قازىرگى كانتسلەر انگەلا مەركەل حريستيان-دەموكراتيالىق پارتياسى (حدس) اتىنان ءتورتىنشى رەت ۇمىتكەر اتانىپ وتىر. سونىمەن بىرگە ونىڭ پارتياسى جاڭا بۋندەستاگ قۇرامىندا نەگىزگى ورىنعا يە بولادى دەگەن بولجام بار. بۇل سايلاۋدا باسەكە حدس مەن «ۇلكەن كواليتسيا» بويىنشا ارىپتەس بولىپ كەلگەن گەرمانيا سوتسيال-دەموكراتيالىق پارتياسى اراسىندا ءوتىپ جاتىر. ال «گەرمانيا ءۇشىن بالاما» وڭشىل راديكالدار پارتياسى العاش رەت پارلامەنتكە ءوتۋى مۇمكىن.
سايلاۋ جەرگىلىكتى ۋاقىت بويىنشا تاڭعى 8-دە باستالدى, سايلاۋ ۋچاسكەلەرى كەشكى 18.00 شاماسىندا جابىلادى. العاشقى ناتيجەلەر داۋىس بەرۋ اياقتالعاننان كەيىن بەلگىلى بولماق. ەكىنشى دۇنيەجۇزىلىك سوعىس اياقتالعاننان بەرگى مەرزىمدە بۋندەستاگقا العاش رەت التى پارتيا ءوتۋى ىقتيمال بولۋى سەبەپتى دە بۇل جولعى سايلاۋدىڭ ماڭىزى جوعارى بولىپ وتىر.
ايا ءومىرتاي,
«ەگەمەن قازاقستان»
