مەملەكەت باسشىسىنىڭ قازاقستان حالقىنا ارناعان جولداۋلارىندا ەلدەگى كاسىپكەرلىكتى بارىنشا دامىتىپ, وعان بارلىق جاعدايدى جاساۋ مىندەتى العا قويىلدى. ونىڭ ىشىندە سالىقتىق اۋىرتپالىقتى ازايتۋ, مەنشىك مۇلكى مەن اكتيۆتەردى زاڭداستىرۋ, نەسيەلىك رەسۋرستارعا قول جەتكىزۋدى جەڭىلدەتۋ, اكىمشىلىكتىك راسىمدەر مەن رۇقسات الۋدى جەڭىلدەتۋ, بيۋروكراتتىق باسسىزدىق پەن باقىلاۋ-تەكسەرۋ ورگاندارىنان قورعاۋ, شاعىن جانە ورتا بيزنەستى قولداۋدىڭ ايماقتىق ورتالىقتارىن قۇرۋ, ماركەتينگتىك زەرتتەۋلەردى جۇرگىزۋدە كومەك كورسەتۋ, بىلىكتىلىگىن كوتەرۋ سەكىلدى امالدار دا ىسكە اسىرىلۋدا.
بۇعان قوسا ەلباسى استانادا وتكەن پرەزيدەنت جانىنداعى كاسىپكەرلەر كەڭەسىنىڭ 1-ءشى جالپى وتىرىسىندا-اق, كەز كەلگەن كاسىپكەر ءوز بيزنەسىنە قۇقىق قورعاۋ ورگاندارى وكىلدەرىنىڭ زاڭسىز ارالاسقانىن ايتىپ, ەلەكتروندى پوشتا ارقىلى ارىز-شاعىم جىبەرە الاتىن پرەزيدەنت اكىمشىلىگىنىڭ ارنايى سايتىن اشۋدى تاپسىرعان بولاتىن. بۇل شارا سول كەزدەن باستاپ قۇقىق قورعاۋ ورگاندارىنىڭ بيزنەسمەندەرگە قوقان-لوققى كورسەتىپ, زاڭسىز تەكسەرۋ جاسايتىن كەيبىر وكىلدەرىنىڭ جولىن كەستى. سودان بەرى كاسىپكەرلەردى زاڭسىز تەكسەرىستەردەن اراشالاۋدىڭ, قورعاۋدىڭ ءتيىمدى جولدارى قاراستىرىلىپ كەلەدى. بۇگىندە سونىڭ ەڭ ءتيىمدى دە, ساپالى ءتۇرى تابىلىپ وتىر. ول – باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ كاسىپكەرلەرگە ۇسىنعان كومەكشى قۇرالى سانالاتىن «QAMQOR» ءموبيلدى قوسىمشاسى.
قازىرگى كەزدە ءاربىر كاسىپكەر ءموبيلدى قۇرالدار ارقىلى وزىنە تەكسەرۋشىلەر قاشان, قاي كەزدە كەلەتىندىگىن الدىن الا بىلە الادى. ماسەلەن, ءبىز ايتىپ وتىرعان «QAMQOR» موبيلدىك قوسىمشاسى بىرنەشە فۋنكتسيا اتقارادى. سونىڭ ىشىندە ماڭىزدى دەگەن 2 فۋنكتسيانى اتايىق. ونىڭ ءبىرىنشىسى, «QAMQOR» كاسىپكەرگە الدىن الا, ياعني 1-2 كۇن بۇرىن ء«سىزدى تەكسەرۋگە كەلەدى» دەگەن Puch-حابارلاما جىبەرىپ قويادى. ەكىنشىسى, ء«سىز تەكسەرۋدىڭ زاڭدىلىعىن جانە وزەكتىلىگىن تەكسەرە الاسىز», دەگەن كومەك ۇسىنادى. وسىعان سايكەس, الگى «QAMQOR» ءموبيلدى قوسىمشاسى ارقىلى كەلگەن Puch-حابارلامانى اشىپ, كاسىپكەردى تەكسەرۋگە قاتىستى تۇلعالار, تەكسەرۋدىڭ مەرزىمى, قۇقىقتىق نەگىزدەرى, تەكسەرۋ ماسەلەسى تۋرالى مالىمەتتەردى تولىق كورۋگە بولادى. دەمەك, ەندى كاسىپكەر تەكسەرىستىڭ بارلىق ءمان-جايىن الدىن الا ءبىلىپ وتىرادى. جانە ول تەكسەرىس زاڭدى ما, زاڭسىز با, نەگىزدى مە, نەگىزسىز بە نەمەسە قۇقىعى بار تەكسەرۋشىلەر مە الدە جالعان الاياقتار ما دەگەندەي ساۋالدارعا «QAMQOR» ارقىلى جاۋاپ الادى. ال شىنايى قۇقىقتىق زاڭدىلىقپەن قارۋلانعان كاسىپكەردىڭ ارى تازا بولسا ەشتەڭەدەن قاۋىپتەنبەيدى.
ەگەر كاسىپكەر زاڭنان تىس اۋىتقۋشىلىق بايقاسا, ءوزىن قورعاي الادى. وعان ونلاين رەجىمدە تەكسەرۋگە دەيىن جانە تەكسەرۋ بارىسىندا ورىن العان زاڭ بۇزۋشىلىقتاردى حابارلاما رەتىندە جولداۋعا تولىق مۇمكىندىك بار. جولدانعان حابارلامالار كوميتەتتىڭ اۋماقتىق باسقارمالارىنا كەلىپ تۇسەدى جانە بۇل حابارلامالار بويىنشا جەدەل تۇردە ناقتى جاۋاپ بەرىلەدى. دەمەك زاڭدى نە زاڭسىز ىستەردىڭ ءبارى جەدەل قارالادى. ەندەشە مۇنداي زاڭ ۇستەمدىك ەتەتىن جەردە «تىرناق استىنان كىر ىزدەپ» كاسىپكەرگە ناقاق ءتيىسۋ دەگەن بولا قويمايتىنى انىق. ال بۇل كاسىپكەرگە قامقورلىق جاسايتىن اتالعان موبيلدىك قوسىمشانى كەز كەلگەن قولدانۋشى android ءۇشىن Play-Market-تە, IOS ءۇشىن App store-دا جۇكتەي الادى.
قوسىمشا وسى جىلدىڭ ءساۋىر ايىنان باستاپ ىسكە قوسىلىپ, ءوزىنىڭ تيىمدىلىگىن كورسەتۋدە. مىسالى, جامبىل وبلىسىندا مەملەكەتتىك ورگاندار تاراپىنان جول بەرىلىپ جاتقان زاڭسىز ارەكەتتەر تۋرالى «QAMQOR» ءموبيلدى قوسىمشا ارقىلى كاسىپكەرلەردەن 2 ءوتىنىش تۇسكەن. وندا ۇستىمىزدەگى جىلدىڭ ماۋسىم ايىندا كاسىپكەر و.مالكوۆا تاراز قالالىق دەنساۋلىق ساقتاۋ باسقارماسى قىزمەتكەرلەرىنىڭ زاڭسىز ارەكەتتەرىنە شاعىم ايتقان. سويتسە كاسىپكەر و.مالكوۆانىڭ قىزمەتىن تەكسەرۋ نەگىزسىز ۇزارتىلعان ەكەن. و.مالكوۆا «QAMQOR» ءموبيلدى قوسىمشاسى ارقىلى حابارلاسقان سوڭ بۇل فاكتى انىقتالعان. كوميتەتتىڭ جامبىل وبلىسى بويىنشا باسقارماسىنىڭ تالابى بويىنشا اتالعان تەكسەرۋ زاڭسىز دەپ تانىلىپ, كەمشىلىك جىبەرگەن لاۋازىمدى تۇلعالار جاۋاپكەرشىلىككە تارتىلعان. سول سياقتى جامبىل وبلىسى, قاراتاۋ قالاسى ليتسەيى اسحاناسىنىڭ باسشىسى, جەكە كاسىپكەر ا.جاروۆا دا «QAMQOR» ءموبيلدى قوسىمشاسى ارقىلى ءتيىستى ورگانعا شاعىم تۇسىرگەن. جۇرگىزىلگەن تەكسەرۋدىڭ ناتيجەسىندە, اۋماقتىق ءبىلىم ءبولىمى قىزمەتكەرلەرىنىڭ زاڭسىز تەكسەرۋ جۇرگىزگەندىگى انىقتالىپ, 3 لاۋازىمدى تۇلعا تارتىپتىك جاۋاپكەرشىلىككە تارتىلعان. وسىلايشا اتالعان «QAMQOR» ءموبيلدى قوسىمشاسى كاسىپكەرلەرگە بارىنشا قامقورلىق تانىتۋدا.
الەكساندر تاسبولات,
«ەگەمەن قازاقستان»
