ەكىنشى كەزەڭدە دانيالىق ياكوب فۋلسانگ 3 ساعات 58 مينۋت 01 سەكۋند ۋاقىتپەن العاشقى بولىپ مارە سىزىعىن كەستى. ەكىنشى ورىندا قازاقستاندىق الەكسەي لۋتسەنكو 12 سەكۋندقا كەشىگىپ جەتتى. ال ءۇشىنشى ورىنعا شۆەيتساريالىق سپورتشى كريس ستۋسسي تابان تىرەدى.
وسىلايشا, كاسىبي حالىقارالىق ۆەلوجارىستىڭ جالپى ەسەبى بويىنشا الەكسەي لۋتسەنكو «الماتى تۋرى - 2017» ۆەلوجارىسىنىڭ چەمپيونى اتاندى. ونىڭ جالپى ۋاقىتى 07:47:43. ايتۋلى دودانىڭ كۇمىس جۇلدەسىمەن الەكسەيدەن 55 سەكۋندقا قالىپ قويعان, رەمي دي گريگوري كۇپتەلدى. ال قولانى ۆەلوجارىسنىڭ ەكىنشى كەزەڭىنىڭ جەڭىمپازى ياكوب فۋلسانگ قاناعات تۇتتى – 01:04.
- بۇگىنگى بايگە قيىن بەرىلدى. ءبىزدىڭ ۇجىم ەكى كۇن بويى كەرەمەت ونەر كورسەتتى. بۇگىن ياكوب باسىمدىق تانىتادى دەپ كەلىسكەن بولاتىنبىز, ويتكەنى ول تاۋلى ايماقتاردىڭ شەبەرى, سونداي-اق, ءوز «سۇراپىلىن» سەزىنۋگە مۇمكىندىك الدى. مارەگە دەيىن 5 كم قالعاندا, ياكوب ءبىرىنشى جەتۋ ءۇشىن جاعدايدى باقىلادىم. بۇل مەنىڭ وسى ماۋسىمداعى سوڭعى بايگەم, ەندى تۋعان پەتروپاۆلوۆسك قالاما ورالىپ, دەمالامىن, كەلەسى ماۋسىمعا كۇش جينايمىن, - دەپ ءبولىستى الەكسەي لۋتسەنكو.
سونىمەن قاتار, قازاقستاندىق الەكسەي لۋتسەنكو "سپرينتەرلىك كلاسسيفيكاتسيا جەڭىمپازى", "جالپى كلاسسيفيكاتسيا جەڭىمپازى" جانە "ۇزدىك قازاقستاندىق ۆەلوشاباندوز" نوميناتسيالارىن جەڭدى. ال "تاۋ كاسىبي كلاسسيفيكاتسياسىنىڭ جەڭىمپازى" اتاعىنا تاۋنسەند روري يە بولدى.
جەڭىمپازدار مەن جۇلدەگەرلەردى ماراپاتتاۋ راسىمىنە قالا اكىمى باۋىرجان بايبەك قاتىسىپ, ۆەلودادانى قورىتىندىلادى:
- ءبىز «الماتى تۋر» حالىقارالىق ۆەلوجارىسىن وسىمەن بەسىنشى رەت وتكىزدىك. وسى جىلى كاسىبي ۆەلودودا جاڭا دەڭگەيگە ءوستى. حالىقارالىق ۆەلوسيپەدشىلەر وداعى (UCI) كەلىسىمىمەن, كوپكۇندىك تاسجولداعى ۆەلوجارىس اتاعىنا يە بولدى. ەۋروپا جانە ازيا قۇرلىعىنىڭ 17 ەلىنەن 20 كوماندانىڭ قالامىزدا ونەر كورسەتۋى ءبىز ءۇشىن ۇلكەن مارتەبە. ءبىز ۆەلوسپورتتىڭ دامۋىنا اسا كوڭىل بولەمىز. Astana Pro Team كومانداسىن جەڭىسىمەن شىن جۇرەكتەن قۇتتىقتايمىن. مىڭ بوياۋلى الماتى قالاسى - الەمدىك دەڭگەيدەگى القالى جيىندار مەن سپورتتىق شارالار وتەتىن وڭىرلىك ورتالىققا اينالدى. وسىناۋ سپورتتىق ءىس-شارالار قالالىق ينفراقۇرىلىمنىڭ قارقىندى دامۋىنا, تۇرعىندار اراسىندا ۆەلوسپورتتى ناسيحاتتاۋدا, وزىندىك ىقپالىن تيگىزەرى ءcوزسىز, - دەپ اتاپ ءوتتى قالا اكىمى باۋىرجان بايبەك.
ۆەلوجارىستىڭ ەكىنشى كەزەڭى «حالىق ارەنا» عيماراتىندا باستالدى, جانە «شاج-ءال-فارابي» مارشرۋتىمەن تۇڭعىش پرەزيدەنتتىڭ ساياباعىنان «مەدەۋ» تاۋ شاڭعىسى كۋرورتىنا دەيىن جالعاستى.
ايتا كەتەيىك, ءبىرىنشى كەزەڭدە الەكسەي لۋتسەنكو جارىس جولىن 3 ساعات 49 مينۋت جانە 52 سەكۋندتا باعىندىردى. ال ەكىنشى بولىپ مارەگە فرانتسۋز ۆەلوشاباندوزى رەمي دي گريگوري جەتسە, يراندىق ميرساماد پۋرسەديگولاxار قولا جۇلدەنى قاناعات تۇتتى.
