ۇزاقباي قارامانوۆ 1937 جىلى 29 تامىزدا قىزىلوردا وبلىسىنداعى ارال اۋدانىنىڭ ۇيالى اۋىلىندا تۋعان. 1959 جىلى ا.ي.ميكويان اتىنداعى كۋيبىشەۆ ينجەنەرلىك قۇرىلىس ينستيتۋتىن ءتامامداپ, 1961 جىلى كسرو ساۋلەت جانە قۇرىلىس اكادەمياسى جانىنداعى جوعارى ينجەنەرلىك كۋرستىڭ تىڭداۋشىسى بولدى.
ەڭبەك جولىن 1959 جىلى اقتوبە وبلاۆتوترەسىنىڭ شۇبار قۇدىق اۆتوبازاسىندا پروراب رەتىندە باستاپ, 1961 − 1964 جىلدارى «قىزىلورداقۇرىلىس» ترەسىنىڭ وندىرىستىك-تەحنيكالىق ءبولىمىنىڭ اعا ينجەنەرى, ارال قالاسىندا قۇرىلىس باسقارماسىنىڭ باستىعى بولىپ ەڭبەك ەتتى. 1965 – 1980 جىلدارى «الماتىونەركاسىپقۇرىلىس» مەكەمەسىندە, «باسالماتىقۇرىلىس» قازاق كسر اۋىر يندۋستريا كاسىپورىندارى قۇرىلىسى مينيسترلىگىنىڭ باس باسقارماسىندا باسشىلىق قىزمەتتەر اتقاردى.
1980 – 1986 جىلدارى قازاق كسر جەڭىل ونەركاسىپ ءمينيسترىنىڭ ورىنباسارى, قازاق كسر قۇرىلىس ءمينيسترىنىڭ ءبىرىنشى ورىنباسارى لاۋازىمدارىن اتقاردى. 1987 جىلعى ساۋىردە قازاق كسر ماتەريالدىق-تەحنيكالىق جابدىقتاۋ مەملەكەتتىك كوميتەتىنىڭ توراعاسى بولدى.
1989 جىلعى شىلدەدە ۇزاقباي قارامانوۆ قازاق كسر مينيسترلەر كەڭەسىنىڭ توراعاسى, 1990 جىلعى قاراشادا قازاق كسر-ءىنىڭ پرەمەر-ءمينيسترى بولىپ تاعايىندالدى.
ۇزاقباي قارامانوۆ قازاق كسر جوعارعى كەڭەسىنىڭ XII, XIII شاقىرىلىمدارىنىڭ, ەكىنشى شاقىرىلىمداعى (1999-2004 جىلدار) جانە ءۇشىنشى شاقىرىلىمداعى (2004-2007 جىلدار) قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ سايلاندى.
ۇزاقباي قارامانوۆ ءىى دارەجەلى «بارىس», ەڭبەك قىزىل تۋ وردەندەرىمەن جانە كوپتەگەن مەدالدارمەن, قۇرمەتتى اتاقتارمەن ماراپاتتالعان.
ۇزاقباي قارامانوۆ قازىرگى قازاقستاننىڭ قالىپتاسۋىنا, رەسپۋبليكانىڭ قۇرىلىس سالاسىنىڭ دامۋىنا ەلەۋلى ۇلەس قوستى. ول ءوز ەلىنىڭ شىنايى پاتريوتى, بىلىكتى باسشى جانە جوعارى دەڭگەيدەگى كاسىبي مامان بولدى.
ۇزاقباي قارامانوۆتىڭ جارقىن بەينەسى ءبىزدىڭ جۇرەگىمىزدە ءاردايىم ساقتالادى.
قازاقستان رەسپۋبليكاسىنىڭ ۇكىمەتى
