كۇننىڭ ءبىرىنشى جارتىسىندا د. اباەۆ عارىشتىق تەحنيكالاردى شىعارۋ بويىنشا اقش جانە الەمنىڭ ەڭ ءىرى SpaceX كومپانياسىنىڭ ۆيتسە-پرەزيدەنتى پاتريسيا كۋپەرمەن كەزدەستى. كەزدەسۋدە بايلانىس سالاسىنداعى ىنتىماقتاستىق ماسەلەلەرى تالقىلاندى.
سونىمەن قاتار, جاپونيانىڭ ىشكى ىستەر جانە كوممۋنيكاتسيالار ءمينيسترى توميناگا مىرزامەن كەزدەسۋ وتكىزىلدى. كەزدەسۋ بارىسىندا تسيفرلىق تەحنولوگيالار جانە تەلەكونتەنت سالاسىنداعى تاجىريبە الماسۋ قاراستىرىلدى.
بۇدان سوڭ, اقپارات جانە كوممۋنيكاتسيالار ءمينيسترى د.اباەۆ سلوۆەنيانىڭ ۆيتسە-پرەمەرى ب. كوپريۆنيكارمەن كەزدەسىپ, اقپاراتتىق-كوممۋنيكاتسيالىق تەحنولوگيالار سالاسىنداعى سەرۆيستەر پلاتفورمالارىن جاساپ شىعارۋ بويىنشا ءوزارا ءىس-قيمىل ماسەلەلەرىن تالقىلادى.
كۇننىڭ ەكىنشى جارتىسىندا د.اباەۆ بۇكىلالەمدىك ەلەكتر بايلانىسى كونفەرەنتسياسىنىڭ جوعارى دارەجەدەگى سەگمەنتىندە ءسوز سويلەدى. ءوز سوزىندە مينيستر «تسيفرلىق قازاقستان» باعدارلاماسى جايلى ايتىپ, ونىڭ ماقساتتارىمەن تانىستىردى.
«قازاقستان ءۇشىن اقپاراتتىق-كوممۋنيكاتسيالىق تەحنولوگيالاردىڭ دامۋى وتە ماڭىزدى. نۇرسۇلتان نازارباەۆتىڭ ساياساتى اياسىندا قازاقستاننىڭ 25 جىلدىق تاۋەلسىزدىگى جىلدارىندا زامانۋي اقپاراتتىق-كوممۋنيكاتسيالىق لاندشافت قۇرىلدى. سونىمەن قاتار, 2018 جىلى ءبىز اقپاراتتىق كوممۋنيكاتسيالىق تەحنولوگيالار دامۋىنىڭ جاڭا دەڭگەيىنە وتەمىز. مۇنىڭ بارلىعى «تسيفرلىق قازاقستان» باعدارلاماسى اياسىندا وتەتىن بولادى» - دەدى مينيستر.
سونداي-اق, ارگەنتينانىڭ فەدەرالدى باق جۇيەسىنىڭ ءمينيسترى ە.لومبارديمەن جانە ارگەنتينانىڭ عىلىم, تەحنولوگيالار جانە ءتيىمدى يننوۆاتسيالار ءمينيسترىنىڭ ورىنباسارى ۆ.اگۋادومەن كەزدەسۋلەر وتكىزىلدى. كەزدەسۋلەر بارىسىندا مەديا سالاسىنداعى ىنتىماقتاستىق بويىنشا ماسەلەلەر تالقىلاندى. ايتا كەتەيىك, د. اباەۆ جانە ە.لومباردي بۇدان بۇرىن استانا قالاسىندا, ەكسپو-2017 مەگاجوباسىنىڭ اياسىندا كەزدەسۋ وتكىزگەن بولاتىن.
