«قازاق ادەبيەتى, قازاقستان تاريحى جانە گەوگرافيا پاندەرى نەگىزىندە ءار ولكەنىڭ ادەبيەتى, تاريحى, قايتالانباس تابيعاتى مەكتەپتە وقىتىلىپ, وقۋشىلاردىڭ ءبىلىمى شىڭدالىپ, باعالانۋى ءتيىس. ال فاكۋلتاتيۆتىك ساباقتار ەسەبىنەن جۇرگىزىلەتىن تانىمدىق ەكسكۋرسيالار مەن مۇراجايلارعا, تاريحي ەسكەرتكىشتەرگە ساياحاتتار تەوريالىق ءبىلىمدى تولىقتىرۋ ءۇشىن عانا قولدانىلۋى كەرەك», دەيدى «نۇر وتان» پارتياسىنىڭ حاتشىسى قانىبەك جۇماشەۆ. ارينە, ول تاپسىرمانى ورىنداۋدا, ەڭ الدىمەن, تۇرىپ جاتقان مەكەنىندەگى تاريحي تۇلعالاردى زەرتتەپ, ولار تۋرالى كىتاپتار جازىپ شىعارۋعا, مۇراجاي اشۋعا,ت.ب. شارالاردى وتكىزۋگە بولادى.
وسى ورايدا ايتا كەتەتىن جايت, جاڭا وقۋ جىلىندا اقمولا وبلىسى, قورعالجىن ەلدى مەكەنىندەگى مەكتەپ-گيمنازيادا ۇلى مۇحتار اۋەزوۆتىڭ تالانتتى شاكىرتى «جان تىنىسى» (2017), «ارمان اسۋىندا» (2015) دەيتىن كىتاپتاردىڭ اۆتورى ەرمەك بىجكەنوۆ اتىنداعى قازاق ءتىلى جانە قازاق ادەبيەتى ءدارىسحاناسى اشىلعان بولاتىن.
سالتاناتتى اشىلۋ راسىمىنە قورعالجىن اۋدانىنىڭ جانە اۋداندىق ءبىلىم ءبولىمىنىڭ باسشىلارى, ەڭبەك ارداگەرلەرى, اۋىل قارتتارى, مۇعالىمدەر, وقۋشىلار جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ بىرقاتار عالىمدارى قاتىستى. وقىتۋ بولمەسى كۇردەلى جوندەۋدەن ءوتىپ, وقۋ پروتسەسىنە قاجەتتى قۇرالدارمەن جوعارى دەڭگەيدە جابدىقتالعان.
ەرمەك بىجكەنوۆ – قورعالجىننىڭ دامۋىنا كوپ ۇلەس قوسىپ, ەڭبەگى سىڭگەن قوعام قايراتكەرى. ول جاسىنان وتە زەرەك, دارىندى, تالاپتى ازامات بولعان. مەكتەپتە ۇلگەرىمى وتە جاقسى بولىپ, 4-5 سىنىپتى ءبىر جىلدا بىتىرەدى دە, 16 جاسىندا اياقتاپ شىعادى. الماتى قالاسىندا س.م.كيروۆ اتىنداعى قازمۋ-ءدىڭ فيلولوگيا فاكۋلتەتىنە تۇسەدى. بۇندا دا ۇزدىك وقىپ, ستالين ستيپەندياسىنىڭ يەگەرى, كومسومول كوشباسشىسى اتانادى. وقۋىن بىتىرىسىمەن تۋعان وڭىرىنە ورالىپ حالىققا قىزمەت ەتەدى. اۋدان مەكتەپتەرىن العا تارتىپ, ديرەكتور قىزمەتىن دە اتقاردى, كەزىندە پارتكوم حاتشىسى بولدى.
ەرمەك بالتاباي ۇلى وتە ءادىل, شىنشىل, قازاق ءتىلىن, ورىس ءتىلىن, اراب ءتىلىن جەتىك مەڭگەرگەن جان بولعان. الايدا ءومىردىڭ زاڭىنا قارسى تۇرا الماي, نەبارى 51 جاسىندا دۇنيەدەن وزدى. وسى جانە باسقا مالىمەتتەردى دارىسحاناعا قويىلعان قۇجاتتاردان بىلۋگە بولادى. بۇل كىسىنىڭ ءومىرىنىڭ ءوزى – جاس ۇرپاققا تەرەڭ ساباق.
وقۋ جىلى دا باستالىپ كەتتى. جاڭا ءدارىسحانادا ءبىرىنشى ساباقتار جۇرگىزىلىپ جاتىر. قورعالجىن اۋىلىنىڭ ولكەتانۋ ساباقتارىنىڭ باستاپقى قادامى وقۋشىلارعا ءبىلىم الۋدا ۇلكەن سەپتىگىن تيگىزۋدە.
بۇل ءدارىسحانادا وقۋشىلاردىڭ وقۋعا دەگەن ىنتاسى مەن قىزىعۋشىلىعى ارتا ءتۇسۋى ءسوزسىز. تاريحي وقيعاعا اينالعان ءىس-شارا تەك قورعالجىن مەكتەپ-گيمنازياسىن عانا ەمەس, كۇللى قورعالجىن تۇرعىندارىن قۋانىشقا بولەدى.
مىنە, وسىنداي يگى ءىس ارقىلى اپا-اعالارىمىزدان ۇلگى الىپ, تۋعان ەلگە, تۋعان جەرگە, وتانىمىزعا دەگەن پاتريوتتىق سەزىمدى وياتا الامىز. ەل بولىپ, جۇرت بولىپ بىرگە بىرىگىپ جۇمىس اتقارساق, العا قويعان ماقساتتار مەن جوسپارلاردى جۇزەگە اسىرىپ, دامىعان 30 ەلدىڭ قاتارىنا قوسىلاتىنىمىزعا سەنەمىز. قازاقستان – تۇعىرى بيىك, ماقساتى انىق, بولاشاعى جارقىن ەل!
بايان ءجۇسىپوۆا,
قورعالجىن ورتالىق مەكتەپ-گيمنازياسى ديرەكتورىنىڭ ورىنباسارى
اقمولا وبلىسى
