بۇل جوبا ەلىمىزدىڭ بارلىق وڭىرلەرىندە جۇزەگە اسىرىلىپ, كىتاپ وقۋ مادەنيەتىن دامىتۋدى كوزدەپ وتىر. دەمەك ءاربىر ادام ءوز كىتابىمەن ءبولىسىپ, سورەدەن وزىنە ۇناعان كىتابىن الا الادى.
«ەلباسىمىزدىڭ «بولاشاققا باعدار: رۋحاني جاڭعىرۋ» ماقالاسىنا ساي جاستاردى كىتاپ وقۋعا باۋليتىن جوبانى ۇيىمداستىرىپ وتىرمىز. كىتاپ ارقىلى ءداستۇرىمىزدى, تاريحىمىزدى, دۇنيەنى تانۋعا بولادى. سوندىقتان بۇل الەۋمەتتىك ماڭىزى جوعارى جوبا دەپ بىلەمىز. كىتاپ سورەلەرىن ورنالاستىرۋدى استانا قالاسىنان باستادىق. ءوزىم وسى كىتاپ سورەسىنە مۇحتار اۋەزوۆتىڭ «اباي جولى» كىتابىن الىپ كەلدىم. قازاق ءتىلىن تەز مەڭگەرگىسى كەلگەن ادام «اباي جولى» كىتابىن وقىعان ءجون دەگەن ويدامىن», دەدى «بولاشاق» قاۋىمداستىعى كەڭەسىنىڭ توراعاسى مىندەتىن اتقارۋشى, ءماجىلىس دەپۋتاتى باقتيار ماكەن.
«بولاشاق» قاۋىمداستىعىنىڭ مۇشەسى ەرمەك ماقاشەۆتىڭ ايتۋىنشا, ءۇش اپتا ىشىندە الماتى, پەتروپاۆل جانە ورال قالالارىنان 800-دەن استام كىتاپ جينالعان.
«مەن قوعامعا ماڭىزى زور جوباعا ءوزىمنىڭ سۇيىكتى كىتاپتارىمنىڭ ءبىرىن تابىستاعىم كەلىپ وتىر. ول الەكساندر ديۋمانىڭ ء«ۇش نويان» كىتابى. ومىرىڭدە جاقسى كىتاپقا تاپ بولعان كەزدە, ونىمەن بولىسكىڭ كەلىپ تۇرادى ەكەن. ادەتتە دوستارىما وقىسىن, ءبىلسىن دەگەن نيەتپەن بەرەتىنمىن. ال ەندى ءبىر عانا كىتاپ داناسىنىڭ قالىڭ جۇرتشىلىققا تاراپ, پايدا تيگىزە الاتىنداي مۇمكىندىك تۋدى. سوندىقتان بارشامىزدى اتسالىسۋعا شاقىرامىن», دەدى وليمپيادا چەمپيونى, پارلامەنت ءماجىلىسىنىڭ دەپۋتاتى سەرىك ساپيەۆ.
سونىمەن قاتار شاراعا «استانا» حالىقارالىق قارجى ورتالىعىنىڭ باسقارۋشى ديرەكتورى, «بولاشاق» قاۋىمداستىعىنىڭ مۇشەسى ساياسات نۇربەك قاتىسىپ, كىتاپ وقۋ قاجەتتىلىگىنىڭ 5 سەبەبىن ءبولىپ ايتىپ بەردى.
«كىتاپتا ادامنىڭ وتكەن ومىرىندە جيناعان تاجىريبەسى, جاساعان قاتەلەرى باياندالادى. ياعني كىتاپتان تاجىريبە الۋىڭىزعا بولادى. ەكىنشىدەن, كىتاپ ابستراكتىلى تۇردە ويلاي ءبىلۋ قابىلەتىڭىزدى دامىتادى. ۇشىنشىدەن, ول ءسىزدىڭ سوزدىك قورىڭىزدى بايىتادى. ءبىزدىڭ ويلاي ءبىلۋ قابىلەتىمىز ءسوز بايلىعىمىزعا بايلانىستى, ال سوزدىك قوردى دامىتۋدىڭ جاقسى جولى ‒ كىتاپ وقۋ. ءتورتىنشى سەبەپ, كىتاپ ‒ ادامدى رۋحاني دامىتادى. كىتاپتان ءبىز الەۋمەتتىك مودەلدەردى, الەۋمەتتىك رولدەردى كورەمىز. بەسىنشى سەبەپ – كىتاپتى وقي وتىرىپ, الەم كەڭىستىگىنىڭ قانشالىقتى كەڭ ەكەنىن تۇسىنەسىز».
ال بيزنەسمەن, مەتسەنات قايرات قۇدايبەرگەن الماتىدا ءوز كومپانياسىنىڭ قارجىسىنا 10 بىردەي كىتاپ سورەسىن ورناتۋعا ۋادە بەردى.
«ماعان قازاق ادەبيەتى كلاسسيكتەرىنىڭ تۋىندىلارى وتە ۇنايدى. سونىمەن قاتار بيزنەس تۋرالى جازىلعان كىتاپتاردى وقۋعا تىرىسامىن. ادامنىڭ ءبىلىمى نەعۇرلىم تەرەڭ بولسا, ول سوعۇرلىم تابىسقا جەتە الادى دەپ ويلايمىن», دەدى قايرات قۇدايبەرگەن.
جوبا يدەياسىنىڭ اۆتورى – «بولاشاق» باعدارلاماسىنىڭ تۇلەگى لاۋرا دەمەسىنوۆا ەسىمدى بويجەتكەن. ول كىتاپ سورەلەرىن اشۋ تۋرالى يدەيا گەرمانيانىڭ گاننوۆەر قالاسىندا جۇرگەن كەزىندە كەلگەنىن ايتتى.
شارا سوڭىندا قوناقتار قاناتقاقتى جوبادا وقىعان كىتاپتارىمەن ءبولىسىپ, جاستاردى بەلسەندى بولۋعا شاقىردى.
ايگۇل شەرنياز,
«ەگەمەن قازاقستان»
سۋرەتتى تۇسىرگەن
ەرلان ومار,
«ەگەمەن قازاقستان»
