العاشقى ماتچ قىركۇيەكتىڭ 21-ءى كۇنى ءوتىپ, «بارىس» 4:1 ەسەبىمەن جەڭىسكە جەتتى. ماتچتىڭ ءبىرىنشى جانە ەكىنشى كەزەڭىندە كوماندالار قورعانىستا ءساتتى ويناپ, ءبىر-ءبىرىنىڭ قاقپاسىنا شايبا سوعا المادى. ويىننىڭ ەڭ تارتىستى كەزەڭى ءۇشىنشى بولىكتىڭ سوڭعى 11-مينۋتىندا ءوتىپ, شايبالار دا وسى ۋاقىت ارالىعىندا سوعىلدى.
«بارىستىڭ» كانادالىق شابۋىلشىسى مەتت فرەتتين ويىننىڭ 41-ءشى مينۋتىندا شايبا سوعىپ, كوماندامىزدى العا شىعارعان بولسا, كونستانتين پۋشكارەۆ 52-ءشى مينۋتتا ەسەپتى 2:0-گە جەتكىزدى. ارادا نەبارى 40 سەكۋند وتكەندە ۆلاديمير ماركەلوۆ «بارىس» كلۋبىنىڭ ءۇشىنشى شايباسىن سالدى. ءۇش شايبا سوققان سوڭ استانانىڭ كلۋبى ازداپ بوساڭسىپ كەتتى. مۇنداي ءساتتى قارسىلاس كوماندا كەشىرمەيتىنى انىق. شابۋىلدارىن ۇدەتە تۇسكەن «دينامو» كلۋبى ماتچتىڭ 57-ءشى مينۋتىندا ەسەپتى 3:1-گە قىسقارتتى. شايبا اۆتورى – دجاستين فونتەين. دەگەنمەن ويىن اياقتالۋعا 42 سەكۋند قالعاندا «بارىس» ويىنشىسى كونستانتين پۋشكارەۆ ماتچتاعى ەكىنشى شايباسىن سوعىپ, ويىننىڭ نۇكتەسىن قويدى.
اراعا ەكى كۇن سالىپ «بارىس» حوككەي كلۋبى ماسكەۋدىڭ «دينامو» حوككەي كلۋبىمەن سىنعا ءتۇسىپ, تارتىستى وتكەن ماتچ-
تا جەرلەستەرىمىز 3:5 ەسەبىمەن قوناقتارعا ەسە جىبەرىپ قويدى. ايتا كەتەيىك, قارسىلاس كوماندا ساپىندا «بارىستىڭ» بۇرىنعى ويىنشىسى جانە ۇلتتىق قۇراما شابۋىلشىسى داستين بويد ويناپ, ءبىر شايبا سوقتى.
ويىنداعى «بارىس» كلۋبىنان كونستانتين پۋشكارەۆ (25-مينۋت), نايدجەل دوۋس (35-ءشى جانە 47-ءشى مينۋت) شايبا سوقسا, ال قوناقتار ساپىنان نيكيتا كوماروۆ (4-مينۋت), مارتينش كارسۋمس (30-مينۋت), داستين بويد (40-مينۋت), اندرەي الەكسەەۆ (55-مينۋت) جانە دانيل تاراسوۆ (59-مينۋت) گول سالدى.
قۇرلىقتىق حوككەي ليگاسىنىڭ «شىعىس» ايماعىنداعى تۋرنير كەستەسىندە «بارىس» كومانداسى ءبىر جەڭىس جانە ءبىر جەڭى-
لىستەن سوڭ 22 ۇپايمەن بەسىنشى ورىندا كەلە جاتىر.
ءالي بيتورە,
«ەگەمەن قازاقستان»
