فورۋمعا جينالعانداردى قۇتتىقتاعان مەملەكەتتىك حاتشى گۇلشارا ابدىقالىقوۆا ەلباسى نۇرسۇلتان نازارباەۆتىڭ «قازاقستان-2050» ستراتەگياسىندا الەۋمەتتىك قاۋىپسىزدىك پەن ازاماتتاردىڭ ءال-اۋقاتىن ارتتىرۋ ماسەلەلەرىنە باسا نازار اۋدارىلعانىن اتاپ ءوتتى. وسى ورايدا ول قازاقستاندا الەۋمەتتىك دامىتۋدىڭ 2030 جىلعا دەيىنگى تۇجىرىمداماسى قابىلدانعانىن, سوعان سايكەس الەۋمەتتىك سالالاردى دامىتۋ ماقساتىندا مەملەكەت تاراپىنان كومەك كورسەتىلىپ, جۇيەلى جۇمىس جۇرگىزىلەتىنىن مالىمدەدى.
مەملەكەتتىك حاتشى زاماناۋي جاھاندىق سىن-قاتەرلەر مەملەكەتتەر الدىنا الەۋمەتتىك ساياساتقا قاتىستى جاڭا تالاپتاردى كولدەنەڭ تارتىپ وتىرعانىن اتاپ كورسەتتى. ونىڭ ايتۋىنشا, بۇۇ-عا مۇشە ەلدەر 2030 جىلعا دەيىنگى ورنىقتى دامۋ ماقساتتارىن قابىلدادى. الەمدىك تاجىريبە كورسەتىپ وتىرعانداي, مەملەكەتتەر ازاماتتاردىڭ ءوز مۇمكىندىكتەرىن كەدەرگىسىز, ال الەۋەتتەرىن كەڭىنەن پايدالانۋىنا, ەڭبەك نارىعىندا مەيلىنشە ۇزاعىراق قالۋىنا جاعداي جاساۋى ءتيىس. بۇل ءۇشىن ءتۇرلى ادىستەر مەن تەتىكتەر قولدانىلادى: قايتا وقىتۋ, وڭالتۋ باعدارلامالارى, جۇمىس كۇشىنىڭ جيناقىلىعىن ىنتالاندىرۋ, ەڭبەك جاعدايىن جاقسارتۋ جانە ت.ب.
«بۇگىندە قازاقستان ءۇشىنشى جاڭعىرۋدى جۇزەگە اسىرىپ جاتىر. ەل الدىنا ادامي كاپيتالدىڭ ساپاسىن جانە باسەكەگە قابىلەتتىلىگىن ارتتىرۋعا جاعداي جاساۋ, سونداي-اق بارلىق قازاقستاندىقتاردىڭ تۇرمىس ساپاسىنىڭ جوعارى ستاندارتتارىنا قول جەتكىزۋىن قامتاماسىز ەتۋ جونىندەگى مىندەتتەر قويىلدى», – دەدى گ.ابدىقالىقوۆا.
مەملەكەتتىك حاتشى 2009 جىلى ارناۋلى الەۋمەتتىك قىزمەتتەر تۋرالى زاڭ قابىلدانعان سوڭ ەلىمىزدە الەۋمەتتىك قىزمەتتەر كورسەتۋ جۇيەسىن جاڭعىرتۋ قولعا الىنعانىن ءسوز ەتتى. ونىڭ نەگىزگى باعىتىنىڭ ءبىرى – الەۋمەتتىك سالا ەڭبەككەرلەرى ينستيتۋتىن قالىپتاستىرۋ جانە دامىتۋ. مەملەكەتتىك حاتشىنىڭ پىكىرىنشە, اتالعان ماماندىقتىڭ ماڭىزى مەن قوعامداعى ورنى ەرەكشە. سوندىقتان, الەۋمەتتىك قىزمەتكەردى قاراپايىم كۇتۋشى سەكىلدى جۇمىسشى دەگەن تۇسىنىكتەن ارىلۋ كۇن تارتىبىندە تۇر.
گ.ابدىقالىقوۆانىڭ سوزىنە سۇيەنسەك, قازىرگى جاعدايعا بەيىم ماماندار ازىرلەۋ دە ماڭىزدى مىندەت سانالادى. مەملەكەتتىك حاتشى الەۋمەتتىك قىزمەت سالاسىنداعى زاماناۋي جاڭالىقتاردى ەنگىزگەن ساپالى باعدارلاما كەرەكتىگىنە توقتالدى. سونداي-اق فورۋمنىڭ كۇن تارتىبىنە الەۋمەتتىك سالاداعى مەنەدجمەنت, الەۋمەتتىك قىزمەتكەرلەردى دايارلاۋ جانە ولاردىڭ بىلىكتىلىگىن ارتتىرۋ, كوممەرتسيالىق ەمەس ۇيىمداردىڭ ارناۋلى الەۋمەتتىك كومەك كورسەتۋ ىسىنە اتسالىسۋ اياسىن كەڭەيتۋ, ەرىكتىلىك پەن قايىرىمدىلىقتى قولداۋ ءتارىزدى وزەكتى ماسەلەلەر ەنگەن.
مەملەكەتتىك حاتشىنىڭ ايتۋىنشا, قازىرگى تاڭدا قازاقستاندا 20 مىڭعا جۋىق الەۋمەتتىك قىزمەتكەر بار. ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا «ماقساتقا جەتۋ ءۇشىن ءبىزدىڭ سانامىز ىسىمىزدەن وزىپ ءجۇرۋى, ياعني ودان بۇرىن جاڭعىرىپ وتىرۋى ءتيىس. بۇل ساياسي جانە ەكونوميكالىق جاڭعىرۋلاردى تولىقتىرىپ قانا قويماي, ولاردىڭ وزەگىنە اينالادى», دەپ جازعانىن اتاپ ءوتتى گ.ابدىقالىقوۆا.
جيىنعا قاتىسقان پرەمەر-ءمينيستردىڭ ورىنباسارى ەربولات دوساەۆ فورۋمنىڭ ماڭىزدىلىعىنا توقتالىپ, پرەمەر-مينيستر باقىتجان ساعىنتاەۆتىڭ قۇتتىقتاۋ حاتىن وقىپ بەردى. ء«اربىر ءتورتىنشى قازاقستاندىق الەۋمەتتىك قامسىزداندىرۋ جۇيەسىمەن قامتىلعان. اتاۋلى جۇمىستىڭ ءتيىمدى نىساندارى مەن ادىستەرى ەنگىزىلدى. الەۋمەتتىك مەكەمەلەردىڭ جاڭا تۇرلەرى قۇرىلىپ, الەۋمەتتىك قىزمەت كورسەتۋ تۇرلەرى كەڭەيتىلىپ وتىر. بۇل جۇمىس الەۋمەتتىك قىزمەتكەرلەردىڭ, ولاردىڭ جوعارى كاسىبيلىگى جانە كەرەمەت ادامي قاسيەتتەرىنىڭ ارقاسىندا جاسالىپ كەلەدى. قازىرگى تاڭدا الەۋمەتتىك قورعاۋ سالاسى بەلسەندى جاڭعىرتىلدى» دەلىنگەن پرەمەر-ءمينيستردىڭ قۇتتىقتاۋىندا.
سونىمەن قاتار, ۇكىمەت باسشىسى ءوز قۇتتىقتاۋىندا الەۋمەتتىك جانە كاسىپكەرلىك يدەيالارىن, قايىرىمدىلىق جانە ەرىكتىلىك ينستيتۋتتارىن ىلگەرىلەتۋگە, حالىقتى الەۋمەتتىك قورعاۋ سالاسىنا يننوۆاتسيالىق تەحنولوگيالاردى بەلسەندى ەنگىزۋگە جانە بيزنەستى تارتۋعا جاعداي جاساۋعا نيەتتى ەكەنىن جەتكىزگەن. پرەمەر-مينيستر بۇل ادىستەر تۇرعىنداردىڭ, كومەككە, ەرەكشە كۇتىم مەن قامقورلىققا ءزارۋ ادامداردىڭ ءومىر ءسۇرۋ ساپاسىن جاقسارتاتىنىن اتاپ وتكەن.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ ايتۋىنشا, جەرگىلىكتى باسقارۋشى مەكەمەلەردەگى الەۋمەتتىك قىزمەت سالاسىندا قايتا جاڭعىرتۋ جۇرگىزۋ قاجەت. ت.دۇيسەنوۆا اعا بۋىننىڭ الەۋمەتتىك قىزمەتكە قاتىستى قاتىپ قالعان تۇسىنىگى جاستارمەن جانە جاس وتباسىلارمەن بىرلەسە جۇمىس ىستەۋگە كەدەرگى كەلتىرىپ وتىر. سوندىقتان, وسى سالانىڭ دەڭگەيىن كوتەرۋدىڭ ماڭىزى ەرەكشە. سونىمەن بىرگە الەۋمەتتىك قىزمەت وسى سالاداعى بۇكىل باعدارلامالار مەن جەرگىلىكتى جەردەگى جۇمىسپەن قامتۋ باعدارلامالارىنا مۇرىندىق بولماق.
القالى جيىنعا الىستان ات تەرلەتىپ كەلگەن حالىقارالىق الەۋمەتتىك قامسىزداندىرۋ قاۋىمداستىعىنىڭ باس حاتشىسى حانس-حورست كونكولەۆسكي قازاقستاننىڭ وسى سالادا اتقارىپ جاتقان جۇمىستارىنا وڭ باعاسىن بەردى. بۇۇ-نىڭ قازاقستانداعى تۇراقتى ۇيلەستىرۋشىسى نوريماسا شيمومۋرا ەلىمىزدەگى الەۋمەتتىك باعدارمالاردىڭ ساپاسى جوعارى ەكەنىن مالىمدەدى.
فورۋم اياسىندا «قازاقستاندا جۇزەگە اسىپ جاتقان ۇزدىك الەۋمەتتىك جوبالار» رەسپۋبليكالىق كورمەسى ۇيىمداستىرىلدى. وعان ەلىمىزدىڭ بارلىق ايماعىنان 155 ءوتىنىش كەلىپ ءتۇسىپ, سونىڭ 20-سى ۇزدىك شىققان. بۇل كورمەنىڭ ماقساتى – قيىندىققا تاپ بولعان ازاماتتاردىڭ ماسەلەسىنە قوعام نازارىن اۋدارتۋ. جيىن سوڭىندا وزگەلەردەن وق بويى وزىپ شىققان ءۇش جوبا ەڭ ۇزدىك دەپ تانىلىپ, باعالى سىيلىقتارمەن ماراپاتتالدى.
اباي اسانكەلدى ۇلى,
«ەگەمەن قازاقستان»
