ءبىر كەزدە جامبىل وبلىسىنىڭ بىرەگەي جوباسى رەتىندە قولعا الىنىپ, حالىقتى جۇمىسپەن قامتۋدا ءبىراز ەڭبەك ەتكەن وڭىردەگى كەيبىر كاسىپورىندار بۇگىندە جۇمىسشىلارىن كوك تيىنسىز قالدىرىپ وتىر. ءوڭىر ەكونوميكاسىن ورگە باستىرىپ, الەۋەتىن ارتتىراتىن دەيتىندەي كاسىپورىنداردىڭ مۇنىسى اقىلعا سىيا قويمايتىن نارسە. ماسەلەن, وبلىستىق ەڭبەك ينسپەكتسياسى باسقارماسىنىڭ مالىمەتى بويىنشا, اعىمداعى جىلى 8 كاسىپورىندا 922 جۇمىسكەر الدىندا 99,035 ميلليون تەڭگە جالاقى قارىزى انىقتالعان. «بۇگىنگى كۇنگە 170 جۇمىسكەردىڭ الدىنداعى 54,4 ميلليون جالاقى قارىزدار بانكروت جانە وڭالتۋ راسىمدەرى جۇرگىزىلىپ جاتقان «قورداي تسەمەنت زاۋىتى» جشس مەن «پودگورنىي» اكتسيونەرلىك قوعامى ۇلەسىندە. بۇل كاسىپورىندارداعى جالاقى قارىزىن وتەۋى بويىنشا شارالاردى «وڭالتۋ جانە بانكروتتىق تۋرالى» قازاقستان رەسپۋبليكاسى زاڭىنا سايكەس جامبىل وبلىسى بويىنشا مەملەكەتتىك كىرىستەر دەپارتامەنتى تاعايىنداعان كونكۋرستىق باسقارۋشى جۇرگىزۋدە. ال, قالعان 6 كاسىپورىنعا 44,6 ميلليون جالاقى قارىزدارىن وتەۋ ءۇشىن, مەملەكەتتىك ەڭبەك ينسپەكتورلارى زاڭ تالاپتارىنا سايكەس جۇمىس بەرۋشىلەر ورىنداۋعا مىندەتتى نۇسقامالار بەرىپ, اكىمشىلىك شارالار قولدانىلدى. قابىلدانعان شارالاردىڭ ناتيجەسىندە 30,4 ميلليون تەڭگە ءوندىرىلىپ, 702 جۇمىسكەردىڭ قۇقىقتارى قورعالدى», دەيدى باسقارما باسشىسى سەرعالي ايداپكەلوۆ.
بىراق بۇگىنگى كۇنگە ءۇش ايدان اسا مەرزىمى وتكەن جالاقى قارىزدارى «كازپروممونتاج» جانە «مەكەن جاي تاراز» كاسىپورىندارىندا 50 جۇمىسكەر الدىندا 14,2 ميلليون تەڭگەنى قۇراپ, بۇل قاراجات تولىق وتەلمەي وتىر. سونداي-اق وسى تىزىمدە وتكەن جىلى «Talas Investment Company», «جامبىل مەتاللقۇراستىرۋ زاۋىتى-يمستالكون», «تارازحيممونتاج» جاۋاپكەرشىلىگى شەكتەۋلى سەرىكتەستىكتەرى مەن «ACIG» اكتسيونەرلىك قوعامى بولعان. الايدا بۇگىندە «Talas Investment Company» كاسىپورنىندا وندىرىستىك قاۋىپسىزدىك, ەڭبەك جانە قورشاعان ورتانى قورعاۋ جۇمىستارىنىڭ باسقارۋ جۇيەسى قۇرىلىپ, كاسىپورىن زاڭ تالاپتارىنا ساي جۇمىس ىستەپ وتىر.
ەندى جۇمىسشىلاردىڭ ەڭبەك قۇقىعىن قورعاۋدا اتالعان باسقارما قانداي جۇمىس اتقارىپ وتىر؟ «مەملەكەتتىك ەڭبەك ينسپەكتورلارى 125 كاسىپورىن مەن مەكەمەنى تەكسەرىپ, باقىلاۋ شارالارىن جۇرگىزۋ ناتيجەسىندە, قازاقستان رەسپۋبليكاسى ەڭبەك زاڭناماسىنىڭ تالاپتارىن بۇزعان جۇمىس بەرۋشىلەرگە ولاردى جويۋ تۋرالى 59 نۇسقاما بەرىلىپ, 30 ايىپپۇل, 13 ەسكەرتۋ تۇرىندەگى اكىمشىلىك شارالار قولدانىلدى. سالىنعان ايىپپۇلدىڭ جالپى سوماسى 4,832 ميلليون تەڭگەنى قۇراپ, ونىڭ 3,857 ميلليون تەڭگەسى ءوندىرىلدى», دەيدى سەرعالي ومىرزاق ۇلى.
اتى دارداي كاسىپورىنداردىڭ جۇمىسشىلاردىڭ قۇقىعىنا بەي-جاي قاراماعانى دۇرىس. اۋليەاتانىڭ الەۋەتىن تانىتاتىن, اتىن شىعاراتىن, ەكونوميكاسىن وركەندەتەتىن مەكەمەلەر ءۇشىن بۇل قيىن شارۋا ەمەس.
حاميت ەسامان,
«ەگەمەن قازاقستان»
جامبىل وبلىسى
