىك كوڭىل كۇيگە ۇلاستىردى.
بۇدان سوڭ كەرۋەن مۇشەلەرى بىرنەشە توپقا ءبولىنىپ, كەستە بويىنشا جوسپارلانعان جۇمىستارىنا كىرىسىپ كەتتى. ءبىر قۋانتارلىعى, اۋدان ورتالىعىندا دەسترۋكتيۆتى ءدىني اعىمدارعا ىلەسىپ, تىركەۋگە الىنعان بىردە-ءبىر ادام بولمادى. الەۋمەتتىك, دەنساۋلىق سالاسى ماماندارى تۇرعىلىقتى جۇرتپەن كەزدەسىپ, سان ساۋالدارىنا جاۋاپ بەرسە, ءبىر توبى اۋدان اقساقالدارىمەن جۇزدەسىپ, ەمەن-جارقىن اڭگىمە ءوربىتتى.
ەندى ءبىر توبى جاستارمەن ديدارلاسىپ, ءدىن مەن ءداستۇر نەگىزىندە قويىلعان سۇراقتارعا ەگجەي-تەگجەيلى جاۋاپ بەردى. ساپاردىڭ قورىتىندىسى رەتىندە ورتالىق ستاديوندا شاعىن فۋتبولدان جارىس ۇيىمداستىرىلدى.
ءارى قارايعى ساپار سارقان اۋدانىندا جالعاسىپ, قازاقتىڭ تۇڭعىش ينجەنەر-عالىمى مۇحامەتجان تىنىشپاەۆ ەسكەرتكىشىنە گۇل شوعى قويىلىپ, قۇرمەت كورسەتىلدى. ماقسات ايقىن, مىندەت تۇسىنىكتى بولعان سوڭ, ءار اۋدانعا ات باسىن تىرەگەن سايىن نەگىزگى باعىتتان اۋىتقىماي, ۇعىندىرۋ, ءتۇسىندىرۋ جۇمىستارىمەن بىرگە, ءدىني جات اعىمداردان ساقتاندىرۋ, ءدىني ساۋات بەرەتىن كىتاپشالار تاراتۋ, قايماعى بۇزىلماعان ءدىننىڭ قادىر-قاسيەتى جايلى اقپارات بەرۋ, ءارتۇرلى جاستاعى تۇرعىندارمەن كەزدەسۋ, اۋدانداعى نەگىزگى قيىنشىلىقتاردى ءبىلىپ, سول بويىنشا جۇمىس ىستەۋ جوسپارىن قۇرۋ, جالپى, وبلىستاعى ءدىني احۋالدان حاباردار ەتۋ نازاردان تىس قالعان جوق.
سارقان اۋدانىنداعى ءبىر ەرەكشەلىك كەرۋەنگە مۇشە بولىپ, جولعا شىققان ونەرپازداردىڭ بازاردىڭ قاق ورتاسىن ساحنا جاساپ, كورسەتكەن ونەرى بولدى دەۋگە بولادى. مۇندا دا اۋداندىق سپورت كەشەنىندە شاعىن فۋتبولدان بىرنەشە كوماندا اراسىندا جارىس ءوتتى.
الاكول اۋدانىنا كەلگەندە دە ءداستۇر بۇزىلعان جوق. اۋەلى ۇلى وتان سوعىسى ارداگەرلەرى مەن تىل ەڭبەككەرلەرىنە ارنالعان ەسكەرتكىشكە, ودان كەيىن دىنمۇحامەد قوناەۆتىڭ ەسكەرتكىشىنە گۇل شوعىن قويىپ, رۋحقا تاعزىم جاساپ, ارۋاققا قۇرمەت كورسەتتى. بۇدان سوڭعى اتقارىلعان شارالار نەگىزىنەن جوعارىداعى كەستە بويىنشا ءجۇردى.
ءاۋ باستا تالدىقورعان قالاسىنداعى «جاستار» ساياباعىندا سالتاناتتى اشىلۋ بولىپ, ەلدىڭ اق باتاسىمەن ساپارعا شىعاردا بۇل جوبانىڭ تانىستىرىلىمى وتكەن.
«رۋحاني كەرۋەن» جوباسى اياسىندا قۇرىلعان جۇمىس توبى «رۋحاني جاڭعىرۋ: ەل ەرتەڭىنىڭ باستاۋى» تاقىرىبىندا زيالى قاۋىم وكىلدەرىمەن كەزدەسۋ وتكىزىپ, «دەنساۋلىق – بولاشاق كەپىلى» تاقىرىبىندا ءدىني سەنىمدەر سەبەپتەرىنەن ەكپە, قان قۇيۋدان باس تارتقان, جات اعىمعا بەت بۇرعان ازاماتتارمەن سويلەسىپ, وڭ جولعا سالۋ, ءدىننىڭ نەگىزگى ماقساتى جايلى ءتۇسىندىرۋ جۇمىستارىن جۇرگىزەدى. «رۋحاني جاڭعىرۋ: تۋعان جەر – التىن بەسىك» اتتى سۋرەت جانە كىتاپ كورمەسى, «اقپاراتتىق ءتۇسىندىرۋ جۇمىسى – ءدىني ساۋاتتىلىقتى ارتتىرىپ, رۋحاني بايلىعىمىزدى دارىپتەيدى» تاقىرىبىندا ءدىنتانۋشى عالىمدارمەن دوڭگەلەك ۇستەل فورماتىنداعى كەزدەسۋلەر ۇيىمداستىرىپ, «رۋحاني مۇرا» اتتى كونتسەرتتىك باعدارلاماسى ارقىلى ءان مەن جىر عانا ەمەس, ارنايى ساحنالىق قويىلىمدار دايىنداپ وتىرعاندارىن جەتكىزگەن. جانە, بۇل ساپار ءۇش ايعا سوزىلاتىنىن, وبلىستىڭ بۇكىل اۋدانىن ارالاپ شىعاتىنىن, كەرۋەننىڭ قۇرامىندا 50 شاقتا ادام بولاتىنى ايتىلعان. ءار ساپارىندا قاتار جاتقان ءۇش اۋداندى قامتيتىن «رۋحاني كەرۋەن» جاقىندا عانا رايىمبەك, پانفيلوۆ, ۇيعىر اۋداندارىن ارالاپ قايتتى. جامبىل اۋدانىنان باستالعان كەرۋەننىڭ الدىندا ءالى تالاي جول جاتىر. بۇل جوبا 17 قاراشاعا دەيىن جالعاساتىن بولادى.
الماس ءنۇسىپ,
«ەگەمەن قازاقستان»
الماتى وبلىسى
