«ەل يگىلىگى جولىندا ۇزاق جىلدار تىنىمسىز ەڭبەك ەتكەن قاريالارىمىز – ءبىزدىڭ اسىل قازىنامىز, التىن قورىمىز. ەلباسىنىڭ «رۋحاني جاڭعىرۋ» باعدارلاماسى يگى داستۇرلەرىمىزدى, رۋحاني قۇندىلىقتارىمىزدى ناسيحاتتاپ, جاستاردى وتانسۇيگىشتىككە باۋلۋدى العا تارتىپ وتىر. وسى ورايدا قوعامنىڭ بەلسەندى مۇشەسى رەتىندە سىزدەردىڭ وي-پىكىرلەرىڭىزدىڭ, اقىل-كەڭەستەرىڭىز بەن تاجىريبەلەرىڭىزدىڭ تاربيەلىك ءمانى زور», - دەدى اۋدان اكىمى.
سالتاناتتى شارا بارىسىندا ن.سىدىقوۆ جارما ءوڭىرىنىڭ دامۋىنا ۇلەس قوسقان كابىكەن ايساعوجينوۆ, پايزوللا مۋسينوۆ, قىزىرحان اعىمباەۆ سىندى اقساقالدارعا قۇرمەت گراموتالارىن تاپسىردى.
«سىزدەردىڭ توككەن تەر, ەتكەن ەڭبەكتەرىڭىزدىڭ جەمىسىن ۇرپاقتارىڭىز كورىپ وتىر. سىزدەردەن ءتالىم العان وسكەلەڭ ورەندەر ناتيجەلى ىستەرىڭىزدى جالعاستىرىپ, ەگەمەن ەلىمىزدىڭ ەڭسەسىن تىكتەي بەرسىن. اۋدان ورتالىعىنان ارداگەرلەر ءۇيىن اشۋعا قولداۋ تانىتىپ, قامقور بولعان اۋدان اكىمىنە العىسىمىزدى ايتامىز. الداعى ۋاقىتتا جارما اۋدانىنىڭ ارداگەرلەر كەڭەسىنىڭ جۇمىسى بۇدان ءارى جاندانا تۇسەدى دەپ سەنەمىز», - دەدى شارا بارىسىندا ءسوز العان ايتقازى شەرۋباەۆ.
وبلىستىق ارداگەرلەر كەڭەسىنىڭ توراعاسى ءوز كەزەگىندە اۋداندىق ارداگەرلەر كەڭەسىنىڭ توراعاسى نۇرلىبەك ەسپولوۆ پەن قالباتاۋ اۋىلدىق وكرۋگىنىڭ ارداگەرلەر كەڭەسىنىڭ توراعاسى ساياسي مالعاجداروۆتى «ارداگەرلەر ۇيىمىنا 30 جىل» مەرەكەلىك مەدالىمەن ماراپاتتادى.
جاڭا عيماراتقا يە بولعان ارداگەرلەردىڭ قۋانىشىندا شەك جوق. «ارداگەرلەر وتاۋىنىڭ اشىلۋى ۇيىمنىڭ جۇمىس اياسىن كەڭەيتەدى. اعا بۋىن وكىلدەرىمىز وسىندا باس قوسىپ, ۋاقىتتارىن ءتيىمدى وتكىزۋمەن قاتار, ءتۇرلى تاقىرىپتا پىكىر الماسىپ, قوعام دامۋىنا وزىندىك ۇلەسىن قوساتىن بولادى», - دەيدى جارما اۋدانىنىڭ قۇرمەتتى ازاماتى ءرازيا سارسەمباەۆا.
«وسى ۋاقىتقا دەيىن ارنايى عيماراتتىڭ بولماۋى كوپ ىسكە قول بايلاۋ بولىپ كەلگەن ەدى. ەندىگى كەزەكتە ءوزىمىز ىڭعايلى ۋاقىتتا باسقوسۋلار ۇيىمداستىرىپ, ءتۇرلى شارالار وتكىزەتىن بولامىز», - دەيدى اۋداندىق ارداگەرلەر كەڭەسى توراعاسىنىڭ ورىنباسارى سەيىتبەك اقاەۆ.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى
