نەگىزىنەن, پارتيا فراكتسياسىنىڭ جانىنداعى كوميسسيانىڭ مىندەتى – «تۇرعىن ءۇي-كوممۋنالدىق شارۋاشىلىق ينفراقۇرىلىمىن, سۋمەن جانە جىلۋمەن جابدىقتاۋ جەلىلەرىن جاڭعىرتۋ, تۇرعىن ءۇي ينفراقۇرىلىمىن نىعايتۋ» باعىتى بويىنشا «نۇرلى جول» ينفراقۇرىلىمدى دامىتۋدىڭ 2015-2019 جىلدارعا ارنالعان مەملەكەتتىك باعدارلاماسىن ىسكە اسىرۋعا قازاقستان رەسپۋبليكاسىنىڭ ۇلتتىق قورىنان بولىنەتىن قاراجاتتىڭ جانە بيۋدجەتتىك قاراجاتتىڭ ماقساتتى جانە ءتيىمدى جۇمسالۋىنا باقىلاۋ جۇرگىزۋ. اتالعان ماسەلە وسى سەبەپتى دەپۋتاتتار تالقىسىنا شىعارىلعان بولاتىن.
مەملەكەتتىك «نۇرلى جول» باعدارلاماسى اياسىندا ەلىمىزدەگى تۇرعىن ءۇي ينفراقۇرىلىمدارى جۇيەسىن, اتاپ ايتقاندا, جىلۋ مەن سۋ جانە كارىز قۇبىرلارىن قايتا جاڭعىرتۋدان وتكىزۋگە ارنايى ماقساتتا قارجىلاندىرۋ قاراستىرىلعان. ال بۇل سالاداعى جۇمىستار ناقتىلانعان ەكى باعىت بويىنشا جۇزەگە اسىرىلۋدا. ونىڭ العاشقىسى – جىلۋ مەن سۋ جانە كارىز قۇبىرلارىن جاڭعىرتۋ.
ينۆەستيتسيالار جانە دامۋ مينيسترلىگى ۇسىنعان مالىمەتتەرگە كوز جۇگىرتسەك, بۇگىندە جۇمىس جوسپارى بيۋدجەتتىك نەسيەلەندىرۋ جانە سۋبسيديالاۋ ءادىسى ارقىلى ورىندالۋدا. وسى ماقساتتا 2015-2017 جىلدار ارالىعىندا يگەرىلۋى ءتيىس دەپ بولىنگەن قاراجات كولەمى 203 ملرد تەڭگەنى قۇرايدى. ناتيجەسىندە, 332 جوبا اياسىندا 3 208 شاقىرىم جىلۋ, سۋ مەن كارىز قۇبىرى جەلىسى جانە 34 قازاندىق پەن 16 بىرلىك شارۋاشىلىق نىساندارى كۇردەلى جوندەۋدەن وتكىزىلۋى ءتيىس. سونداي-اق ەكىجىلدىق باعدارلاما ارقىلى 1 848 شاقىرىم قۇبىر جەلىلەرى جاڭادان توسەلىپ, سۋ جاڭا 21 قازاندىق پەن 12 سۋ سورۋ ستانساسى ىسكە قوسىلادى دەپ جوسپارلانعان.
«وسىنىڭ ىشىندە بيۋدجەتتىك نەسيەلەندىرۋ ادىسىمەن باعدارلاما اياسىندا 2015 جىلى 60 ملرد تەڭگە, 2016 جىلى 86,9 ملرد تەڭگە يگەرىلىپ, 211 جوبا جۇزەگە اسىرىلىپ, 1983,7 شاقىرىم ينفراقۇرىلىمدىق جەلىلەر جوندەۋدەن وتكىزىلدى. ال ەندى بۇگىنگى تاڭدا تابيعي مونوپوليا نىساندارىنا بولىنگەن قاراجات كولەمى 75,4 ملرد تەڭگەنى قۇرايدى, بۇل جالپى كورسەتكىشتىڭ 87 پايىزىنا تەڭ. ەندى جىل سوڭىنا دەيىن قالعان 11,5 ملرد تەڭگە (13 پايىز) تولىق يگەرىلەدى دەپ كوزدەپ وتىرمىز. جالپى, بيىلدىققا 103 ينۆەستيتسيالىق جوباعا بولىنگەن 48 ملرد تەڭگە كەرى قايتارىپ الىندى. وسىنىڭ ەسەبىنەن الداعى ۋاقىتتا 1 200 شاقىرىم قۇبىر جەلىسىن جاڭارتۋدى جوسپارلاۋدامىز», دەدى ر.سكليار.
ال ەندى بيۋدجەتتىك قارجى ەسەبىنەن سۋبسيديالاۋ ادىسىنە كەلەر بولساق, بۇل جەردە جوبالاردىڭ جالپى قۇنىنىڭ 50 پايىزىنا دەيىنگى بولىگى عانا مەملەكەت تاراپىنان قارجىلاندىرىلىپ, ودان وزگەسى حالىقارالىق قارجى ۇيىمدارىنىڭ ينۆەستيتسياسى ەسەبىنەن جۇزەگە اسىرىلادى.
وسى ورايدا ايرىقشا اتاپ وتەرلىك جايت, جوبا اياسىندا وڭىرلەردەگى تۇرعىن ءۇي شارۋاشىلىعىنىڭ دامۋىنا دەن قويىلاتىندىعى بولسا كەرەك. بيىلعى سەگىز ايدىڭ ىشىندە رەسپۋبليكا بويىنشا 6,9 ملن شارشى مەتر تۇرعىن ۇيگە جوندەۋ جۇمىستارى جۇرگىزىلگەن. بۇل وتكەن جىلعى كورسەتكىشپەن سالىستىرعاندا 8,4 پايىزعا كوپ. ال تۇرعىن ءۇي قۇرىلىسىنا تارتىلعان ينۆەستيتسيا كولەمى 507,8 ملرد تەڭگەنى قۇراعان. ءسويتىپ سالاعا قاتىستى جالپى جىلدىق جوسپاردىڭ ورىندالۋ كورسەتكىشى 68 پايىز بولىپ وتىر. بۇل جەردە مەجەلەنگەن كورسەتكىشتە 10,1 ملن شارشى مەتر باسپانا سالۋ كوزدەلگەن كورىنەدى. ماماندار پىكىرىنشە, بۇگىنگىدەي قارقىن العان جۇمىس ىرعاعىنا قاراپ جوسپار ورىندالماي قالادى-اۋ دەپ الاڭداۋعا نەگىز جوق.
نۇرلىبەك دوسىباي,
«ەگەمەن قازاقستان»
