وتىرىس بارىسىندا ساۋدا-ساتتىق, ينۆەستيتسيا, ونەركاسىپتىك كووپەراتسيا, اۋىل شارۋاشىلىعى, عىلىم مەن تەحنولوگيا, كولىك جانە لوگيستيكا سالالارىنداعى ەكىجاقتى ىنتىماقتاستىقتى دامىتۋ ماسەلەلەرى تالقىلاندى.
ا.مامين قازاقستان مەن بەلارۋس اراسىنداعى مەملەكەتارالىق بايلانىستىڭ بارلىق دەڭگەيى ءساتتى جۇزەگە اسىپ جاتقاندىعىن, ەكى ەلدىڭ پوستكەڭەستىك كەڭىستىكتە, ەڭ الدىمەن, ەۆرازيالىق ەكونوميكالىق وداققا بىرىگۋىن تىلگە تيەك ەتتى. تاراپتار 2017 جىلدىڭ 7 ايىنىڭ قورىتىندىسى بويىنشا قازاقستان مەن بەلارۋس اراسىنداعى ساۋدا-ساتتىق اينالىمىنىڭ قارقىنىن اتاپ ءوتتى. بيىل قاڭتار-شىلدە ايلارىنداعى ساۋدا-ساتتىق اينالىمى بىلتىرعى جىلعى كورسەتكىشپەن سالىستىرعاندا, 75,6% ء وسىپ, 313,7 ملن اقش دوللارىنا جەتكەن.
ا.مامين «2020 جىلى ەكى ەل اراسىنداعى ساۋدا-ساتتىق اينالىمىن 1 ملرد. اقش دوللارىنا دەيىن جەتكىزۋ كوزدەلىپ وتىر»,- دەپ ايتىپ ءوتتى. ول قازاقستان مەن بەلارۋس ونەركاسىپتىك كووپەراتسيا, كولىك-لوگيستيكالىق سەكتور, عارىش سالاسى, اگروونەركاسىپتىك كەشەن, مادەني-گۋمانيتارلىق جانە عىلىمي-تەحنيكالىق سالاداعى بىرلەسكەن جوبالاردى جۇزەگە اسىرۋدىڭ ۇلكەن مۇمكىندىكتەرىنە يە ەكەندىگىن دە باستى نازاردا ۇستادى.
ماجىلىستە تاراپتار سەرىكتەستىكتەگى كەلەشەگى بار باعىتتاردى, مال شارۋاشىلىعى, وسىمدىك شارۋاشىلىعى, مەليوراتسيالاۋ جانە جەردى سۋارمالاۋ سياقتى جوبالاردى جاساۋ ءۇشىن ءوزارا جۇمىس توبىن قۇرۋ مۇمكىندىگىن قاراستىردى. سونداي-اق, قازاقستاندىق اۋىل شارۋاشىلىعى ونىمدەرىن بەلارۋس ەلىنە, ال بەلارۋستىق ونىمدەردى قازاقستانعا جەتكىزۋ ماسەلەلەرى تالقىلاندى. سونداي-اق وسى جىلدىڭ قاراشا ايىندا قازاقستاننىڭ سىرتقى ساۋدا پالاتاسى مەن بەلارۋس ەلىنىڭ ساۋدا-ونەركاسىپتىك پالاتاسىنىڭ اراسىندا قازاقستاندىق-بەلارۋستىك ىسكەرلىك كەڭەستى قۇرۋ تۋرالى كەلىسىمگە قول قويىلادى دەپ جوسپارلانۋدا.
ميراس اسان,
«ەگەمەن قازاقستان»
قاراعاندى
