تاراز قالاسى اكىمىنىڭ ورىنباسارى ماقسات احاەۆتىڭ ايتۋىنشا, جالپى, قالاداعى جىلۋ جۇيەسىنىڭ ۇزىندىعى 247 473 شاقىرىمدى قۇرايدى ەكەن. وسى ورتالىقتاندىرىلعان جۇيەگە بارلىعى 1202 كوپپاتەرلى تۇرعىن ءۇي قوسىلعان. ونىڭ ىشىندە 876 نىسان «تارازەنەرگوورتالىق», 55-«جگرەس» اكتسيونەرلىك قوعامدارىنا, 163 نىسان «جامبىل جىلۋ», 98 نىسان «تەمىرجول جىلۋ» مەملەكەتتىك-كوممۋنالدىق مەكەمەسىنە, ال 10 نىسان «سوفيا» جاۋاپكەرشىلىگى شەكتەۋلى سەرىكتەستىگىنە قارايدى. قالا اكىمدىگىنىڭ مالىمەتىنشە, بۇگىنگى تاڭدا قالاداعى تۇرعىن ۇيلەر جىلىتۋ ماۋسىمىنا تۇگەل دايىن ءارى پاسپورتتارى دا ازىرلەنگەن.
نەگىزى جىلۋ ءوندىرۋشى جانە ونى جەتكىزۋشى مەكەمەلەر جىلۋدى ءۇي نىساندارىنىڭ ەلەۆاتورىنا دەيىن عانا جەتكىزىپ بەرە الادى ەكەن. ال ودان ءارى ۇيىشىلىك جەلىنىڭ وتكىزگىشتىگى مەن اقاۋسىزدىعىن پاتەر يەلەرىنىڭ وزدەرى جۇزەگە اسىرۋى ءتيىس. «بۇگىندە كوپتەگەن پاتەرلەردەگى تىك قۇبىرلار مەن شويىن باتارەيالار اۋىستىرۋدى قاجەت ەتەدى. قۇبىر جەلىلەرىنىڭ توزۋى, بىتەلۋى جىلۋدىڭ ءبىر پاتەردەن ەكىنشى پاتەرگە كەدەرگىسىز جەتۋىن دە قيىنداتادى. وسىعان بايلانىستى تۋىندايتىن قيىندىقتار ءۇي اعالارىنىڭ تۇراقتى نازارىندا بولۋى ءتيىس», دەيدى ماقسات احاەۆ.
جالپى العاندا, بۇگىنگى كۇنى 105 الەۋمەتتىك نىسان مەن 720 كوپقاباتتى تۇرعىن ءۇي جىلۋعا قوسىلعان. قالعان تۇرعىن ۇيلەر مەن الەۋمەتتىك نىساندار 15 قازانعا دەيىن جىلۋعا قوسىلاتىن بولادى.
حاميت ەسامان,
«ەگەمەن قازاقستان»
جامبىل وبلىسى
