اتالعان ورتالىق تاۋار اينالىمى كولەمىنىڭ ۇلعايۋىنا جانە ەلىمىزدىڭ كولىكتىك-ترانزيتتىك الەۋەتىنىڭ ارتۋىنا زور سەپتىگىن تيگىزەدى. بۇگىنگى كۇننىڭ سۇرانىسىنا ساي جابدىقتالعان سۋ جاڭا كەشەندە كەدەندىك راسىمدەۋ اۋماعى دا قوسىمشا جۇمىس ىستەيدى. مامانداردىڭ ايتۋىنشا وسىعان دەيىن «قالجات» بەكەتى ارقىلى كۇنىنە 80 كولىك وتسە, ەندى بۇل كورسەتكىش شامامەن ەكى ەسەگە دەيىن ارتاتىن بولادى. ويتكەنى بۇدان بىلاي ورتالىق جۇمىسى ءبىر تەرەزە قاعيداسى بويىنشا جۇمىس ىستەيدى. سونىمەن قاتار «استانا-1» اقپاراتتىق جۇيەسىنىڭ «ترانزيت» ءمودۋلى دە ىسكە قوسىلعان. وسى جۇيەنىڭ كومەگىمەن اقپاراتتى بەرگەن ساتتەن باستاپ, تاۋارلاردى راسىمدەپ بىتكەنگە دەيىنگى بارلىق پروتسەسستەرگە اۆتوماتتاندىرىلعان باقىلاۋ ورناتىلادى. بۇل ءوز كەزەگىندە وتاندىق كاسىپكەرلەر مەن سىرتقى ەكونوميكالىق ارىپتەستەر ءۇشىن قولايلى جاعداي تۋدىرماق.
ساۋلەتى جاراسقان زاماناۋي ورتالىقتىڭ سالتاناتتى اشىلۋ راسىمىنە مەملەكەتتىك كىرىستەر كوميتەتى توراعاسىنىڭ ورىنباسارى گوسمان امرين باستاعان جاۋاپتى تۇلعالارمەن قاتار ەلىمىز بەن كورشى ەلدەردىڭ بيزنەس وكىلدەرى قاتىسىپ ورتالىقتىڭ ەل دامۋىنا تيگىزەر پايداسى جايلى كەڭىنەن ايتتى.
– لوگيستيكا ۇعىمى – جۇك تاسىمالداۋدى ۇيىمداستىرۋشى عانا ەمەس تاۋاردى جونەلتۋشى مەن قابىلداپ الۋشىنى بايلانىستىراتىن التىن كوپىر. ەلباسىنىڭ قازاقستان حالقىنا جولداعان جولداۋىندا, ۇلت جوسپارى – «100 ناقتى قادامىندا» لوگيستيكا سالاسىنىڭ قارقىندى دامۋىنا اپاراتىن نەگىزگى باعىتتار مەن باسىمدىقتار تايعا تاڭبا باسقانداي انىق كورسەتىلگەن. الداعى ۋاقىتتا بۇل ورتالىق ەل يگىلىگىنە جۇمىس ىستەپ, قوس تاراپتىڭ اراسىنداعى بارىس-كەلىس پەن الىس-بەرىستى ارتتىرا وتىرىپ كوپتەگەن وڭ وزگەرىستەرگە جول اشاتىن بولادى. ەلىمىزدىڭ ەكونوميكالىق قۋاتىنىڭ ارتۋى, كوپتەگەن ازاماتتارعا جاڭا جۇمىس ورنىن بەرۋ ارقىلى حالىقتىڭ ءال-اۋقاتىنىڭ كوتەرىلۋى, ترانزيتتىك پوتەنتسيالدىڭ تيىمدىلىگىن ءوسىرۋ جانە سىرتقى ەكونوميكالىق قىزمەتكە قاتىسۋشىلارعا قولايلى جاعداي جاساۋ ورتالىقتىڭ نەگىزگى مىندەتى. ەگەمەندىك العان ەڭسەلى جىلدار ىشىندە ەلباسىمىزدىڭ باستاماسىمەن ەلىمىزدەگى كەدەن سالاسىنىڭ جاڭاشا تۇرپاتتا دامۋىنا كوپ كوڭىل بولىنۋدە. بۇگىنگى اشىلىپ وتىرعان كەدەن-لوگيستيكالىق ورتالىق وسىنىڭ دالەلى – دەيدى «قالجات» وتكىزۋ بەكەتىنىڭ باسشىسى ءالىم جۋسانباي.
جاۋاپتى ماماندار كولىك-لوگيستيكا ورتالىقتارىنىڭ بۇتىندەي ءبىر كەشەنى قۇرىلىسىنىڭ اياقتالۋى شەكاراداعى لوگيستيكالىق ينفراقۇرىلىمنىڭ تيىمدىلىگىن تولىق شەشە الاتىنىن ايتادى. ەسكە سالساق, جاڭا ورتالىقتىڭ قۇرىلىسى مەملەكەتتىك-جەكەمەنشىك ارىپتەستىك نەگىزىندە سالىنعان.
تاۋار جانە كولىك اعىنىن وڭدەۋگە, سونداي-اق جۇكتەردى كەدەندىك وڭدەۋدەن وتكىزۋگە قاتىستى قىزمەتتەردى قامتاماسىز ەتىپ وتىرعان «قالجات», «باحتى», «دوستىق», «حورگوس», «التىنكول» جانە «مايقاپشاعاي» پۋنكتەرى قازاقستاندى عالامدىق كولىك-لوگيستيكا جۇيەسىمەن بىرىكتىرۋگە مۇمكىندىك بەرەدى. وسىلايشا, بولاشاقتا وتاندىق شەكارا ماڭىنداعى كولىك-لوگيستيكا ينفراقۇرىلىمىن دامىتۋ ءىسى ەۋرازيانىڭ ەڭ ءىرى لوگيستيكا جۇيەسىن قۇرۋعا الىپ كەلمەك.
ارمان وكتيابر,
«ەگەمەن قازاقستان»
قالجات-الماتى
