كوميتەت توراعاسى جەڭىس نۇرعاليەۆ وتىرىستى اشا كەلىپ, مەملەكەت باسشىسى نۇرسۇلتان نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا اگرارلىق سەكتوردى ەكونوميكانىڭ جاڭا درايۆەرىنە اينالدىرۋ قاجەتتىگى تۋرالى ايتقانىن ەسكە سالدى.
ج. نۇرعاليەۆ ءوز سوزىندە سالانىڭ جاعدايىنا تالداۋ جاسادى. ونىڭ ايتۋىنشا, اۋىل شارۋاشىلىعى ونىمدەرىن وندىرۋشىلەردىڭ كوپشىلىگى سالىق سالۋ, سۋبسيديالاۋ جونىندەگى جاڭادان ەنگىزىلگەن ەرەجەلەردى بىلە بەرمەيدى, ونىڭ سوڭى مەملەكەتتىك تۇرعىدا قابىلدانعان شارالارعا كوڭىل تولماستىعىنا اكەلىپ سوعادى.
سەناتور اتاپ وتكەندەي, بۇل سالالىق مينيسترلىكتىڭ جەرگىلىكتى بيلىك ورگاندارىنداعى ءتيىستى قۇرىلىمدارمەن زاڭنامانى ءتۇسىندىرۋ جونىندەگى قالىپتاسقان جۇمىستاردىڭ جوقتىعىن كورسەتەدى.
سونداي-اق سەنات دەپۋتاتتارىنىڭ ايماقتاردا اۋىل ەڭبەككەرلەرىمەن كەزدەسۋلەرىندە كوتەرىلەتىن ماسەلەلەر دە ايتىلدى. اتاپ ايتقاندا, اۋىل شارۋاشىلىعى كووپەراتيۆتەرىنىڭ وكىلدەرى سۋبسيديالاۋ مەن سالىق سالۋ ماسەلەلەرى بويىنشا ولقىلىقتاردى كورسەتىپ وتىرادى. ج.نۇرعاليەۆ بۇل جاعدايدا اۋىل شارۋاشىلىعى ورگاندارىمەن قاتار سالىق ورگاندارى دا اۋقىمدى ءتۇسىندىرۋ جۇمىستارىن جۇرگىزۋى كەرەك دەپ سانايدى.
وتىرىسقا قاتىسۋشىلار الدىندا قوستاناي وبلىسى اكىمىنىڭ ورىنباسارى عاۋەز نۇرمۇحامبەتوۆ, اۋىل شارۋاشىلىعى ءمينيسترىنىڭ ءبىرىنشى ورىنباسارى قايرات ايتۋعانوۆ, مەملەكەتتىك ورگانداردىڭ وكىلدەرى, اۋىل شارۋاشىلىعى مەكەمەلەرىنىڭ باسشىلارى ءسوز سويلەدى. شاراعا سەناتورلار اڭسار مۇساحانوۆ, بەكمىرزا ەلامانوۆ, مۇحتار جۇماعازيەۆ, دۇيسەنعازى مۋسين, ءابدالى نۇراليەۆ قاتىستى.
سەنات كوميتەتىنىڭ توراعاسى ج. نۇرعاليەۆ وتىرىستى اياقتاي كەلىپ, ايتىلعان وزەكتى ماسەلەلەر مەن ۇسىنىستار پارلامەنتتىڭ جانە اۋىل شارۋاشىلىعى مينيسترلىگىنىڭ جۇمىسىندا پايدالاناتىنىنا سەنىم ءبىلدىردى.
ساپار اياسىندا پارلامەنتشىلەر قوستاناي وبلىسىنىڭ اكىمى ارحيمەد مۇحامبەتوۆپەن كەزدەسىپ, ايماقتى دامىتۋ جوسپارىمەن تانىستى. ا. مۇحامبەتوۆتىڭ ايتۋىنشا, بيىل اۋىل شارۋاشىلىعى ءۇشىن ءونىمدى جىل بولدى. ەگىن جيناۋ ناۋقانى بارىسىندا 5 ميلليونعا جۋىق استىق جينالدى. جاڭعىرۋعا جانە ءونىم وڭدەيتىن جاڭا ءوندىرىستىڭ كوبەيۋىنە بايلانىستى اۋقىمدى مۇمكىندىكتەر اشىلىپ وتىر.
دەپۋتاتتار رۋدنىي قالاسىندا بولىپ, «جاس قانات – 2006» جشس قۇس فابريكاسىنىڭ جۇمىسىمەن تانىستى. كاسىپورىن باسشىسى قايرات مايىشەۆ ەكولوگيالىق تۇرعىدا تازا ونىمدەردى, جۇمىرتقا مەن ەت ءوندىرۋدى قامتاماسىز ەتەتىن ءوندىرىستى دامىتۋ تۋرالى ايتتى. ءوندىرىستى جاڭعىرتۋ جونىندەگى جوبا اياسىندا الدىڭعى قاتارداعى ەۋروپالىق ءوندىرىستىڭ تەحنولوگيالىق جابدىقتارى قويىلىپ, قۇس سانى مەن ەڭبەك ونىمدىلىگىن ارتتىرۋعا جانە جاڭا جۇمىس ورىندارىن اشۋعا مۇمكىندىك بەردى.
پارلامەنتشىلەر سونداي-اق «سوكولوۆ-سارباي كەن بايىتۋ ءوندىرىس بىرلەستىگى» اق كارەرلەرىنىڭ بىرىندە دە بولدى.
ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ پروفەسسورلىق-وقىتۋشىلار قۇرامىمەن جانە ستۋدەنتتەرمەن كەزدەسۋ بارىسىندا دەپۋتاتتار عىلىمي جەتىستىكتەر مەن يننوۆاتسيالاردى اۋىل شارۋاشىلىعى سالاسىنا ەنگىزۋ ماسەلەلەرىن قاراستىردى. ۋنيۆەرسيتەت جانىندا قۇرىلعان اگروتەحنولوگيالىق حابتىڭ كەلەشەگىنە ەرەكشە نازار اۋدارىلدى.
ساپار باعدارلاماسىندا ايماقتاعى بىرقاتار كاسىپورىنداردىڭ باسشىلارىمەن جانە ەڭبەك ۇجىمدارىمەن كەزدەسۋلەر دە بار.
