باسقوسۋدىڭ ماقساتى – ەلباسى جولداۋىندا ايقىندالعان مىندەتتەمەلەردى جۇزەگە اسىرۋ بارىسىندا ەل ەكونوميكاسىن وركەندەتۋ مەن اۋىل شارۋاشىلىعى سالاسىنىڭ ماڭىزىن ارتتىرىپ, عىلىم مەن ءوندىرىستىڭ ءوزارا قاتىناسىنا تىڭ سەرپىن بەرە وتىرىپ تاجىريبە الماسۋ. ەلىمىزدىڭ اگرارلىق سالاسىن يننوۆاتسيالىق باعىتتا كەشەندى دامىتۋ, عىلىمي جاڭالىقتاردى وندىرىسكە ەنگىزۋ, ينۆەستيتسيا تارتۋ جانە اۋىل شارۋاشىلىعىنا بىلىكتى ماماندار دايارلاۋ ماسەلەلەرى باسقوسۋدىڭ نەگىزگى وزەگىنە اينالدى.
مامانداردىڭ ايتۋىنشا, سوڭعى 10 جىلدا اۋىل شارۋاشىلىعى عىلىمىمەن اينالىساتىنداردىڭ سانى 8%-عا تومەندەگەن. بۇعان سەبەپ ماماندار جاسىنىڭ ۇلعايۋى, عالىمداردىڭ باسقا سالاعا اۋىسۋى, جاستاردىڭ عىلىمعا دەگەن قىزىعۋشىلىعىنىڭ ازدىعى بولسا كەرەك. «سوڭعى 10 جىلدا عىلىمي زەرتتەۋلەرگە بيۋدجەتتەن 50 ملرد. تەڭگە بولىنگەن. ال ەنگىزىلگەن عىلىمي زەرتتەۋلەردىڭ سانى 262-ءنى عانا قۇراپ وتىر. بۇل كورسەتكىشتى ۇلعايتۋ كەرەك. قازىرگى تاڭدا اۋىلدىق جەرلەردە مامان تاپشى. جوعارى وقۋ ورنىن مەملەكەتتىك گرانتپەن بىتىرگەن تۇلەكتەردىڭ 50% عانا اۋىلدىق جەرلەردە جۇمىس ىستەيدى. سالانىڭ قىر-سىرىنا قانىققان باسەكەگە قابىلەتتى بىلىكتى كادرلار دايارلاۋ ماسەلەسى ءاردايىم باستى نازاردا بولۋعا ءتيىس» دەيدى, ساراپشى عالىمدار.
جيىندا تالقىلانعان تاعى ءبىر ماسەلە تەحنولوگيالىق جاھاندانۋداعى ەكونوميكانىڭ دامۋى جانە وندىرىستەگى سوڭعى عىلىمي جەتىستىكتەردىڭ اوك مەملەكەتتىك باعدارلاماسىنان كورىنىس تابۋى. وسى رەتتە, ۆەدومستۆا باسشىسى جول كارتاسىن ىسكە اسىرۋ باعىتىندا كادر ساياساتى جۇيەسىن جەتىلدىرۋ مەن «بولاشاق» باعدارلاماسى بويىنشا ماماندار دايىنداۋدى جانە الەمنىڭ جەتەكشى ۋنيۆەرسيتەتتەرىنەن عالىمداردىڭ تاجىريبەدەن ءوتۋ جۇيەسىن جەتىلدىرۋ تۋرالى تاپسىرما بەردى. سونداي-اق اسقار مىرزاحمەتوۆ قازاق ۇلتتىق اگرارلىق ۋنيۆەرسيتەتى بازاسىنداعى ءبىلىم جانە ءوندىرىستىڭ ءوزارا ارەكەت الاڭى رەتىندە 2016 جىلى قۇرىلعان اگروتەحنولوگيالىق حاب جۇمىسىمەن تانىستى.
– بۇگىنگى كۇنگى تابىستى جۇمىسىمىزدىڭ ءبىرى دەپ قازاق ۇلتتىق اگرارلىق ۋنيۆەرسيتەتىندەگى اوك سالاسىنداعى اگروحابتى ايتۋعا بولادى. ترانسفەرتتى تەحنولوگيالار جوبالارىن دامىتۋ اوك ءۇشىن وتە ماڭىزدى. كورىپ وتىرعانىمىزداي اگروحاب مىقتى ۇجىم مەن ادىستەمەسى بار جانە امەريكاندىق اقپارات جانە تەحنولوگيا ورتالىعىنىڭ باسشىلارىمەن تىعىز قارىم-قاتىناستا جۇمىس اتقارىپ وتىر – دەدى اسقار مىرزاحمەتوۆ.
جيىن قورىتىندىسىنا سايكەس, الداعى ۋاقىتتا اۋىل شارۋاشىلىعى تاۋار وندىرۋشىلەردىڭ سانىن وسىرۋمەن قاتار, شارۋالارعا از شىعىن شىعارۋ ارقىلى يننوۆاتسيالىق تەحنولوگيالاردى 10% دان 25% عا كوتەرۋ كوزدەلىپ وتىرعاندىعى ايتىلدى.
ارمان وكتيابر,
«ەگەمەن قازاقستان»
الماتى
