«شىعىسقا كەلۋدەگى ماقساتىمىز – جاستارمەن كەزدەسۋ, ولاردى تۇڭعىش پرەزيدەنت قورىنىڭ جوبالارىمەن جانە گرانتتارىمەن كەڭىنەن تانىستىرۋ. بىزدە جاستارعا ارنالعان باعدارلامالار مەن الەۋمەتتىك جوبالار وتە كوپ. وسى باعدارلامالار مەن جوبالارعا شىعىسقازاقستاندىق جاستار دا بەلسەندى تۇردە قاتىسسا دەيمىز. كەيدە جاستاردىڭ جاقسى يدەيالارى بولعانىمەن, قارجىنىڭ جوقتىعىنان ول يدەيا سول كۇيىندە قالىپ قويادى. ال بۇل – يدەيانى ىسكە اسىرۋعا بەرىلەتىن ۇلكەن مۇمكىندىك», دەيدى ول.
بيىل قوردىڭ وكىلدەرى قاراعاندى, شىمكەنت, كوكشەتاۋ جانە تالدىقورعان قالالارىندا بولىپ, تالانتتى جاستاردىڭ جوبالارىن ىسكە اسىرۋعا جان-جاقتى قولداۋ كورسەتىپتى. شىعىس قازاقستان وبلىسىنان 24 ادام, ياعني جاس عالىمدار مەن ستۋدەنتتەر قوردىڭ گرانت يەگەرى اتانىپتى. ءوز كەزەگىندە ءوڭىر باسشىسى تۇڭعىش پرەزيدەنت قورىنىڭ وبلىسقا قاتىستى بارلىق جوبالارى مەن باستامالارىن قولدايتىنىن, بىرلەسە جۇمىس ىستەۋگە دايىن ەكەندىگىن جەتكىزدى. سونداي-اق كەزدەسۋ بارىسىندا قوردىڭ اتقارۋشى ديرەكتورى ءۇرجار اۋدانىنىڭ بالالارعا ارنالعان ارنايى الەۋمەتتىك قىزمەت كورسەتۋ ورتالىعىنا ينتەراكتيۆتى جابدىق ساتىپ الۋى ءۇشىن 3,7 ميلليون تەڭگەنىڭ سەرتيفيكاتىن وبلىس اكىمىنە تابىس ەتتى. «بۇل ارينە, ۇلكەن قۋانىش. ءبىزدىڭ الەۋمەتتىك مەكەمەنىڭ تاريحىندا بۇرىن-سوڭدى بولماعان وقيعا. سوندىقتان دا قازاقستان رەسپۋبليكاسى تۇڭعىش پرەزيدەنتى – ەلباسى قورىنىڭ باسشىلىعىنا زور العىسىمىزدى ايتامىز», دەيدى ءۇرجار اۋدانىنىڭ بالالارعا ارنالعان ارنايى الەۋمەتتىك قىزمەت كورسەتۋ ورتالىعىنىڭ ديرەكتورى ايجان مۇحاماديەۆا.
قور وكىلدەرى بۇدان كەيىن د.سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىندە جوعارى وقۋ ورىندارىنىڭ ستۋدەنتتەرىمەن كەزدەستى. قانات جۇماباەۆ قوردىڭ جاستارعا ارنالعان باعدارلامالارىن قاراپايىم تىلمەن, ناقتى مىسالدارمەن ءتۇسىندىرىپ بەردى. قوردىڭ قولداۋىنىڭ ارقاسىندا بۇگىندە كوپتەگەن قازاقستاندىق جاستاردىڭ الەمگە ايگىلى بۋكينگ, فەيسبۋك سەكىلدى حالىقارالىق كومپانيالاردا جۇمىس ىستەپ جۇرگەنىن ايتتى. جۋىقتا قور جانىنان ءىت-كەڭەس قۇرىلىپتى. «ەلباسى بيىلعى جولداۋىندا «تسيفرلى قازاقستان» باعدارلاماسى جونىندە بەكەردەن بەكەرگە ايتقان جوق. پرەزيدەنتتىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس» دەگەن ءسوزىنىڭ استارىندا تەرەڭ ماعىنا جاتىر. بۇگىندە الەمدە نە بولىپ جاتىر؟ دۇنيە ءجۇزى جەدەل قارقىنمەن دامىپ بارادى. 5-10 جىلدا الەم ادام تانىماستاي وزگەرەدى. بۇل وزگەرىستەرگە ءبىز دايىن بولۋىمىز كەرەك. بۇگىندە دۇنيە جۇزىندەگى عىلىمي ەڭبەكتەردىڭ 90 پايىزى اعىلشىن تىلىندە.
لاتىن قارپىنە كوشۋدىڭ ماڭىزدىلىعى دا وسىندا. «ەل ءىشى – ونەر كەنىشى» دەگەندەي, تالانتتى دا تالاپتى جاستار ەل ىشىندە ەلەۋسىز قالىپ قويماسا دەيمىز. ەلىمىزدى العا سۇيرەيتىن, مەملەكەتتىڭ مەرەيىن اسىراتىن جاقسى يدەيا بولسا, ءبىز قاشاندا قولداۋعا دايىنبىز. استاناعا كەلىڭىزدەر, ارقايسىلارىڭىزبەن جۇمىس ىستەۋگە, ۇيرەتۋگە, كورسەتۋگە ءازىرمىز. ەسىگىمىز اركەز اشىق», دەدى قوردىڭ اتقارۋشى ديرەكتورى. تۇڭعىش پرەزيدەنت ەلباسى قورىنىڭ جانىنداعى جاس عالىمدار كەڭەسى توراعاسىنىڭ ورىنباسارى سۋحراب جاپاروۆ قوردىڭ جاستارعا قاتىستى باعدارلامالارىن جان-جاقتى ءتۇسىندىرىپ, ستۋدەنتتەردى ءىت-جوبالارعا بەلسەندى قاتىسۋعا شاقىردى. «بۇگىندە دۇنيە جۇزىندە سۇرانىسقا يە ماماندىقتاردىڭ كوپشىلىگى ءىت-تەحنولوگيالارعا قاتىستى. ءبىزدىڭ قوردىڭ جوبالارىنا وسى ۋنيۆەرسيتەتتىڭ ستۋدەنتتەرى دە قاتىسىپ, گرانت يەگەرى اتاندى. سوندىقتان باتىل بولىڭىزدار. بىرىنشىسىندە بولماسا, ەكىنشىسىندە بولادى», دەدى ول.
سونىمەن قاتار بۇل كۇنى قوردىڭ سىيلىعىنىڭ لاۋرەاتى, جامبىل اتىنداعى قازاق مەملەكەتتىك فيلارمونياسىنىڭ ءسوليسى, «قازاقستاننىڭ التىن ۆيولونچەلى» ەرمەك قۇرماناەۆ اعايىندى ابدۋلليندەر اتىنداعى شىعىس قازاقستان ونەر ۋچيليششەسىنىڭ ىشەكتى اسپاپتار بولىمشەسىنىڭ ستۋدەنتتەرىنە شەبەرلىك ساباعىن وتكىزىپ, جاس مۋزىكانتتارمەن پىكىر الماستى. تۇڭعىش پرەزيدەنت قورىنىڭ وسكەمەندەگى ءىس-شارالارى مەتاللۋرگتەردىڭ مادەنيەت سارايىندا بەلگىلى باريتوندار سۇندەت بايعوجين, ازامات جىلتىرگوزوۆ, حالىقارالىق جانە رەسپۋبليكالىق بايقاۋلاردىڭ لاۋرەاتتارى گاۋحار تاسبەرگەنوۆا, تاتيانا ۆيتسينسكايا, بولات ەسىمحان مەن ەرمەك قۇرماناەۆتىڭ قاتىسۋىمەن وتكەن كونتسەرتپەن تۇيىندەلدى. ەركىن فورماتتاعى كونتسەرتتە ونەرپازدار ءان ايتۋمەن قاتار كورەرمەندەرمەن سۇحباتتاسۋعا دا ۋاقىت تاۋىپ, قوردىڭ كومەگى ارقىلى بۇگىنگىدەي بيىككە قالاي جەتكەندىكتەرىن اڭگىمەلەپ بەردى. «شىعىس قازاقستان – مەنىڭ جۇرەگىمە وتە ىستىق. ويتكەنى مەنىڭ اكە-شەشەم وسى جاقتان.
ال تۇڭعىش پرەزيدەنت قورى تۋرالى ايتاتىن بولسام, 2010 جىلى فينليانديادا وتەتىن بايقاۋعا بارۋ ءۇشىن قورعا تاپسىرىس بەرىپ, گرانتىن ۇتىپ العان بولاتىنمىن. سول بايقاۋدان جۇلدەلى ورىن الىپ كەلدىم. سونداي-اق وسىدان ەكى جىل بۇرىن وسى قوردىڭ لاۋرەاتى اتاندىم. قازىر ءوزىم تاربيەلەپ جاتقان شاكىرتتەرىم دە وسى قوردىڭ ستيپەنديانتتارى اتانىپ, كلاسسيكالىق مۋزىكا ونەرىن ناسيحاتتاپ ءجۇر», دەيدى قازاق ۇلتتىق ونەر ۋنيۆەرسيتەتىنىڭ پروفەسسورى ازامات جىلتىركوزوۆ.
ازامات قاسىم,
«ەگەمەن قازاقستان»
وسكەمەن
