2017 جىلدىڭ 8 ايىندا قازىناعا تۇسكەن سالىق ءتۇسىمى كۇتىلگەن مەجەدەن ارتىعىمەن ورىندالىپ, 102,2 پايىزعا جەتكەن. ياعني, مەملەكەتتىك بيۋدجەتكە سالىقتان تۇسكەن قارجى 4,3 تريلليون تەڭگەنى قۇرادى.
سونىمەن قاتار, ا.قىپشاقوۆ سالىق كودەكسىنە ەنگىزىلگەن وزگەرىستەر تۋرالى ايتىپ بەردى. ونىڭ سوزىنە سۇيەنسەك, 2017 جىلعى 1 مامىردان باستاپ قوسىمشا قۇن سالىعى بويىنشا تىركەۋ ەسەبىنە قويۋ ءراسىمى وڭايلاتىلعان. «سالىق تولەۋشى كابينەتى» نەمەسە «ەلەكتروندىق ۇكىمەت» پورتالى ارقىلى ەلەكتروندى ءوتىنىش بەرۋگە مۇمكىندىك ەنگىزىلگەن.
ا.قىپشاقوۆتىڭ ايتۋىنشا, قىزمەت كورسەتۋدى تەرريتورياعا قاراماي جۇرگىزۋگە قاتىستى 6 وبلىستا قانات قاقتى جوبا ىسكە قوسىلىپتى. جاڭا جۇيەدە كاسىپكەر سالىق قىزمەتىن ەلەكتروندى تۇردە جۇرگىزە الادى. سونداي-اق, جەكە كاسىپكەرلەردى ەسەپكە الۋ جۇيەسى دە جەڭىلدەتىلگەن.
«2016 جىلعا دەيىن كاسىپكەر بىزگە كەلىپ, ءوتىنىش جازىپ, ەكى قۇجات وتكىزەتىن. سودان كەيىن 2 اەك كولەمىندە تىركەۋ اقىسىن تولەيتىن. بيىلدان باستاپ ونىڭ ءبارىن ەلەكتروندى تۇرگە اۋىستىرىپ, تولەمدى الىپ تاستادىق. قازىر كەز كەلگەن جەكە كاسىپكەر ەلەكتروندى حاتپەن ءوتىنىشىن جىبەرەدى. بۇرىن 2,5 ساعات كەتەتىن جۇمىس قازىرگى تاڭدا 9 مينۋتقا جەتپەي ورىندالادى», – دەدى ا.قىپشاقوۆ.
قوسىمشا قۇن سالىعىن تولەۋشىلەردى تىركەۋ دە جەڭىلدەتىلگەن. بۇرىن مۇنداي قىزمەت كورسەتۋگە 5 كۇن كەتسە, قازىرگى تاڭدا 1 كۇن ىشىندە ورىندالادى.
«بيۋدجەتتى كودتاۋ كلاسسيفيكاتسياسىنا دا ءتيىمدى وزگەرىستەر ەنگىزىلدى. ماسەلەن, بۇرىن ازامات جەر سالىعىن تولەۋ ءۇشىن 8 ءتۇرلى كود جازۋ كەرەك بولاتىن. قاراپايىم ادام ءۇشىن بۇل قيىندىق تۋعىزادى. بۇگىندە كودتار سانى 2-گە ازايتىلدى. سونىڭ ناتيجەسىندە, قاتە تولەم مولشەرى 40 پايىزعا تومەندەدى», – دەپ اتاپ ءوتتى ا.قىپشاقوۆ.
«ەلەكتروندىق شوت-فاكتۋرا» جۇيەسىن ەنگىزۋ جونىندە دە ايتارلىقتاي جۇمىستار اتقارىلدى. سونىڭ ناتيجەسىندە, بيىلعى 1 قىركۇيەككە دەيىن 142 مىڭ قولدانۋشى تىركەلىپ, 17 تريلليون تەڭگە سوماسىنداعى 54 ميلليون ەلەكتروندىق شوت-فاكتۋرا جازىلىپتى. ا.قىپشاقوۆتىڭ ايتۋىنشا, مۇنداي جۇيەمەن جۇمىس جاساۋ سالىق تولەۋدەن جالتارۋ دەڭگەيىن تومەندەتەدى.
كوميتەت توراعاسىنىڭ ورىنباسارى ا. قىپشاقوۆتىڭ دەرەكتەرىنە سايكەس, 2017 جىلى مەكەمە 12,5 ميلليون ءتۇرلى قىزمەت كورسەتكەن. سونىڭ 88 پايىزى ەلەكتروندى تۇردە جۇرگىزىلىپتى. سالىقتىق ەسەپ پەن بەرەشەكتىڭ بولماۋى جونىندەگى انىقتاما الۋ قىزمەتى باسقالارعا قاراعاندا ەڭ كوپ قولدانىلعان.
ا.قىپشاقوۆتىڭ سوزىنە سۇيەنسەك, مەملەكەتتىك مەكەمەلەرمەن اقپاراتتىق بايلانىس ءتيىمدى جۇرگىزىلىپ كەلەدى. بۇرىن باج سالىعىن قايتارۋ ءۇشىن سوتتىڭ شەشىمىن قاعاز تۇرىندە اكەلۋ قاجەت بولاتىن. قازىر مۇنىڭ ءبارى اۆتوماتتى تۇردە سالىق تولەۋشىنىڭ قاتىسۋىنسىز جۇرگىزىلەدى. ارنايى حالىققا قىزمەت كورسەتۋ ورتالىقتارىندا اۆتوكولىكتى تىركەمەستەن بۇرىن كىرىستەر كوميتەتىنەن ونىڭ سالىقتارى تولەنگەنى جونىندە انىقتاما قاجەت ەتىلەتىن. بۇگىندە حقكو قىزمەتكەرلەرىنە تولەمدى تەكسەرۋگە رۇقسات بەرىلگەن.
سالىق جۇيەسىن جەتىلدىرۋ بارىسىندا اتقارىلعان جۇمىستاردى تۇرعىندار جوعارى باعالاپ وتىر. وسىدان ون جىل بۇرىن كاسىپكەرلەردىڭ ەلدەگى سالىق جۇيەسىنە قاناعاتتانۋ دەڭگەيى 41 پايىز بولسا, بيىل بۇل مولشەر 79 پايىزعا كوتەرىلگەن. سونداي-اق, حالىقتىڭ قاناعاتتانۋى 84 پايىزعا ۇلعايعان.
اباي اسانكەلدى ۇلى,
«ەگەمەن قازاقستان»
