بيىلعى فەستيۆالگە قاتىسۋشىلار «ۆوكال», «حورەوگرافيا», «كوركەم ءسوز» جانە «بەينەلەۋ ونەرى» اتالىمدارى بويىنشا ونەر كورسەتەدى. 7-17 جاس ارالىعىنداعى بالالار مەن جاسوسپىرىمدەر 23 قازانعا دەيىن بايقاۋعا قاتىسۋعا ءوتىنىش بەرە الادى. بۇل ءۇشىن «جاستار» سارايىنىڭ www.zhastarastana.kz سايتىنان ءوتىنىش ۇلگىسىن جۇكتەپ الۋعا جانە بايقاۋ ەرەجەسىمەن تانىسۋعا بولادى.
«جاستار» سارايى جىل سايىن ۇيىمداستىراتىن «بالبوبەك» فەستيۆالى استانالىقتاردان عانا ءوتىنىش قابىلدامايدى, وعان ەلىمىزدىڭ تۇكپىر-تۇكپىرىندەگى جاس دارىندار قاتىسا الادى. بايقاۋعا قاتىسۋشىلاردى بىلىكتى قازىلار القاسى باعالايدى. ادىلدىك ءۇشىن ولاردىڭ قۇرامى فەستيۆالدىڭ اشىلۋ سالتاناتىندا جاريالانادى.
ءۇش كۇنگە جالعاساتىن فەستيۆال جەڭىمپازدارى 31 قازاندا بايقاۋدىڭ گالا-كونتسەرتىندە انىقتالادى.
