قازىر اقسۋ قانت زاۋىتىندا قىزۋ ناۋقان قارقىن الدى. قىزىلشانىڭ العاشقى لەگى وتكىزىلىپ جاتىر. العاشقى قىزىلشا قابىلداۋ سالتاناتتى تۇردە اتالىپ ءوتتى. الماتى وبلىسى اكىمىنىڭ ورىنباسارى سەرىكجان بەسكەمپىروۆ اقسۋ قانت زاۋىتىنا ارنايى بارىپ, ءتاتتى ءتۇبىر وتكىزۋدى باستاپ كەتكەن كوپشىلىكتى قۇتتىقتادى.
– وسىدان ون جىل بۇرىن جۇمىسىن توقتاتقان قانت زاۋىتى ەندى ءبىر ايدان سوڭ قايتا ىسكە قوسىلىپ, جۇمىسىن باستايدى. سول ۋاقىتتا بۇل جەردە تالاي ادامنىڭ جۇمىسپەن قامتىلۋىنا جول اشىلىپ, اۋدان تىنىسى ودان ءارى كەڭەيەتىن بولادى. مۇنىڭ سىرتىندا ماماندار دا دايارلاندى. ياعني بۇل ءوڭىر ەكونوميكاسىنىڭ العا جىلجىپ, ءوسىپ-وركەندەۋىنە ايتارلىقتاي ىقپال ەتەدى دەپ سەنەمىز.
زاۋىتقا ونىمدەرىن وتكىزەتىن اقسۋ جانە سارقان اۋداندارىنىڭ اكىمدەرى ادىلبەك دالباعاەۆ پەن ەرعازى قوشانبەكوۆ جانە اۋىل اقساقالدارى دا ەل قۋانىشىن ءبولىسىپ, قۇتتى بولسىن ايتتى. لەنتا قيىلىپ, ءان-كۇي ورىندالعان سالتاناتتى شارادان سوڭ كولىكتەرگە تيەلگەن ءونىمنىڭ العاشقى لەگى قانت قىزىلشاسىن قابىلداۋ پۋنكتىنە ەنگىزىلدى. ءوڭىر ديقاندارىنىڭ قارقىنى جوعارى. باستاپقى كۇننىڭ وزىندە 200 تونناعا جۋىق قىزىلشا قابىلداندى. تاياۋداعى 3 جىلدا تەك اقسۋ قانت زاۋىتىنا اكەلىنەتىن ءونىمنىڭ جالپى كولەمى 300 مىڭ تونناعا جەتەدى. ايماق جۇرتشىلىعى الداعى ۋاقىتتا قىزىلشا القابىن ودان ءارى ۇلعايتىپ, ءونىم كولەمىن ارتتىرۋعا كۇش جۇمساماق. اكىمشىلىك تاراپىنان جاسالعان قولداۋدىڭ ارقاسىندا اشىلعان «اقسۋ» بۇل شارۋاشىلىقتى جانداندىرۋعا, ەگىستىك كولەمىن ۇلعايتۋعا تولىقتاي مۇمكىندىك بەرەدى.
«اقسۋ قانت زاۋىتى» جاۋاپكەرشىلىگى شەكتەۋلى سەرىكتەستىگى ديرەكتورىنىڭ مىندەتىن اتقارۋشى ساكەن مۇراتوۆتىڭ ايتۋىنشا, كوكتەم ايىنان بەرى ەسكىرگەن قۇرىلعىلار تۇگەلدەي قايتا جاڭارتىلعان. قىزىلشا جيناقتاۋ الاڭى عانا ەمەس, بارلىق تسەحتارى جۇمىسقا دايىن, جاڭا قۇرال-جابدىقتار ورناتىلعان, بارلىق تەحنولوگيالىق پروتسەستەر اۆتوماتتاندىرىلعان. وسىنداي جۇمىستاردى جۇزەگە اسىرۋ ءۇشىن بۇگىنگى كۇنگە دەيىن بارلىعى جەتى جارىم ميلليارد تەڭگە قاراجات سالىنىپتى. زاۋىتتىڭ مەرزىمىنەن كەشىكتىرىلىمەي ىسكە قوسىلۋىنا بارلىق جاعداي قاراستىرىلعان. قانت قىزىلشاسىن قابىلداپ بولعاسىن, زاۋىت تولىقتاي ىسكە قوسىلىپ, العاشقى ءونىمىن شىعاراتىن بولادى. ال ازىرگە, ەگىستىك پەن زاۋىت اراسىن قىزىلشا وسىرۋشىلەردىڭ تاسىمالى جالعاپ تۇر. بۇل جول – ەڭ نەگىزگى جول. ارعى مەجە بەرىسى رەسپۋبليكانى قامتاماسىز ەتىپ, ءارىسى شەتەلدەرگە ەكسپورتتاۋ. قازان ايىندا جەتى جۇزگە جۋىق ادامدى جۇمىسپەن قامتيتىن زاۋىتتا تىرشىلىك قايناپ جاتىر.
الماس ءنۇسىپ,
«ەگەمەن قازاقستان»
الماتى وبلىسى
