سونىڭ ءبىرى تاڭىربەرگەن اۋىلدىق وكرۋگى اۋماعىنداعى «كەرۋەن ساراي» كەمپينگى دەۋگە بولادى. اتالعان كاسىپكەرلىك نىسان جوعارىدا اتالعان «باتىس ەۋروپا – باتىس قىتاي» حالىقارالىق كولىك ءدالىزىنىڭ 44-شاقىرىمىندا ورنالاسقان. اۋماعى 800 شارشى مەتردى الىپ جاتقان قىزمەت كورسەتۋ ورنى وتكەن جىلى پايدالانۋعا بەرىلگەن. مۇندا 180 ورىندىق قوعامدىق تاماقتاندىرۋ جانە ەكى ادامدىق نومىرلەردەن تۇراتىن قوناقۇي كەشەندەرى ورنالاسقان. بۇعان قوسا مونشا, كىر جۋ كومبيناتى سەكىلدى قوسالقى نىساندار ىسكە قوسىلعان. مەنشىك يەلەرى كەلەسى كەزەكتە كەمپينگ اۋماعىندا سپورت الاڭدارىن اشىپ, بۇل ماڭايدى اباتتاندىرۋ مەن كوگالداندىرۋ ماسەلەلەرىن ويلاستىرىپ وتىر ەكەن.
وسى ورايدا «كەرۋەن ساراي» سەكىلدى كەمپينگتەر 10-نان اساتىنىن ايتۋىمىز كەرەك. بۇعان قوسا بيىلعى جىلى تاعى دا 3 كەمپينگ پايدالانۋعا بەرىلمەك. ال ءبىز جۋرناليستىك ىسساپارمەن اۋدانعا جولىمىز تۇسكەن كۇنى «ازيا» اتتى ينفراقۇرىلىمدىق نىساننىڭ اشىلۋ ءراسىمى وتكىزىلدى. الداعى جىلى اۋداندا ىرگە كوتەرەتىن قىزمەت كورسەتۋ نىساندارى بىرنەشە ەسە وسەدى دەپ كۇتىلۋدە. بۇل ءۇشىن حالىقارالىق كولىك ءدالىزى بويىنان 83 جەر تەلىمى بولىنگەن.
وسى رەتتە ء«بىز ەل اۋماعىنداعى «باتىس ەۋروپا – باتىس قىتاي» حالىقارالىق كولىك ءدالىزى قۇرىلىسىن اياقتاۋ ارقىلى ءبىرتۇتاس ينفراقۇرىلىمدىق جۇيەنىڭ قالىپتاسۋىن قامتاماسىز ەتە الامىز» دەگەن مەملەكەت باسشىسى نۇرسۇلتان نازارباەۆتىڭ ءسوزى ويعا ورالا بەرەدى. شىن مانىندە ءدال سولاي بولىپ وتىرعانىنا اقتوبە وبلىسى اۋماعىندا اشىلعان كاسىپكەرلىك باعىتتاعى نىساندار مەن ينفراقۇرىلىمدىق جۇيەلەر كۋا.
مارتوكتەگى كاسىپكەرلىك نىساندار قاتارىنىڭ ەكىنشى ءبىر لەگىن اۋىل شارۋاشىلىعى بيزنەسىنە قاتىستى قۇرىلىمدار قۇرايدى. مۇنىڭ ىشىندە «ايس» جشس تاۋارلى ءسۇت فەرماسىنىڭ ورنى ەرەكشە ەكەنى كامىل. ونىڭ 110 باس انالىق ءىرى قارا مالعا ارنالعان قوس كەشەنى بار. مۇندا ءار كۇن سايىن 20 توننا ءسۇت وڭدەلىپ ساۋدا ورىندارىنا جىبەرىلەدى. شارۋاشىلىق وزدەرىن جەمشوپپەن جانە وزگە دە قاجەتتى مال ازىعى تۇرلەرىمەن تولىقتاي قامتاماسىز ەتىپ وتىر. مۇنىڭ باستى كوزى سۋدان ءشوبى جانە جۇگەرى وسىرىلەتىن القاپتار بولىپ تابىلادى.
بۇگىنگى كۇنى رەسپۋبليكامىزدىڭ بارلىق وڭىرلەرى مەن اۋىل-اۋداندارىنا ءتان كوڭىلسىز كورىنىستىڭ ءبىرى مال تەرىلەرىنىڭ پايداعا اسىرىلماي, وڭدەلمەي اياقاستى بولىپ جاتقانى دەسەك شىندىقتان اۋىتقىمايمىز. «ايتا ايتا التايدى, جامال اپاي قارتايدى» دەگەندەي, بۇل ءوزى قايتا قايتا ايتىلىپ ابدەن جاۋىر بولعان ماسەلە ەكەنىنە دە ەشكىم تالاس تۋعىزا المايدى. الايدا بۇدان ەشقانداي ناتيجە شىقپاي كەلگەنىمەن دە ەرىكسىز كەلىسۋگە تۋرا كەلەدى. ايتايىن دەگەنىمىز, وسى ولقىلىقتىڭ ورنىن مارتوك اۋدانىنداعى «وپتيما-كاپيتال» جشس تولتىرىپتى.
وسى جەكەمەنشىك كاسىپورىننىڭ باسى-قاسىندا جۇرگەندەر ءىرى-قارا مالىنىڭ تەرىلەرىن باستاپقى وڭدەۋدەن وتكىزەتىن ىرگەلى ءوندىرىستىڭ قۇرىلۋىنا باستاماشى بولا ءبىلىپتى. بۇل قۇپتاۋعا دا, قولداۋعا دا ابدەن لايىقتى قادام دەپ بىلەمىز. جالپى اۋماعى 924 شارشى مەتردى قۇرايتىن ءوندىرىس ورنى جەكە كاسىپكەرلىك قاراجاتى ەسەبىنەن سالىنعان. مۇنداي ارقايسىنىڭ سيىمدىلىعى 6 توننا بولاتىن ءۇش دىڭگەك پەن ءۇش دىلدەك ورناتىلعان.
وسى سيپاتتاعى وڭدەۋ ونەركاسىبى ءبىرىنشى كەزەكتە ۆەتەرينارلىق نورماتيۆتەر مەن تالاپتاردى قاتاڭ ساقتاۋدى قاجەت ەتەتىنى بەلگىلى. وسى ورايدا كومپانيا جەتەكشىلەرى اۋا تازارتاتىن قوندىرعىلاردى ورناتۋعا باسا كوڭىل بولگەنى دە جاعىمدى جايت. بيىل «كەڭ دالا» باعدارلاماسى بويىنشا قوماقتى نەسيەگە قول جەتكىزگەن «وپتيما-كاپيتال» جشس-ءنىڭ ءىرى قارا مالىنىڭ تەرىسىن وڭدەۋدى قولعا العان جەتەكشى ماماندارى الداعى جىلى ءوز ىستەرىنىڭ اۋقىمىن ودان ءارى ءوسىرۋدى ۇيعارعان. ولار تەك بيىلعى جىلدىڭ وزىندە 100 تونناعا جۋىق شيكىزات وڭدەپ, ونىڭ بەلگىلى ءبىر بولىگىن ءوزارا كەلىسىمگە سايكەس تۇركياعا جىبەرىپتى.
تەمىر قۇسايىن,
«ەگەمەن قازاقستان»
اقتوبە وبلىسى,
مارتوك اۋدانى
