سالتاناتتى جيىنعا وبلىس اكىمىنىڭ ورىنباسارى جاقسىلىق ومار جانە ءتۇرلى سالادا جاقسى ناتيجەگە جەتكەن ەڭبەككەرلەر قاتىستى.
ماقسات بەلگىلى – جۇمىسشىلاردىڭ ەڭبەگىن باعالاۋ, جاقسى كورسەتكىشكە جەتكەن جانداردى كوپكە ۇلگى ەتۋ, ەڭبەگىنە ساي قۇرمەت كورسەتۋ. مەرەكەلىك جيىن وبلىستىڭ الەۋمەتتىك-ەكونوميكالىق دامۋىنا ەلەۋلى ۇلەس قوسقان ازاماتتاردىڭ ەڭبەك جولىن باياندايتىن بەينەفيلمنەن باستالدى. وبلىس اكىمى اماندىق باتالوۆتىڭ قۇتتىقتاۋىن جەتكىزگەن جاقسىلىق ومار ءوڭىر ەكونوميكاسىن دامىتىپ, شارۋاشىلىعىنىڭ العا باسۋىنا ىقپال ەتىپ جۇرگەن ەڭبەك ادامدارىنا ۇلگى بولعان, ەڭبەكسۇيگىش, سالاماتتى ۇرپاق وسىرگەندىگى ءۇشىن كوپ جىلدار وبلىس كولەمىندە جۇمىس ىستەپ, ەلگە تانىمال بولعان ەڭبەك ارداگەرلەرىنە العىس ءبىلدىردى.
كەشەگى بولماسا – بۇگىنگى بولمايدى. ەڭبەككەرلىك – جىلدار بويى قالىپتاساتىن مەكتەپ. وبلىس اكىمىنىڭ ورىنباسارى ءسوز اراسىندا كۇنى بۇگىنگە دەيىن ابىرويلى ءىسى مەن ەڭبەكقورلىعىنىڭ ارقاسىندا جاس ۇرپاققا ۇلگى-ونەگە بولا بىلگەن ەكى مارتە سوتسياليستىك ەڭبەك ەرى اتانعان نۇرمولدا الدابەرگەنوۆ, نيكولاي گولوۆاتسكي, جولسەيىت مولداسانوۆتاردىڭ ەسىمدەرىن اتاپ, سولار سالعان جولمەن ءجۇرۋ بۇگىنگى ۇرپاقتىڭ ءبىر مىندەتى ەكەنىن, وتباسى مەن ءتۇز ەڭبەگىنىڭ تىزگىنىن قاتار ۇستاپ, نازىك جاندىلار اراسىنان شىققان سوتسياليستىك ەڭبەك ەرى زىليحا تامشىباەۆا, ءماريام اياباەۆا, قىزىلشاشىلار بيتاي تاتەنوۆا, زاكاريا سەيىتوۆا, ءماميلا الىمباەۆا, اتاقتى جۇگەرىشىلەر كۇلاش ايتجانوۆا, اداليات زايناۋدينوۆالاردىڭ ەرلىكپەن پارا-پار ەڭبەكتەرى جايلى ايتتى. مۇنداي تۇلعالاردىڭ ەرەن ەڭبەگى ەشقاشاندا ۇمىتىلماق ەمەس. سولاردىڭ ءىزىن جالعاپ, ءىسىن جالعاستىرۋ, ءداستۇرلى ەڭبەك جولىن ءۇزىپ الماۋ ءۇشىن, قاراپايىم ەڭبەككەرلەردىڭ سانىن ارتتىرۋ ماقساتىندا بيىل وبلىستاعى 5 كوللەدجدە جاڭا ماماندىقتار اشىلىپتى. جوعارى ءبىلىم الۋعا اركىمنىڭ مۇمكىندىگى بولا بەرمەيدى, سول سەبەپتى كۇندەلىكتى تۇرمىسقا قاجەتتى ماماندىقتاردى مەڭگەرۋ ەشقاشان قۇنىن جويمايتىن, كۇن تارتىبىنەن تۇسپەيتىن ماسەلە. ەكى قولعا ءبىر كۇرەك ىزدەگەن ءاربىر جاستىڭ ماماندىق مەڭگەرۋىنە مۇمكىندىك بەرۋ – باستى مىندەت. بولاشاقتا بۇل تاراپتا دا ەڭبەك وزاتتارى شىعىپ جاتسا, بۇگىن جاسالعان قامقورلىق پەن بەرىلگەن مۇمكىندىكتىڭ تەككە كەتپەگەنى. بۇگىنگى كۇنىمىز ءۇشىن ءبىز الدىمەن قاراپايىم ەڭبەك ادامدارىنا قارىزدارمىز.
– تىنىمسىز ءارى ەسەلى ەڭبەكتىڭ ناتيجەسىندە القابىمىز استىققا, داستارقانىمىز دامگە, ءۇيىمىز بەرەكەگە تولىپ وتىر. مۇنىڭ بارلىعى ارقايسىلارىڭىزدىڭ توگىلگەن ماڭداي تەرلەرىڭىزدىڭ جەمىسى. ۇزاق جىلعى قاجىرلى ەڭبەگىن حالىقتىڭ يگىلىگىنە ارناعان ادامداردىڭ ەسىمدەرىن اتاپ, اتقارعان ىستەرىن جاس ۇرپاققا ۇلگى ەتۋ – ءبىزدىڭ مىندەتىمىز بەن ازاماتتىق پارىزىمىز. بيىل وبلىستىڭ ونەركاسىپ ونىمدەرى 4,5 پايىزعا ارتىپ, 468,5 ملرد تەڭگەنى قۇراسا, اۋىل شارۋاشىلىعى سالاسىنداعى نەگىزگى كورسەتكىش 1,5 پايىزعا كوتەرىلىپ, 281,6 ملرد تەڭگەگە جەتتى. وسىنداي كورسەتكىشكە سىزدەردىڭ قوسقان ۇلەستەرىڭىز ۇشان-تەڭىز, – دەدى ءوڭىر باسشىسىنىڭ ورىنباسارى.
بۇدان سوڭ ءار سالادا جەمىستى ەڭبەك ەتىپ, جەتىستىككە جەتكەن بىلىكتى ماماندار قۇرمەت گراموتاسى جانە العىس حاتتارمەن ماراپاتتالدى. ال اقپارات جانە كوممۋنيكاتسيالار مينيسترلىگىنىڭ «ەڭبەك ارداگەرى» مەدالى تالدىقورعان قالاسى قوعامدىق كەڭەسىنىڭ توراعاسى, «قازاقتەلەكوم» اق وبلىستىق فيليالى تەلەكوممۋنيكاتسيا ديرەكتسياسى باس ديرەكتورىنىڭ كەڭەسشىسى جەكسەمباي مەيرەمباەۆقا تابىس ەتىلدى.
بيىلعى جىلدىڭ باسىندا ەڭبەك ادامىنىڭ مارتەبەسىن ارتتىرۋ, جۇمىسشى كاسىپتەرىن ناسيحاتتاۋ, ەڭ ۇزدىك ەڭبەك اۋلەتتەرى مەن كاسىپورىن جۇمىسشىلارىن ايقىنداۋ ماقساتىندا «ەڭبەك جولى» بايقاۋى جاريالانعان. ءارتۇرلى ماماندىق يەلەرى قاتىسقان بايقاۋ ناتيجەسى بويىنشا «ۇزدىك ەڭبەك اۋلەتى» نوميناتسياسىنىڭ بايگەسى اقسۋ اۋدانىنداعى تەمىر جول سالاسىندا 30 جىلدان استام ەڭبەك ەتكەن بوكەەۆتەر اۋلەتىنە بۇيىردى. ء«وندىرىستىڭ ۇزدىك جاس جۇمىسكەرى» اتانعان سارقان قالاسىنداعى «جەتىسۋ يزولياتور» كاسىپورنىنىڭ جاس ينجەنەرى ارمان مۋسين, «جۇمىس ىستەيتىن جاستاردىڭ ۇزدىك تالىمگەرى» اتاعىن يەلەنگەن تەكەلى قالاسى, رۋدنىي اۋىلىنداعى №17 ورتا مەكتەپتىڭ فيزيكا ءپانى مۇعالىمى التىناي القۋات 500 مىڭ تەڭگەنىڭ سەرتيفيكاتىن يەلەندى. اتالعان نوميناتسيالار بويىنشا ەكىنشى ورىن العاندارعا 300 مىڭ تەڭگە كولەمىندە سىيلىق تابىستالدى. بايقاۋدىڭ ءبىر شارتى – ونلاين داۋىس بەرۋ بويىنشا تاڭدالعان ماماندارعا 200 مىڭ تەڭگەلىك سىياقى تاعايىندالدى.
سالتاناتتى شارانىڭ سوڭى ەڭبەك ادامدارىنىڭ قۇرمەتىنە ارنايى دايىندالعان ءسۇيىنباي اتىنداعى وبلىستىق فيلارمونيا ۇجىمىنىڭ كونتسەرتىمەن جالعاستى.
جالپى, وبلىس بويىنشا بيىل يندۋستريالاندىرۋ كارتاسى اياسىندا شىنى جانە مەتالل قۇرىلىسى باعىتىنداعى قۇنى 14,3 ملرد تەڭگەنى قۇرايتىن 2 نىسان ىسكە قوسىلدى. جىل سوڭىنا دەيىن تاعى دا 5 جوبا اشىلادى دەپ كۇتىلۋدە. يندۋستريالاندىرۋ كارتاسى بويىنشا جوسپارلانعان 51 جوبانىڭ 43-ءى تولىققاندى ىسكە اسقان. جاڭا نىسانداردىڭ اشىلۋىنىڭ ارقاسىندا جانە شاعىن جانە ورتا بيزنەسكە دەگەن قولداۋ ناتيجەسىندە 22 مىڭ جاڭا جۇمىس ورنى اشىلىپتى. جۇمىسپەن قامتۋ باعىتىندا دا بىرقاتار شارۋالار قولعا الىنىپ, قازىر 8 مىڭنان استام ادام جاڭا ماماندىق يگەرىپ, ۇيرەنىپ جاتىر. بۇعان قوسىشا 733 ازاماتتىڭ جەكە كاسىبىن اشۋعا جانە ونى دامىتۋعا مۇمكىندىك العانىن, بۇعان 3,3 ملرد تەڭگە كولەمىندە قارجى جۇمسالعانىن ايتا كەتكەن ءجون.
الماس ءنۇسىپ,
«ەگەمەن قازاقستان»
الماتى وبلىسى
