جيىن بارىسىندا ايتىلعانداي, قاراعاندى وبلىسىنىڭ مەملەكەتتىك ورگاندارىنىڭ قىزمەتتىك كولىكتەرىنە ارنايى ەمبلەمالار ورناتۋ باستاماسى رەسپۋبليكادا قۇپتالدى. بۇل تاجىريبەنى ەلىمىز بويىنشا قولدانۋ ۇسىنىسى جاسالدى.
– ارنايى مونيتورينگتىك توپتىڭ كەيىنگى وتىرىسىندا مەملەكەتتىك ورگانداردىڭ قىزمەتتىك كولىكتەرىندە ەرەكشەلىك بەلگىسىن قويۋ ماسەلەسى قاراستىرىلدى. قالا جانە اۋدان اكىمدەرىنە قىزمەتتىك كولىكتەرگە ايرىقشا بەلگى ورناتۋدى قامتاماسىز ەتۋ ۇسىنىستارى جاسالدى, – دەدى ارنايى مونيتورينگتىك توپتىڭ جەتەكشىسى ەرمەك ءابىلدين.
ونىڭ ايتۋىنشا, بۇگىنگى تاڭدا كوپتەگەن اكىمدىكتەر مەن باسقارمالار ەرەكشەلىك بەلگىلەرىن ورناتقان. الايدا ول جاڭاشىلدىقتى ەلەمەگەندەر دە بار. ولاردىڭ قاتارىندا – ءبىلىم باسقارماسى, اباي جانە نۇرا اۋداندارىنىڭ, ساران قالاسىنىڭ اكىمدىكتەرى بار.
– كەي مەملەكەتتىك ورگاندار بەلگىلەردى ورناتقاندارىن راستايتىن ماتەريالدار جىبەرگەن جوق. ول دەگەنىمىز, اتالعان شارا تەك قاعاز جۇزىندە ورىندالۋى مۇمكىن دەگەندى بىلدىرەدى. ايتا كەتەيىك, 2017 جىلدىڭ 7 قىركۇيەگىندە وتكەن رەسپۋبليكالىق ارنايى مونيتورينگتىك توپتىڭ حاتتاماسىندا ءبىزدىڭ باستامامىز رەسپۋبليكانىڭ بارلىق ورتالىق جانە جەرگىلىكتى اتقارۋ ورگاندارىنا ۇسىنىلدى, – دەيدى ە.ءابىلدين.
توپ مۇشەلەرى جەرگىلىكتى پوليتسيا قىزمەتىمەن بىرىگىپ ەرەكشەلىك بەلگىلەرىنىڭ ورناتىلعانىن تەكسەرۋ بويىنشا رەيد وتكىزۋدى ۇسىندى.
وتىرىستا سونىمەن قاتار 2015-2020 جىلدارعا سىبايلاس جەمقورلىققا قارسى ستراتەگيانى جۇزەگە اسىرۋ بويىنشا ءۇش جىلدىقتا جاسالاتىن شارالار جوسپارى تالقىلاندى.
ميراس اسان,
«ەگەمەن قازاقستان»
قاراعاندى وبلىسى
