قوستاناي وبلىسىندا ون ءتورت وتباسى باسپانالى بولدى. ونىڭ ىشىندە ون وتباسى تۇرعىن ءۇي قۇرىلىس جيناق بانكىنىڭ سالىمشىلارى بولىپ تابىلادى. ون ءتورت ادامنىڭ بارلىعى دا جەر تەلىمىنە كەزەكتە تۇرعان بولاتىن. «نۇرلى جەر» باعدارلاماسىنىڭ جەكە تۇرعىن ءۇي قۇرىلىسىن دامىتۋعا ارنالعان قاناتقاقتى جوباسىنىڭ اياسىندا مەملەكەت سالىمشىلارعا تيەسىلى 10 سوتىق جەردى عانا بەرىپ قويماي, سول جەر تەلىمىندە تۇرعىن ءۇي سالۋعا دا كومەكتەستى.
قوستاناي قالاسىنىڭ ىرگەسىندە ورىن تەپكەن قوستاناي اۋدانىنداعى زارەچنىي اۋىلىنىڭ «سەۆەرنىي» شاعىن اۋدانىندا العاشقى بولىپ ءۇي العان قۋانىش يەلەرىن قوستاناي وبلىسىنىڭ اكىمى ارحيمەد مۇحامبەتوۆ پەن تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا قۇتتىقتاپ, باسپانا كىلتىن تابىس ەتتى.
«ەلباسىنىڭ تاپسىرماسىمەن ەلىمىزدە «نۇرلى جەر» باعدارلاماسى جۇزەگە اسىپ جاتىر. قازاقستاندا ءبىرىنشى بولىپ, ءبىزدىڭ قوستانايلىقتار وسى باعدارلاما اياسىندا باسپانالى بولدى. ينفراقۇرىلىمىنا 600 ميلليون تەڭگە كەتتى. وعان سۋ مەن گاز قۇبىرلارى جۇرگىزىلدى. ەندى 1 ميلليارد 900 ميلليون تەڭگە كەلەسى جىلى جول سالۋعا جانە 250 ميلليون تەڭگە كاناليزاتسيا قۇبىرلارىن سالۋعا جۇمسالاتىن بولادى. باسپانا سالۋعا بولىنەتىن قارجى كولەمى جىل سايىن ۇلعايىپ كەلەدى. ول 2015 جىلمەن سالىستىرعاندا 5 ەسە كوبەيدى. تاعى دا 400 ميلليارد تەڭگە قاراستىرىپ وتىرمىز, مۇنىمەن ارينە توقتامايدى, الداعى جىلدارى قوسىمشا تاعى دا قارجى قاراستىراتىن بولامىز» دەدى ارحيمەد بەگەجان ۇلى.
تۇڭعىش رەت رەسپۋبليكادا ادامدار مەملەكەتتىك باعدارلاما اياسىندا پاتەر ەمەس, جەر ۋچاسكەسى بار, كوتتەدج الىپ وتىر.
ء«بىز اكىمدىك, قۇرىلىس جۇرگىزۋشى كومپانيالار, تۇرعىن ءۇي قۇرىلىس جيناق بانكى جانە قازاقستان يپوتەكالىق كومپانياسى بىرلەسىپ, قازاقستاندىقتارعا قولجەتىمدى جولمەن, ارتىق سالماق تۇسىرمەي باسپانالى بولۋعا كومەكتەسىپ جاتىرمىز» دەدى تۇرعىن ءۇي قۇرىلىس جيناق بانكىنىڭ باسقارما ءتورايىمى ءلاززات يبراگيموۆا.
قوستاناي قالاسىنىڭ تۇرعىنى سەرىك قابيەۆ ون جىل بۇرىن جەر تەلىمىنە جازىلعان ەدى, بانككە اقشا جيناعان بولاتىن. ول 115 شارشى مەتر ءۇيدىڭ ءار شارشى مەترىن 115000 تەڭگەدەن الدى. ءۇي باعاسىنىڭ 30 پايىزىن تولەپ, قالعانىن تولەۋگە بانك 5 پايىزدىق ۇستەمەمەن نەسيە بەردى.
«قۋانىشىمىزدا شەك جوق. مەردىگەر كومپانيا ءۇيدى 3,5 ايدا سالىپ ءبىتتى. ءىشى كەڭ, ءۇش بولمە, ەسىكتىڭ الدىندا جەرى بار, وسىنداي ءۇي ءوزىمىزدىڭ ارمانىمىز بولاتىن» دەيدى سەرىك قايىربەك ۇلى.
جىل سوڭىنا دەيىن تاعى دا 60 وتباسى وسى جەردەن باسپانالى بولادى. شاعىن تۇرعىن اۋداننان 270 ءۇي سالىنباق.
ءنازيرا جارىمبەت
«ەگەمەن قازاقستان»
قوستاناي
