جيىندى جۇرگىزگەن ۇلتتىق بيۋرو باسشىسىنىڭ ورىنباسارى ماقسات دۇيسەنوۆ مەملەكەتتىك ءتىلدىڭ ۇلتتىق ساياساتتىڭ دىڭگەگى بولۋى قاجەتتىگىن باياندادى. «بۇگىنگى قازاقستان – جاڭعىرعان قوعام. ءار ۇلتتىڭ ءوز رۋحاني كودى بولادى. جاڭا تۇرپاتتى جاڭعىرۋدىڭ باستى شارتى – ۇلتتىق كودتى, ونىڭ ىشىندە مەملەكەتتىك ءتىلدى ساقتاۋ. بۇل تاريحىمىزدان جانە سالت-داستۇرىمىزدەن بايلانىس ۇزبەۋگە سەپتىگىن تيگىزەدى», دەدى ول.
باسقوسۋ بارىسىندا پرەزيدەنت جانىنداعى مەملەكەتتىك باسقارۋ اكادەمياسى ديپلوماتيا ينستيتۋتىنىڭ پروفەسسورى نازيگۇل تولەنبەرگەنوۆانىڭ بايانداماسى تىڭدالدى. ول ءوز سوزىندە سوڭعى ءبىر عاسىردا ءوز تىلدەرىن جوعالتىپ, وزگە تىلدەردىڭ ىقپالىندا كەتكەن حالىقتار تۋرالى اڭگىمەلەدى. سونداي-اق ەلىمىزدە ورىس ءتىلىنىڭ ۇستەمدىك قۇرۋىنا نەگىز بولعان ءبىرشاما جايتتاردى, اتاپ ايتقاندا تىڭ جەرلەردى يگەرۋ ماقساتىندا كسرو-نىڭ باسقا رەسپۋبليكالارىنان اكەلىنگەن ءجۇز مىڭداعان ورىس ءتىلدى حالىقپەن قارىم-قاتىناستىڭ جۇزەگە اسۋىن, كەن ورىندارىن يگەرۋ ماقساتىندا سالىنعان ليساكوۆ, رۋدنىي, تەمىرتاۋ سياقتى قالالاردىڭ پايدا بولۋىن, قالالاردا قازاق مەكتەپتەرىنىڭ جابىلىپ قالعان جاعدايلارىن اتاپ ءوتىپ, بۇل ماسەلەلەردىڭ ءالى كۇنگە دەيىن سالقىنىن تيگىزىپ كەلە جاتقانىن اڭگىمە وزەگىنە اينالدىردى.
ەلباسىنىڭ ستراتەگيالىق قۇجاتتارى – ۇلىتاۋدا سويلەگەن سوزىندە, «بولاشاققا باعدار: رۋحاني جاڭعىرۋ» ماقالاسىندا ۇلتتىق بىرەگەيلىكتى ساقتاۋ, ۇلتتىق كودتى ساقتاۋ تۋرالى ايتىلعان. سوندىقتان مەملەكەتتىك تىلدە سويلەۋ, جازۋ ەڭ الدىمەن مەملەكەتتىك قىزمەتشىلەردەن تالاپ ەتىلۋى ءتيىس», دەدى ن.تولەنبەرگەنوۆا. پروفەسسور ۇلتتىق بيۋرو قىزمەتشىلەرىنە ءتىلدى ۇيرەنۋدىڭ ەڭ وزىق ءادىس-تاسىلدەرىن دە كورسەتىپ بەردى.
ودان باسقا, ءىس-شارا شەڭبەرىندە مەملەكەتتىك ەلتاڭبانىڭ 3D مودەلدەرمەن بەينەلەنگەن بەينەماتەريالدارى كورسەتىلىپ, مەملەكەتتىك رامىزدەر بويىنشا ترەنينگ وتكىزىلدى.
ايگۇل سەيىل,
«ەگەمەن قازاقستان»
