ەدىلجان مەن مەرجان – سىنىپتاس دوستار, بوستاندىق ورتا مەكتەبىندە بىرگە وقىپ, باستاۋىش كلاستان-اق بوكس ۇيىرمەسىنە, فۋتبولعا قاتىسقان. ەدىلجان 9 سىنىپتان كەيىن ورال قالاسىندا ج.دوسمۇحامەد ۇلى اتىنداعى پەداگوگيكالىق كوللەدجىنىڭ دەنەشىنىقتىرۋ فاكۋلتەتىندە وقىدى. جۇگىرۋمەن دە كاسىبي تۇردە اينالىسا باستاعانى سول كەز. مەرجان قۇرمانعازى اتىنداعى ساز كوللەدجىنىڭ اكتەرلىك شەبەرلىك فاكۋلتەتىن ءتامامداسا دا سپورتتان قول ۇزبەگەن.
- جىگىتتەر تاڭعى ساعات 6-دا جالپاقتال اۋىلىنىڭ تۇسىنان جولعا ءتۇستى. ءسويتىپ, ءتورت ساعات بويى ءبىر ىرعاقپەن جۇگىرىپ وتىرىپ, ءدال تاڭەرتەڭگى 10-دا بوستاندىق اۋىلىنا كەلىپ جەتتى. ءبىز مارافونشىلاردىڭ الدىنان وقۋشىلاردى جيىپ, ءسان-سالتاناتپەن كۇتىپ الدىق, - دەيدى اۋىلداعى ورتا مەكتەپتە تاريح پانىنەن ساباق بەرەتىن نۇربەك ماقسوتوۆ.
ءبىر سۇيسىنەرلىگى, بوستاندىق اۋىلىندا بۇقارالىق سپورت جاقسى دامىعان. وعان ورتا مەكتەپ ديرەكتورىنىڭ تاربيە ءىسى جونىندەگى ورىنباسارى بولعان نۇربەك ماقسوتوۆتىڭ ۇلكەن ۇلەسى بار ەكەن. بەس جىل بۇرىن اۋىلدا فۋتبول ۇيىرمەسى اشىلعان, بيىل قىزداردى دا قابىلداي باستاپتى. «بوستاندىق بياتلونى» دا نۇربەك ۇيىمداستىرعان مىقتى سايىستىڭ ءبىرى بولدى. جەڭىستىڭ 70 جىلدىعىنا «9 مامىرعا – 9 شاقىرىم» اتتى جارىس وتكىزىپ, ونىڭ جۇلدەسىنە ارنايى كۇمىس جۇزىك جاساتىپتى.
- كۇمىسىن ءوزىمىز تاۋىپ, شەبەرگە 20 مىڭ تەڭگە بەرىپ جاساتتىق ول جۇزىكتى. سول بايگەدەن ەدىلجان وزىپ كەلدى. مەرجان دا مىقتى. ءوزىنىڭ تۋعان كۇنىندە اۋدان ورتالىعىنان - 30 شاقىرىم جەردەن جاياۋ جۇگىرىپ كەلدى عوي. وزدەرىنە موتيۆاتسيا بەرىپ, ۇنەمى العا ۇمتىلىپ جۇرەدى, - دەيدى نۇربەك شاكىرتتەرىنە ءسۇيسىنىپ.
ايتپاقشى, «دەنەشىنىقتىرۋ ءپانىنىڭ مۇعالىمى» ديپلومى بولسا دا ەدىلجانعا اۋىل مەكتەبىندە جۇمىس جوق. جەكە كولىگىمەن قالاعا ادام تاسىپ, كۇنىن كورىپ ءجۇر. اكتەرلىق ماماندىعىن يگەرگەن مەرجان ورالدا جاستار تەاترىندا بىرەر اي جالاقىسىز قىزمەت ەتىپ, اقىرى تاستاپ كەتىپتى. قازىر بوس. ارا-تۇرا ۆاگون تۇسىرەدى ەكەن. الايدا سپورتتان قول ۇزبەي, ۇزاق قاشىقتىققا جۇگىرۋگە ماشىقتانىپ ءجۇر. «كەلەر جىلى ورالدان بوستاندىققا دەيىن جۇگىرىپ بارساق» دەيدى جەلاياق جىگىتتەر. ال ول دەگەنىڭىز – 340 شاقىرىمدىق جول.
قازبەك قۇتتىمۇرات ۇلى,
«ەگەمەن قازاقستان»
