ونىڭ جۇمىسىنا ءوڭىر جەتەكشىلىگى, قۇقىق قورعاۋ ورگاندارى, كۇش قۇرىلىمدارىنىڭ وكىلدەرى, تاربيەشى وفيتسەرلەر, اسكەر ارداگەرلەرى مەن جالپى ءبىلىم بەرەتىن وقۋ ورىندارىنىڭ وقۋشىلارى قاتىسقان بولاتىن.
مەملەكەت باسشىسى ن.نازارباەۆتىڭ «بولاشاققا باعدار: رۋحاني جاڭعىرۋ» كولەمدى باعدارلاماسىن جۇزەگە اسىرۋ, قۇقىقتىق ءتارتىپ اسكەرلەرىنىڭ يگى داستۇرلەرى مەن تاريحىن ساقتاۋ مەن كەلەشەك ۇرپاققا جەتكىزۋ ماقساتىندا مۇنداي باسقوسۋلار زيالى قاۋىم وكىلدەرىنىڭ قاتىسۋىمەن ەلىمىزدىڭ ءار ايماعىندا وتكىزىلىپ كەلەدى.
ەلباسى ءوز ماقالاسىندا «جاڭا تۇرپاتتى جاڭعىرۋدىڭ ەڭ باستى شارتى – ۇلتتىق كودىڭدى ساقتاي ءبىلۋ. ول زامانا سىنىنان سۇرىنبەي وتكەن وزىق داستۇرلەردى تابىستى جاڭعىرتۋدىڭ ماڭىزدى العىشارتتارىنا اينالدىرا ءبىلۋ قاجەت» ەكەندىگىن ناقتى اتاپ كورسەتتى.
«قۇقىقتىق ءتارتىپ اسكەرىنىڭ اياعىنان تىك تۇرىپ, دامۋ تاريحى, ونىڭ وتكەنى مەن كەلەشەگى ەلىمىزدىڭ تاريحىمەن ەتەنە بايلانىستى. ۇلتتىق ۇلاننىڭ تاريحىن مەملەكەتىمىزدە تىنىشتىقتى ساقتاپ, قوعامدىق قاۋىپسىزدىكتى قامتاماسىز ەتۋ ارقىلى ونىڭ جاۋىنگەرلەرى جاسايدى. ەل ءوز باتىرى مەن ەرجۇرەك ەرلەرىن ءبىلۋى قاجەت. جاس ۇرپاق ولاردىڭ ەرلىگى ۇلگىسىندە تاربيەلەنىپ, اعا ۇرپاقتىڭ يگى ءداستۇرىن لايىقتى جالعاستىرۋى پارىز. وسى ورايدا جانە «قازاقستاننىڭ 100 جاڭا ەسىمى» كولەمدى جوباسى اياسىندا ۇلتتىق ۇلان باس قولباسشىسى گەنەرال-لەيتەنانت رۋسلان جاقسىلىقوۆتىڭ باستاماسىمەن ءبىزدىڭ اسكەردە وسىنداي تەكتەس «ۇلتتىق ۇلاننىڭ 100 جاڭا ەسىمى» جوباسىن وتكىزۋ تۋرالى شەشىم قابىلداندى», دەدى ءوز سوزىندە گەنەرال-مايور مۇحامەتقالي ساتوۆ.
اتاپ ايتۋ كەرەك, اتالعان جوبا ۇلتتىق ۇلاننىڭ ءار اسكەري ءبولىمىن قامتيدى. اسكەري بولىمشەلەر قولباسشىلىعى, اسكەر ارداگەرلەرى جانە اسكەري قوعامدىق ۇيىمدار وكىلدەرىنەن تۇراتىن كوميسسيا قۇرامى لايىقتى دەگەن ۇمىتكەرلەردى ولاردىڭ سىڭىرگەن ەڭبەكتەرى, قىزمەتتىك-جاۋىنگەرلىك ارەكەتتەگى جەتىستىكتەرى جانە مەملەكەتتىك ناگرادالاردىڭ يەلىك ەتۋىنە قاراي باعالايدى.
100 جاڭا ەسىم جوباسى العاشقىدا ءار اسكەري بولىمدە, كەيىن وڭىرلىك قولباسشىلىق دەڭگەيىندە, تەك سودان بارىپ ۇلتتىق ۇلان كولەمىندە ىرىكتەلەدى. جوبانىڭ جەمىستى ناتيجەسى رەتىندە ۇلتتىق ۇلاننىڭ جاڭا ەسىمدەرىنىڭ ءومىرى مەن تاريحى تۋرالى ارنايى كىتاپ جارىققا شىقپاق. سونداي-اق, جاڭا ەسىمدەر جايلى مالىمەتتەر ۆەدومستۆونىڭ رەسمي سايتىندا دا ورنالاستىرىلادى. جوبا 2018 جىلدىڭ ماۋسىم ايىنا دەيىن جالعاساتىن بولادى.
نۇرلىبەك دوسىباي,
«ەگەمەن قازاقستان»
