– رۋمىنياعا قارسى ويىنعا دەگەن دايىندىقتارىڭىز قانداي دارەجەدە؟
– رۋمىنيا – وتە مىقتى قۇراما. بىلتىر فرانتسيادا وتكەن ەۋروپا چەمپيوناتىندا ءساتتى ونەر كورسەتتى. مەنىڭشە, ءبىزدىڭ فۋتبولشىلار رۋمىنداردان جەڭىلمەۋگە ءتيىس. جانكۇيەرلەر تارتىستى ويىنعا كۋا بولادى دەپ ويلايمىن. ءبىز سوڭعى ەكى ماتچتى ءساتتى وتكىزىپ, كەز كەلگەن كومانداعا لايىقتى قارسىلىق كورسەتە الاتىنىمىزدى دالەلدەۋىمىز كەرەك. مەن ءوز كومانداما, فۋتبولشىلارىما سەنەمىن.
– بىلتىر استانادا وتكەن ويىندا رۋمىنيامەن تەڭ ويناپ, ءبىر ۇپاي العان ەدىك. سىرت الاڭدا دا ۇپاي الۋ ءۇشىن نە ىستەۋ كەرەك دەپ ويلايسىز؟
– ءبىر ويىن ءبىر ويىنعا ەشقاشان سايكەس كەلمەيدى. بەلگىلى ءبىر ويىنداعى ءاربىر جاعداي كەلەسى ماتچتا وزگەرىپ وتىرادى. مىسالى, پولشاعا قارسى وتكەن ويىندا رومان مۇرتازاەۆ گول سالىپ, 1:0 ەسەبىمەن العا شىعىپ ەدىك. بىراق, ول گولدى تورەشى ەسەپتەمەي تاستادى. ءدال وسى گول بۇكىل ويىن ناتيجەسىن وزگەرتىپ جىبەرۋى مۇمكىن ەدى. سوندىقتان, ويىن ورنەگىنە بىرنەشە فاكتورلار اسەر ەتەدى. قازىرگى ۋاقىتتا ءبىز قاتەلىكتەرمەن جۇمىس ىستەپ, جاتتىعۋلارىمىزدى پىسىقتاپ جاتىرمىز. ءبىزدىڭ ءدال قازىرگى باستى كەمشىن تۇسىمىز – ستاندارتتى جاعداي.
– ءبىزدىڭ قۇراما ارمەنياعا قارسى ويىنعا قانداي كوڭىل-كۇيمەن شىعادى دەپ ايتا الاسىز؟
– مەن ءاردايىم ءوز فۋتبولشىلارىما سەنەمىن. بۇيىرتسا, الداعى رۋمىنياداعى ويىندا جەڭىسكە جەتىپ, ارمەنياعا قارسى جاقسى كوڭىل-كۇيمەن وينايمىز دەگەن نيەتتەمىن.
– رۋمىنياعا قارسى ويىنعا بەلدى ويىنشىلار باۋىرجان يسلامحان, يۋري لوگۆينەنكو جانە گەورگي جۋكوۆتىڭ قاتىسا المايتىنى بەلگىلى. بۇل الداعى ويىنعا قانشالىقتى اسەر ەتۋى مۇمكىن؟
– فۋتبولشىلاردىڭ جاراقات الۋى بەلگىلى ءبىر دەڭگەيدە ويىنعا اسەر ەتەدى. الداعى ماتچتا ۇلتتىق قۇرامانىڭ وزگە ويىنشىلارىنا سەنىم ارتىپ جانە ولاردىڭ وزدەرىن كورسەتۋلەرىنە مۇمكىندىك بەرەمىز.
ەگەر 2018 جىلعى الەم چەمپيوناتىنىڭ ىرىكتەۋ كەزەڭىندەگى ويىندارعا تالداۋ جاسايتىن بولساق, ەكى كەزدەسۋدە فۋتبولشىلارىمىزدىڭ ءبىرى الاڭنان قۋىلىپ, ون اداممەن قالعان كەزىمىز بولدى. ارينە, بۇل ويىننىڭ ناتيجەسىنە تىكەلەي اسەر ەتتى. سول ءبىر ءسات ويىنشىنىڭ قىزىل قاعاز الۋىنا تۇرارلىق پا ەدى؟ مىنە, وسى جونىندە كوبىرەك ايتۋعا بولار... بىراق, مۇنى دا باستى نازاردا ۇستاپ, الداعى ۋاقىتتا قاتەلىكتى قايتالاماۋعا تىرىسۋىمىز كەرەك. مۇنداي جوعارى دەڭگەيلى ماتچتاردا ون ويىنشىمەن ويناۋ وڭايعا سوقپايدى.
– ەرەۆاندا وتكەن ماتچتا ۇلتتىق قۇرامامىز لايىقتى ونەر كورسەتتى. ەگەر ويىنشىمىز الاڭنان قۋىلماعاندا ارمەنيا استاناسىنان كەمىندە ءبىر ۇپاي الۋىمىز ابدەن مۇمكىن ەدى عوي...
– نەگىزى ءبىز ناشار وينادىق دەپ ايتا المايمىن. بەلگىلى ءبىر ۋاقىتتا ماتچ تىزگىنىن ءوز قولىمىزعا الدىق, باسىمدىعىمىز دا ءبىلىنىپ جاتتى. بىراق فۋتبولشىلاردىڭ جەكەلەگەن شەبەرلىگى ايتارلىقتاي ءرول اتقارادى. قۇرامامىزدا جوعارى دەڭگەيلى جىگىتتەر جينالعان. ولار كەز كەلگەن ۇجىمعا قارسى لايىقتى دەڭگەيدە ويناي الادى. سوندىقتان كومانداما سوڭىنا دەيىن سەنىم ارتاتىن بولامىن.
– محيتارياندى تۇساۋ ءۇشىن قانداي امالدار قولدانۋدى جوسپارلاپ وتىرسىز؟
– فۋتبول – كوماندالىق ويىن. سوندىقتان بۇل جەردە كوماندانىڭ قالاي ارەكەت ەتەتىنى ماڭىزدى. ويىنشىلاردىڭ دۇرىس نۇسقاۋلار الۋى جانە جىلدام ويلاي ءبىلۋى قاجەت. قارسىلاسىڭدى جەڭگىڭ كەلسە, فيزيكالىق دەڭگەيىڭ, شەبەرلىگىڭ جاقسى بولۋى كەرەك. سونداي-اق, باسىمدىعىڭدى كورسەتۋ ءۇشىن پسيحولوگيالىق تۇرعىدا دا دايىن بولعان ءجون.
– جانكۇيەردىڭ قولداۋى دا كۇش بەرەدى ەمەس پە؟!
– ارينە, جانكۇيەرلەرىمىزگە تەك سەنىم ارتىڭىزدار, قولداۋ بىلدىرىڭىزدەر دەگىم كەلەدى. ويتكەنى, جاسىل الاڭعا ەلدىڭ ەڭ باستى كومانداسى شىعادى. وكىنىشكە قاراي, سوڭعى كەزدەرى جانكۇيەرلەرىمىزدى قۋانتا الماي ءجۇرمىز. بىراق قانداي قيىن جاعداي بولماسىن, ەل نامىسىن قورعايتىن ۇجىمعا قولداۋ ءبىلدىرۋ كەرەك. كوماندامىزدىڭ قيىن كەزەڭىنە قاراماي سەنىم ارتىپ, قولداۋ كورسەتكەن ءار ادامعا العىسىم شەكسىز. ۇجىمداعى جىگىتتەردىڭ ءبارى ەل نامىسىن قورعايتىنىن, سونىمەن قاتار ارتىندا جاعدايىن ويلاپ, الاڭداپ وتىرعان قالىڭ حالقىنىڭ بارىن جاقسى بىلەدى. ءبىز الاڭعا تەك جەڭىلۋ ءۇشىن عانا شىقپاعانىمىزدى دالەلدەيتىن بولامىز. سوڭىنا دەيىن كۇرەسىپ, رۋمىنيادا جانكۇيەرلەرىمىزدى ريزا ەتكىمىز كەلەدى. جەڭىسكە جەتۋ ءۇشىن قولىمىزدان كەلگەننىڭ ءبارىن جاسايمىز.
اڭگىمەلەسكەن ءالي بيتورە,
«ەگەمەن قازاقستان»
