ۇلتتىق قاۋىپسىزدىك كوميتەتى ەل تىنىشتىعىنىڭ بەرىك قورعانى. الايدا, قىزىعى مەن قۇپياسى مول بۇل سالانىڭ قىزمەتى جايلى كوپ ايتىلا بەرمەيدى. اۆتور اتالمىش ەڭبەگىندە بارلاۋشىلاردىڭ بىلايعى جۇرت اڭعارا بەرمەيتىن ەرەكشە قاسيەتتەرىن, جاۋاپتى جۇمىستىڭ قىر-سىرىن بۇكپەسىز دە بوياماسىز بەينەلەۋگە تىرىسقان. كىتاپتا وسى سالانىڭ ورىستەۋىنە ورەلى ۇلەس قوسىپ, قاجىرلى ەڭبەك ەتكەن ازاماتتاردىڭ عيبراتتى جولى كەيىنگىلەرگە ۇلگى رەتىندە كوركەم كورىنىس تاپقان. «قايىرجان تورەجانوۆ قالام قۋاتىن سىرى كوپكە بەلگىسىز وسى سالانىڭ ۇڭعىل-شۇڭعىلىن زەرتتەۋگە جۇمساعان. جارىق كورىپ وتىرعان «سىرتقى بارلاۋ» كىتابى وسىنىڭ انىق دالەلى,» دەيدى كىتاپتىڭ تۇساۋكەسەرىنە جينالعان زيالى قاۋىم وكىلدەرى.
تىڭ تۋىندىنىڭ تۇساۋكەسەر راسىمىندە قازاقستاندىق بارلاۋ قىزمەتىنە باسشىلىق جاساعان گەنەرالدار – تالعات امىرعاليەۆ, مۇرات سىزدىقوۆ, عابيدەن بەكمۇحامەدوۆتەر وقىرماندارعا جول تارتقان جاڭا ەڭبەككە اقجول تىلەپ, الداعى ۋاقىتتا بارلاۋشىلار ومىرىنەن سىر شەرتەتىن وسى تەكتەس كىتاپتار كوپتەپ جازىلسا دەگەن تىلەك پىكىرلەرىن ءبىلدىردى. سونداي-اق ەلوردادان ارنايى كەلگەن رەسپۋبليكالىق ۇقك ارداگەرلەرى كەڭەسىنىڭ توراعاسى كەنجەبولات بەكنازاروۆ ارىپتەسىمىزدى ۇقك توراعاسىنىڭ بۇيرىعىمەن بەرىلگەن «ۇلتتىق قاۋىپسىزدىك كوميتەتىنە 25 جىل» توسبەلگىسىمەن ماراپاتتادى. ال, سىرتقى بارلاۋ قىزمەتى تاراپىنان الماتى ارداگەرلەر كەڭەسىنىڭ توراعاسى گەنەرال-مايور بولات مەشىنباەۆ «سىربار» وفيتسەرلەر جينالىسىنىڭ شەشىمىمەن تاعايىندالعان 500 مىڭ تەڭگەنىڭ سەرتيفيكاتىن جانە تمد ارنايى قىزمەت ارداگەرلەرى كەڭەسىنىڭ اتىنان ارداگەر-بارلاۋشى قابدولدا بەكجانوۆ «پ. سۋدوپلاتوۆ» اتىنداعى مەدالدى تاپسىردى.
ەسكە سالساق, ەلىمىزدەگى «بارلاۋ» قىزمەتى ەلباسى جارلىعىمەن 1997 جىلدىڭ 5 قاراشاسىندا قۇرىلعان ەدى. وسىلايشا, سىرتقى بارلاۋ سالاسىنداعى ۋاكىلەتتى ورگاننىڭ قۇرىلعانىنا بيىل 20 جىل تولىپ وتىر.
– جالپى, بارلاۋشىلار دەگەن كىمدەر, ولار ءدال قازىر نەمەن اينالىسىپ ءجۇر دەگەن سۇراققا ەشكىم جاۋاپ بەرە المايدى. بارلاۋشىنىڭ قانداي قىزمەتتە ەكەندىگىن ءتىپتى تىعىز قارىم-قاتىناس جاسايتىن كورشىلەرىنىڭ دە بىلمەۋى زاڭدى. ولاردىڭ وزدەرى اتقاراتىن قىزمەتتەرى جايلى ەڭ جاقىن ادامدارىنا, بالالارىنا, ءتىپتى نەمەرەلەرىنە دە قۇپيالىلىعى اشىلعانشا كەيبىر وپەراتسيالار تۋرالى ەشتەڭە ايتا المايدى. سوندىقتان وسىنداي دەرەكتى كىتاپ كەرەك. كىتاپتىڭ جارىق كورۋىنە «سىربار» – سىرتقى بارلاۋ قىزمەتى تىكەلەي قولداۋ كورسەتتى. الداعى ۋاقىتتا وسى باعىتتا سەريالى كىتاپتار جازسام دەگەن جوسپارىم بار, – دەيدى «سىرتقى بارلاۋ» كىتابىنىڭ اۆتورى قايىرجان تورەجانوۆ.
شىنايى دەرەككوزدەردەن, ارحيۆتەردەن الىنعان ماقالالاردىڭ نەگىزىندە جازىلعان ورەلى ەڭبەك ارقىلى وقىرماندار وتاندىق بارلاۋشىلاردىڭ قىزمەتى جايلى مول ماعلۇماتقا قانىعاتىن بولادى. سوندىقتان تىڭ تۋىندى بارشا وقىرمانداردىڭ قىزىعۋشىلىعىن تۋدىرادى دەگەن سەنىمدەمىز.
ارمان وكتيابر,
«ەگەمەن قازاقستان»
الماتى
